ЯХШИЛАР ЁДИ ЗАВОЛ БИЛМАЙДИ

Яхши инсонларнинг умри тугамайди, балки қалбларга, хотираларга кўчади. Бутун умрини халқ хизматига, санъатга бахшида этган бетакрор созанда, зарб усуллари устаси, жонкуяр устоз Ражаббой Бобожоновнинг ҳаёти бунга мисол бўла олади.

У умр бўйи Республикамиздан ташқари Хоразм вилояти, Туркманистон Республикаси санъат шинавандаларини ўз сози, ёқимли овози билан баҳраманд этиб яшади, зарбли чолғуларни энг нозик пардада, инсон руҳиятидаги мудроқ туйғуларни ҳам жунбушга келтира оладиган даражада чалиб, бу борада ўзига хос мактаб яратган инсон.

Устоз санъаткор Манғит шаҳрининг ҳозирги Навоий маҳалласида 1927 йилда дунёга келган. Ўрта мактабни тугатгач, аввал ҳайдовчилик қилган, санъат соҳасидаги фаолияти 1965 йилдан бошланган. Дастлаб, Маданият уйида ходим, сўнг “Учқун” ашула ва рақс дастаси раҳбари лавозимида ишлаган. Бозоргул Шеримбетова билан турмуш қуриб, 9 нафар фарзандни илмли, касб-ҳунарли қилишган.

От изини той босар, деганларидек, ўғли Ҳамза Бобожонов ота касбининг давомчиси сифатида 9-сонли БМСМда мусиқа ўқитувчиси бўлиб ишлаб, нафақага чиқди. Невараси Ўткирбек Бобожонов эса айни шу мактабда ҳозир ёшларга санъат сирларини ўргатмоқда.

Ражаббой Бобожоновнинг фаолиятини беқиёс истеъдод соҳиби, халқимиз қалбида ўз қўшиқлари билан ўчмас из қолдирган Назир Раҳимов ва созанда Усмон Аҳмедов фаолиятидан айро тасаввур этиш қийин. Улар учови гўё бир бутун эди, чарчашни, хизматини миннат қилишни ё хизматига ҳақ айтишни билишмасди.

Ражаббой Бобожонов “Учқун” ашула ва рақс дастасига раҳбарлик қилиш баробарида, Назир Раҳимовнинг доирачиси, қўшиқларини энг авж пардага кўтаришда жўровоз ҳамкори эди.

Ўтган асрнинг 70 йилларида Назир Раҳимов, Ражаббой Бобожонов, Усмон Аҳмедовларнинг туманда оёғи тегмаган ҳудуд йўқ, деган гап юрарди. Чиндан-да, бу ҳокисор инсонлар чорлаганнинг тўйида, концертларда элга хизмат қилишдан чарчамаган, шинавандаларининг кўнглини олишни ўзларига улкан бахт деб билишган.

Яқинда туман Маданият бўлими томошалар залида беназир устоз санъаткор Ражаббой Бобожоновнинг хотира кечаси ўтказилди.

Аввало шу ўринда туман Маданият бўлими маъмуриятининг соҳа ривожига улкан ҳисса қўшиб, ҳаётда ўзидан улкан маънавий сабоқ қолдирган инсонларни хотирлаб, уларнинг собиқ касбдошлари, оила аъзолари, дўстлари иштирокида ана шундай тадбирларни ўтказиб келаётгани эътиборга лойиқ эканлигини айтиш жоиз. Бу санъат соҳасини танлаган ёшлар учун санъатнинг, санъаткорнинг қадр-қимматини чуқур англашлари учун ибрат десак, хато бўлмас.

Ражаббой Бобожоновнинг ҳаёти ва ижодий фаолиятига бағишланган хотира кечасида фарзандлари, соҳа ходимларидан ташқари, туманимизнинг жамоат ташкилотларидан вакиллар, санъаткорнинг куй-қўшиқларини ҳурмат-эҳтиром билан эслайдиган мухлислари, дўстлари, шогирдлари иштирок этдилар.

Улкан анжуман тусини олган хотира кечасида сўз олган илк шогирдларидан бири, Қорақалпоғистонда хизмат кўрсатган маданият ходими Гулмирза Нурматов Ражаббой Бобожоновнинг туманимиз санъати ривожига қўшган ҳиссасини, элга қилган хизматларини сўз билан ифодалаш қийин, деб таъкидлади.

- Бир воқеани айтай, кеч кузакда, тонгда армиядан келдим. Ҳадемай хабар топиб, Назир ака Раҳимов, Ражаббой ака Бобожонов, Усмон ака Аҳмедовлар уйимизга кириб келишди. Ота-онамга “Кўз ойдин” айтиб, озгина ўтиришди-да, отамга қараб Ражаббой ака:

- Куз охирлаяпти, ҳали туманнинг пахта режаси бажарилишига анча бор. Колхозчиларга ҳормасинга кетаётган эдик, ўғлингизни ҳам олиб кетсак, - деди. Отам бизни дуо қилиб қолдилар.

Шу куни неча хўжаликларда, дала бошида неча жойда концерт қўйдик, эсимда йўқ, эсимда бори - қоронғи тушиб, юлдузлар чарақлаб турган вақтда уйга қайтдик. Келсам, мени кўргани келган қариндошларим, дўстларим тарқалишиб бўлишган экан. Мен ана шундай ҳокисор устозлар етовида юриб, соҳага ҳисса қўшганимдан жуда бахтиёр ҳисоблайман ўзимни.

Тадбирда кўнгил қатларидаги хотиралар тилга олинди. Шогирдларнинг дил эҳтироми акс этган қўшиқлари даврага ўзгача руҳ бағишлади. Айниқса, Ражаббой Бобожоновнинг ўғли, Ҳамза Бобожоновнинг ижросидаги қўшиқларни йиғилганлар мириқиб тингладилар.

Хотира! Кўнгилларимизга кўчган яхшилар ёдини ана шундай ном билан атаймиз, эслаймиз, соғинамиз.

Ҳа, ибратли умр соҳиби Ражаббой Бобожонов ҳам кўнгилларимизда барҳаёт.

Ойгул РАЖАБОВА.