Виждон эркинлиги кафолати

Ҳамма учун виждон эркинлиги кафолатланади. Ҳар бир инсон хоҳлаган динга эътиқод қилиш ёки ҳеч қайси динга эътиқод қилмаслик ҳуқуқига эга.

Ўзбекистон Республикаси Конституциясининг

31-моддасидан.

Виждон эркинлиги кафолати

Она диёримизда яшовчи барча халқлар ҳаётида муҳим воқеа бўлган Асосий Қомусимизнинг қабул қилинганига 21 йил тўлишини нишонлаш арафасида турибмиз. Маълумки, асосий Қомусимизда инсон омилининг, инсон ҳуқуқи, шаъни ва қадр-қимматининг энг олий қадрият, деб белгилаб қўйилгани бугунги кунда юртимизда амалга ошрилаётган кенг миқёсли ислоҳотлар туфайли ўз исботини топмоқда. Унга асосан олиб борилаётган фаолият ва саъй-ҳаракат ўзининг ижобий натижаларини бермоқда.

Асосий Қомусимизда жинси, миллати, дини, ирқи, ёши, эътиқоди, ижтимоий келиб чиқишидан қатъий назар инсон ҳуқуқларини муайян даражада камситадиган бирорта ҳам модданинг йўқлиги мамлакатимиз фуқароларининг дин-у эътиқодда эркинлигидан яққол далолатдир.Бу – аждодларимиздан мерос бўлиб келаётган миллий қадриятларимиз ва бебаҳо анъаналаримизнинг Бош Қомусимизда беқиёс ўрни борлигини билдиради. Минг йилликлар давомида аждодлардан авлодларга, ота-оналардан фарзандларга, ворисларга ўтиб келаётган ва дунёнинг ҳеч бир бурчагида такрорланмайдиган ажойиб муносабатларнинг, инсоний фазилатларнинг Асосий Қомусимиздан ўрин эгаллагани таҳсинга сазовор.

Диёримизнинг барча ҳудудларида истиқомат қилувчи мўмин-мусулмонлар ушбу Қомусда белгилаб қўйилган ҳуқуқ ва эркинликлардан кенг ва тенг, бемалол фойдаланмоқдалар.

Маълумки, Ўзбекистон Республикасининг Конституцияси умумхалқ муҳокамасидан ўтгандан кейин 1992 йил 8 декабрь куни қабул қилинди. Мазкур ҳужжатнинг қабул қилиниши мустақил давлатимизнинг давлатчилик тарихида буюк воқеа бўлди. Унга биноан 1998 йил 1 майда қабул қилинган янги таҳрирдаги "Виждон эркинлиги ва диний ташкилотлар тўғрисида”ги Қонунга асосан диний ташкилотларнинг ҳуқуқий мақоми белгилаб берилди. Мазкур Қонуннинг 5-моддаси эътиқод софлиги, диний бағрикенгликка асослангандир.

Мустақил она диёримизда яшовчи барча миллат вакилларининг урф-одат, анъана ва қадриятлари ҳуқуқ ва эркинликлари кафолатланган Асосий Қомусимизда инсон ҳуқуқлари, бурч ва вазифалари каби виждон эркинлиги ҳам алоҳида белгилаб қўйилган. Асосий Қомусимизнинг 31-моддасида "Ҳамма учун виждон эркинлиги кафолатланади. Ҳар бир инсон хоҳлаган динга эътиқод қилиш ёки ҳеч қайси динга эътиқод қилмаслик ҳуқуқига эга. Диний қарашларни мажбуран сингдиришга йўл қўйилмайди” – деб алоҳида таъкидланган. Диёримизда амалдаги қонунлар асосида турли динларга эътиқод қилувчи ва уларга эътиқод қилмайдиган фуқаролар, ҳар хил эътиқодларга мансуб диний ташкилотлар ўртасида ўзаро муроса ва ҳурмат ўрнатилиши таъ-минланган.

Муборак ислом дини қадриятлари бой ва буюк маънавиятимиз асоси эканлигини эътироф этиб, Юртбошимиз бундай деганлар: "Биз миллатимизни мана шу муқаддас диндан айри ҳолда тасаввур қила олмаймиз. Диний кадриятлар, исломий тушунчалар ҳаётимизга шу қадар сингиб кетганки, уларсиз биз ўзлигимизни йўқотамиз”.

Миллий Қомусимиз моддаларида нафақат халқчил тамойиллар, балки минг йиллар давомида ривожланиб келган миллий маънавиятимиз асослари ўз ифодасини топганлиги боисидан барчамиз учун қадрлидир.

Р.Ҳабибуллаев,

"Ҳожи Эшон бобо” жомеъ масжиди имом-хатиби, Қипчоқ қишлоғи.