Шундай оила бор...
"Оқ олтин” овулида истиқомат қилувчи Хўжановлар оиласи ўзларининг меҳмондўстлиги, бағрикенглиги билан элу юртнинг назарига тушишган. Хонадон соҳибаси Тўлғоной опа Худойбергенова ўн бармоғи ҳунарли аёллардан. Турмуш ўртоғи Отамурод Хўжанов билан йигирма беш йилдан бери бир оила бўлиб аҳил турмуш кечириб, уч нафар фарзандни оқ ювиб, оқ тараб вояга етказган.
Тўлғоной опа ҳозирги кунда икки келиннинг суюкли қайнонаси, ҳаёт мактабида кўп ютуқларга эришган, юзларидан нур ёғилиб турган Гулжон момонинг эса суюкли келини, файзли, обод оила бекаси.
Отамурод Хўжанов кўп йиллар собиқ Тургенев номли мактабда ишлаган, ҳозирда эса деҳқон ва чорвадор. Тўлғоной опа ўсимликларни ҳимоя қилиш станциясида, биолабораторияда ишлади. Ҳозирданафақада бўлишига қарамай ҳунармандчилик билан шуғулланади. Опанинг қўлидан чиққан қуроқ ёстиқ, кўрпачаларнинг ўзи нақ санъат асарига менгзайди. Чиройли нимчадан тортиб, замонавий кийим-кечакларгача тўқийди. Уларнинг хонадони бўсағасидан ҳатлар экансиз, оёғингиз остидаги гиламлар кўзингизни қувонтиради. Бир қарашда бозордаги қиммат гиламлардан бўлса керак деб ўйлашингиз мумкин. Аслида эса булар опанинг ўзи тўқиган ижод намуналаридир. У гиламдўзлик билан ҳам шуғулланади ва кўплаб шогирдлари ҳам бор. Унинг истеъдодли шогирдларидан Ойпора, Муяссар, Турсуной, Санамжон, Гулбаҳор, Ҳалималар ҳам моҳир гиламдўз бўлиб қолишган. Опа учун ҳунар - туганмас бойлик. Уни ёшларга бошқаларга ўхшаб фалон сўм эвазига эмас, шунчаки қизиқишларига қараб ўргатади. Шогирдларининг ҳеч биридан ҳеч нарса олмайди. Сидқидилдан ўргатади. "Ҳар бир ишда шогирд қолиш керак, шогирд бўлганда ҳам устоздан ўтадиган шогирд” қабилида иш тутади. Ўғиллари ҳам уста, ҳунарманд, спортчи. Кичик ўғли Мансур Нукус олимпия заҳиралари спорт коллежида ўқиб юрган кезларида спортнинг сузиш тури бўйича Республика биринчилигида қатнашиб учинчи ўринни эгаллади. Тўлғоной опа яна бўш вақтларида ширинликлар, тортлар ҳам пиширади.
- Бу ишлардан ортиб дам ололма-сангиз керак-а, - деб сўраганимда:
- Менинг мана шу қуроқ тикиб, гиламларни тўқиганим дам олганимда,- деб кулиб қўйди. Мана шундай жонкуяр, фидойи аёллар кўпаяётганлигидан суюндим. Ҳунармандчилик ишларидан ортиб вақт топиб деҳқончилик ва боғдорчилик ишларида турмуш ўртоғига ёрдам беради. Уларнинг ҳовлисидаги томорқа ерида мевали дарахтлар кўп. Айниқса, олма.
Тўлғоной опада ҳавас қилса арзигулик хислатлар кўп. Меҳрибон, бағрикенг, келинларини ҳам худди ўз қизларидек яхши кўради. Ҳовлисига киришингиз билан тозаликка, орасталикка гувоҳ бўласиз. Ҳовлидан беғубор қишлоқ ҳавосию, обод турмуш нафаси уфуриб туради. Энг муҳими, бу хонадон соҳиб ва соҳибаларининг кўнгиллари ободдир. Ҳар қандай обод турмуш энг аввал, кўнгил ободлигидан бошланади
Азиза МАДРАҲИМОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
