Ўзбекистон Республикаси Конституциясининг 21 йиллиги олдидан
Ўзбекистон Республикасининг фуқаролари жамият ва давлат ишларини бошқаришда бевосита ҳамда ўз вакиллари орқали иштирок этиш ҳуқуқига эгадирлар. Бундай иштирок этиш ўзини ўзи бошқариш, референдумлар ўтказиш ва давлат органларини демократик тарзда ташкил этиш йўли билан амалга оширилади.
Ўзбекистон Республикаси Конституциясининг 32-моддаси.
Ҳамжиҳатликда иш олиб бораяпмиз
"Дурунки” маҳалласи шаҳримизнинг жанубий қисмида жойлашган бўлиб, бир томони Туркманистон давлати билан, бир томони "Юсуфхўжа” аҳоли пункти билан туташган. Аҳолиси кўп миллатли бўлсада, ўзаро тинч-тотув яшашади. Биз албатта иш юритишда маҳалламизда яшаётган кўпни кўрган, ҳаёт тажрибасига эга отахон-онахонлар, ўз қўни-қўшниларига ҳаёт тарзи билан ибрат бўлаётган оила бошлиқлари ва маҳалланинг фаол аъзолари билан ҳамкорлик қиламиз.
"Обод турмуш йили” Давлат дас-турига асосан маҳалламизда кенг кўламли ишлар олиб борилди.
Манғит-Қиличбой гузар йўлининг икки томони кўкаламзорлаштирилди, зовурлар атрофи тозаланиб, ҳар хил манзарали дарахтлар экилди. Ҳар бир кўча, уй атрофи тартибга келтирилди. Кўчаларнинг икки томонида қуриган дарахтлар кесилиб, ўрнига янги манзарали кўчатлар экилди.
Маҳалламиз ҳудудидаги 2 та мактаб, 2 та болалар боғчаси теварак атрофи ободонлаштирилди.
Йил бошидан бери муҳим саналар муносабати билан турли байрам тадбирлари ўтказилиб, уларда маҳалла аҳлининг кенг иштироки таъминланди. Тадбирларда "Энг намунали оила”, "Энг намунали қайнона”, "Энг намунали келин”, "Энг тадбиркор оила” номинациялари бўйича ғолиблар аниқланиб, мукофотлар ўз эгаларига топширилди.
"Маҳалланинг энг зиёли оиласи” деб эътироф этилган Собир Сафарбоев ва Гулора Бекимбетовалар оилалари барчага ибрат бўлаяпти.
Албатта ҳаёт бир текис кечмайди. Турмушнинг паст-баланди ҳамма жойда бўлгани каби маҳалламиздаги оилаларда ҳам баъзан муаммолар юзага келиб туради. Лекин бу муаммолар маҳалладан ташқари олиб чиқилмай, шу ерда ҳал қилинади, ҳамжиҳатлик билан иш юритишимиз натижасида аразлаган оила аъзолари яраштирилди.
Маҳалла фаоллари ишсизлик масаласида ҳам иш олиб боради. Маҳалла ҳудудида жойлашган "Манғит ипак” пиллахонаси ҳар йили ёз мавсумида 100 нафар маҳалла ёшларини, оила бекаларини иш билан таъминлайди.
Бир сўз билан айтганда, бизнинг "Дурунки” маҳалламиз аҳли оила фаровонлигини ошириш учун дадил саъй-ҳаракатлар олиб бориб, самарали натижаларга эришмоқдалар.
Гавҳар МИНГБОЕВА,
"Дурунки” маҳалласининг диний маърифат ва маънавий-ахлоқий тарбия масалалари бўйича маслаҳатчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
