Пахтадан юқори ҳосил олган фермерларга ИМТИЁЗЛАР БЕРИЛДИ

2013 йил 26 сентябрь куни Ўзбекистон Республикаси Қишлоқ ва сув хўжалиги вазирлиги, Молия вазирлиги ва Иқтисодиёт вазирлигининг қўшма қарори билан "Пахта хом-ашёсини етиштиришда юқори ҳосилдорликка эришган фермер хўжаликларини рағбатлантириш тартиби тўғрисида” низом тасдиқланди.

Мазкур низомга асосан ҳисобот йилида пахта хом ашёсини етиштиришда камида 20 гектар майдонда 40 ц/га дан ҳосилдорликка эришган фермер хўжаликлари юқори ҳосилдорликка эришган фермер хўжаликлари ҳисобланиб, улар бир йил давомида қуйидаги имтиёзлардан фойдаланишлари мумкин:

а) фермер хўжалигининг пахта экиладиган жами ер майдонининг камида 5 фоизига Қонун ҳужжатлари билан таъқиқланмаган бошқа турдаги қишлоқ хўжалиги экинларини экиш.

б) Қонун ҳужжатлари билан таъқиқланмаган бошқа турдаги қишлоқ хўжалиги экинларини экиш учун ажратилган ер майдонларида агротехник тадбирларни амалга ошириш учун таъминотчи ташкилотлар билан тўғридан-тўғри шартнома тузиш орқали мазкур ер майдонининг ҳар бир гектарига экилган экин тури учун амалдаги технологик карталарда тавсия этилган меъёрлар бўйича дизель ёқилғиси ва минерал ўғитларни Ўзбекистон Республикаси Молия вазирлиги томонидан декларация қилинган нархларда (таъминотчи устамаси билан) олдиндан 100 фоиз тўловни амалга оширган ҳолда тегишли шохобчалар орқали харид қилиш.

в) туман (шаҳар) ҳокимлиги заҳирасидаги ер майдонлари бўйича ўтказиладиган танловларда фермер хўжалигига 10 баллгача тақдим этиш. Бунда фермер хўжалиги томонидан ҳисобот даврида камида 20 гектар бўлган майдонда юқори ҳосилдорликка эришилганда 2 балл, юқори ҳосилдорликка эришилган майдон ҳар 10 гектарга кўпайганда қўшимча 1 баллдан, 100 гектар ва ундан ортиқ майдонда юқори ҳосилдорликка эришилганда 10 балл тақдим этилади.

г) қишлоқ хўжалиги техникаларини харид қилиш учун тижорат банклари томонидан имтиёзли кредитлар бериш;

д) фермер хўжалигига Ўзбекистон Республикасида ишлаб чиқарилган енгил автотранспорт воситаларидан («Женерал Моторс Ўзбекистон» ЁАЖ маҳсулоти) хоҳлаган битта моделини фермер хўжалигининг асосий талаб қилиб олгунча депозит ҳисобварағидан пул маблағларини ўтказиш йўли билан навбатсиз харид килиш.

е) қишлоқ жойларида қурилаётган намунавий уй-жойлардан бирини навбатсиз харид қилиш.

ж) суперэлита, элита ва кейинги авлодларга мансуб уруғлик пахта етказиб бериш ҳуқуқига эга бўлиш учун хўжаликлар ўртасида ўтказиладиган танловда барча шартлар бўйича тенг балл тўпланган ҳолларда юқори ҳосилдорликка эришган фермер хўжаликлари имтиёзга эга бўладилар.

Айтиш керакки, муҳтарам Юртбошимизнинг "Фермер бой бўлса — мамлакат обод бўлади” деган сўзлари бугун ҳаётий ҳақиқатга айланмоқда. Юқоридаги низом билан илғор фермерларга берилган имтиёзлар ҳам келгусида қишлоқ мулкдорларининг сидқидилдан, фидойилик билан меҳнат қилиб, мамлакат ободлигига ҳисса қўшишдек хайрли ишларига рағбат бўлади.

Анвар ЙЎЛДОШЕВ,

халқ депутатлари туман Кенгаши депутати, туман Қишлоқ ва сув хўжалиги бўлими бошлиғи.