ДАРСДА ЎҚИТУВЧИ ОДОБИ ҲАМ МУҲИМ
Истиқлол туфайли мамлакатимизда фуқароларнинг эркин ва озод тараққий этиши учун кенг имкониятлар юзага келди. Халқимиз ўзининг бой тарихий мероси, маданиятининг ўлмас анъаналарини тиклаш ва ривожлантириш, улуғ аждодларимизга муносиб баркамол авлодни тарбиялаш, тафаккур оламини соғломлаштиришдан иборат ғоят катта бунёдкорликка киришди. Халқ таълими тизимида олиб борилаётган улкан ислоҳотлар ҳам шулар жумласидандир.
Бугунги кунда собиқ иттифоқ давридагидек ўқувчининг дарсга қатнашиши, тинч ўтириши, тартибга риоя қилиши, неча баҳо олиши эмас, дарсда нимани ўрганиши, нималарга қизиқиши кучайгани, ўрганганларини амалиётда қўллай олиши ва ўз фикрини мустақил ўртага ташлай олиши ўқитувчи меҳнати натижаси ҳисобланади.
Юртимизнинг келажаги биз тарбиялаётган болалар қўлида экан, бу ўз навбатида ўқитувчи зиммасига улкан масъулият юклайди.
Замон тезкор, замон шиддатли. Болаларимизнинг орзу-интилишлари, қизиқишлари ҳам шунга монанд. Бу ўз-ўзидан ўқитувчилардан чуқур билимли, маънавиятли, оқил ва етук ахлоқли бўлишни тақозо этади.
Ўзбекистон халқ таълими вазирлигининг 2013 йил 28 февралдаги буйруғига асосан умумий ўрта таълим мактаблар ўқитувчи ва ўқувчиларининг одоб-ахлоқ қоидалари қабул қилинди. У таълим тизимига жорий этилган ҳукуматимиз қарорлари, қоидалар ва умум эътироф этилган маънавий-ахлоқий тамойиллар асосида ишлаб чиқилган бўлиб, таълим муассасалари жамоа аъзоларининг муассасадаги ўзаро муносабатларида риоя этишлари шарт бўлган обод-ахлоқ тамойиллари, хулқ-атвор меъёрлари ва мажбуриятларини белгилаб беради.
"Обод-ахлоқ қоидалари” – умумий ўрта таълим мактабларида соғлом ижтимоий-психологик муҳитни шакллантириш, ёш авлодга замон талаблари ва миллий қадриятлар асосида таълим-тарбия бериш, таълим муассасаларида ўқув-тарбия жараёнининг сифати, маънавий-маърифий ишлар самарадорлигини оширишга шароит яратиш мақсадида қабул қилинган бўлиб, мамлакатимиздаги барча таълим муассасалари ўқитувчилари, ўқувчилари ва техник ходимлари учун мажбурийдир.
Тўққизта бобдан иборат "Одоб-ахлоқ қоидалари”да жамоа аъзоларининг одоб-ахлоқига оид қоидалар, ўқитувчи ва ўқувчиларнинг таълим-тарбия жараёнидаги ўзаро муносабатлари, ўқитувчиларнинг ўзаро муносабатлари, мактаб жамоаси аъзоларининг обод-ахлоққа оид мажбуриятлари, мактаб жамоаси аъзоларининг одоб-ахлоқида ман этиладиган ҳолатлар, рағбатлантириш ва чора кўриш тартиби аниқ баён этилган бўлиб, бу қоидалар бизнинг 15-сонли умумтаълим мактабимиз фаолиятида ҳам дастуриламал бўлиб хизмат қилмоқда.
Ўз ишини мазкур қоидалар асосида ташкил ўтган ўқитувчи ўқувчилар олдида ибрат бўлгулик маънавий қиёфа касб эта олади.
Кимнингдир яхши ишини эшитган одам албатта, ўқитган устозига раҳмат, дейди. Бу бежиз эмас. Ҳамманинг ҳам ҳаётида эришаётган ютуқларида мактаб таълимининг ўзига хос ўрни борлиги табиий. Бунинг устига ўқитувчи юксак одоб-ахлоқи, юксак маънавияти, кенг дунёқараши ва меҳр-оқибати билан ҳам ўқувчиларга ўрнак бўла олса, унинг ўргатган билимларининг қадри янада юксалади.
Ҳа, ўқитувчилик шарафли ва айни пайтда масъулиятли касб. Ҳаётини ана шундай фидойиликка бахшида этаётган барча касбдошларимни 1 октябрь – Ўқитувчилар ва мураббийлар куни билан табриклайман.
Наргиза МАТЛАТИПОВА,
15-сонли умумтаълим мактаби директорининг маънавий-маърифий ишлар бўйича ўринбосари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
