ЎҚУВЧИЛАР ЮТУҒИ УСТОЗ УЧУН ЭНГ КАТТА МУКОФОТ

Қангли овулида деҳқон оиласида туғилган Саида мактабда синфдошлари орасида аъло баҳоларга ўқиши, тиришқоқлиги билан ажралиб турарди. Унинг, айниқса, биология фанига қизиқиши баланд эди. Атрофни қуршаб олган мўъжизакор табиат сирларини биология ўқитувчисидан қунт билан ўргана бошлади. Юқори синфларга ўтгани сайин унда устозлари каби ўқитувчи бўлиб, ўзи каби қизиқувчиларни она табиатнинг мўъжизакор дунёсига олиб кириш истаги кучая борди. Бу истак Саидани Тошкент давлат педагогика институти (ҳозирги университет)га етаклади ва у талаба бўлди.

Олийгоҳни 1997 йилда тугатган Саида Муродбоева овулга келиб 39-сонли мактабда иш бошлади. Дилида эзгу орзу-ният билан ўз фаолиятини бошлаган ёш ўқитувчи ўқувчиларни илм дунёсига етаклади. Ёш, интилувчан ва талабчан бу ўқитувчи тезда ўқувчиларнинг ҳам, касбдошларининг ҳам меҳрини қозонди. Ўқувчиларга фанни назарий тушунтириш билан бирга, очиқ табиатга саёҳатга олиб чиқиб, амалда ҳам кўрсатиб, тасаввурларини бойитди ва қизиқишларини оширди. Қизиқувчи ўқувчилар иштирокида турли тадбир ва танловлар ўтказди. Билимлар беллашуви, фан олимпиадаларида ундан таълим олган ўқувчилар фахрли ўринларни эгаллаб, олдингилар қаторига чиқди.

Унинг фидойиликлари муносиб баҳоланиб, туман Халқ таълими бўлими томонидан у ишлаётган 39-мактаб “Энг фидойи фан ўқитувчиси мавжуд мактаб” деб топилди. Саида илк бор ўқувчиси Азиза Йўлдошева 2014-2015 ўқув йилида Билимлар беллашувининг туман босқичи 1-ўрин ғолиби бўлганида меҳнати маҳсул бера бошлаганидан ғоят севинди. Азиза Йўлдошева шу йил беллашувнинг Қорақалпоғистон Республикаси босқичида 3-ўринни эгаллади ва устозининг ишончини оқлади. Фан билимдонларига таълим берган Саида Муродбоева эса Қорақалпоғистон Республикаси Халқ таълими вазирлигининг ва туман ҳокимлигининг “Фахрий ёрлиғи” билан тақдирланди.

2015-2016 ўқув йилидаги Билимлар беллашувида Саиданинг икки нафар ўқувчиси Ёдгорбек Бозорбоев, Зилола Бегжоновалар ўз билимларини синаб кўришди ҳамда улар беллашувнинг туман босқичида 2-ўрин ғолиблигига эга бўлдилар.

Изланувчан, талабчан бу ўқитувчи мактаб жамоаси ва раҳбарият томонидан рағбатлантиришга лойиқ деб топилди ва у 2016 йилнинг 15 сентябрида “Ўзбекистон Республикаси Халқ таълими аълочиси” кўкрак нишони билан тақдирланди.

Ўтган ўқув йилида унинг билимдон ўқувчиларидан Ёдгорбек Бозорбоев Инновацион олимпиаданинг Қорақалпоғистон босқичида 2-ўрин, Билимлар беллашувининг туман босқичида 1-ўрин, шунингдек, Мавлуда Шомуродова ҳам беллашувнинг туман босқичида 1-ўрин, Динора Бозорбоева эса 3-ўрин ғолиблигини қўлга киритдилар.

– Президентимиз ташаббуси билан ўқитувчилар нуфузини ошириш, уларнинг меҳнатини муносиб рағбатлантиришга алоҳида эътибор қаратилмоқда, –дейди С.Муродбоева. – Бу биз ўқитувчиларга янги ўқув йили бошланиши арафасида ниҳоятда кўтаринки руҳ бағишлади. Биз ҳам ўз навбатида баркамол авлодга таълим ва тарбия бериш борасидаги масъулиятимизни янада ошириб, уларни комил инсонлар қилиб вояга етказишга сидқидилдан ҳаракат қилмоқдамиз.

– Мактабимизда намуна қилиб кўрсатса арзийдиган, фидойи ва фаол ўқитувчилар кўп, – дейди фахр билан мактаб директори С.Худенов. – Айниқса, Саиданинг жонкуярлиги, таълим-тарбия ва жамоат ишларидаги фаоллиги барчага ўрнак бўлмоқда.

Фидойи устоз Саида Муродбоева турмуш ўртоғи Ўринбой Мадиёров билан 4 нафар фарзандни тарбиялаб, вояга етказишмоқда. Ота-оналаридан ибрат ва тарбия олиб камолга етаётган фарзандларнинг ҳар бири мактабнинг аълочи ўқувчилари сафида.

Устозларни ҳамиша эҳтиромга, юксак мукофотларга лойиқ деб биламиз. Аммо давлат томонидан кўрсатилаётган эътибор ва шогирдлари эҳтиромига сазовор бўлаётган ўқитувчи Саида Муродбоева каби фидойи устозлар учун ўқувчилар қўлга киритаётган ютуқлар ва муваффақиятлар, уларнинг камоли энг катта мукофотдир.

О.Худойберганова.