ФУҚАРОЛАРНИНГ ЎЗИНИ-ЎЗИ БОШҚАРИШ ТИЗИМИ: жамоатчилик ва давлат идораларининг ҳамкорликдаги фаолияти

Ҳар тонг ўрнимиздан туриб эшигимизни очсак, кўзимиз қўшниларимизга тушади. Улар билан саломлашиб, омонлик сўрашиб, кўнглимиз хотиржам бўлади. Чунки қўшниларимиз тинч бўлса, қўшниларимиздан, яқинларимиздан таркиб топган маҳалламиз тинч бўлса, ўзимиз ҳам тинч бўламиз. Демак, ҳар биримизнинг турмушимиз ўзимиз яшаётган маҳалла билан чамбарчас боғлиқ.

Аҳолининг тинч-тотув яшашига эришишда, соғлом фарзандларнинг дунёга келиши ва шиддатли замонамизга мос интеллектуал салоҳиятли, она юртига фидойи бўлиб улғайишида, оилалардаги баъзи бир муаммоларнинг ижобий ҳал этилишида маҳаллаларнинг ўрни беқиёсдир. Халқимизнинг  турмуши сифатини янада яхшилаш мақсадида маҳалла, овул фуқаролар йиғинлари фаолияти тубдан янгиланиб, ўзини-ўзи бошқариш соҳасида такомиллаштирилган тизимлар жорий этилмоқда.

Маҳалла, овул фуқаролар йиғинлари фаолиятига татбиқ этилган жамоатчилик ва давлат идораларининг ҳамкорликдаги фаолият тизими ҳам шулар жумласидандир.

Яқинда Манғит шаҳридаги Беруний  маҳалласида мазкур тизимга бағишланган кўргазмали семинар бўлиб ўтди.

Кўргазмали семинарга туман ҳокими биринчи ўринбосари Ф.Саъдуллаев, туман ҳокими ўринбосари, хотин-қизлар қўмитаси раиси М.Аҳмедова, "Маҳалла” хайрия жамоат фонди туман бўлинмаси  раиси Р.Рўзметов, туман тиббиёт бирлашмаси бошлиғи О.Ҳалимов, Манғит шаҳридаги маҳаллалар оқсоқоллари, диний маърифат ва маънавий ахлоқий тарбия масалалари бўйича маслаҳатчилари, посбонлари ва оммавий ахборот воситалари ходимлари иштирок этдилар.

Иштирокчилар дастлаб маҳаллада ташкил этилган "Маслаҳат маркази” ва "Ораста қизлар давраси” фаолиятидан ҳикоя қилувчи кўргазмалар билан танишдилар.

Кўргазмали семинарда туман  ҳокими ўринбосари, хотин-қизлар қўмитаси раиси М.Аҳмедованинг янги тизим хусусидаги тақдимоти тингланди. Мазкур тизимда маҳалла, овул фуқаролар йиғинларида бешта сектор - "Оилага кириш сектори”, "Жиноятчилик профилактикаси сектори”, "Бандлик сектори”, "Саломатлик сектори”, "Таълим ва тарбия сектори” белгиланган режа асосида фаолият юритади. Бу секторларга ҳудуддаги давлат ва жамоат ташкилотлари раҳбарлари ва ходимлари етакчилик қиладилар ва ҳамкорликда иш олиб борадилар. Ҳар бир сектор ўз тузилишига, вазифаларига эгадир. Масалан, "Саломатлик сектори” аъзолари соғлом турмуш тарзини шакллантиришда маҳаллада ҳафта кунларини тақсимлаш схемасини ишлаб чиқиб, бошқа секторлар билан ҳамкорликда иш олиб боради. Мазкур схемага мувофиқ ҳафтанинг душанбаси нуронийлар куни, дея белгиланган бўлиб,  сектор аъзолари бу куни ҳудуддаги кекса ва нуронийлардан хабар олишиб, касалликлар профилактикаси, дори-дармонлардан оқилона фойдаланиш ва хонадоннинг саранжом-саришта, озодалигида кексаларнинг йўл-йўриқлари хусусида суҳбатлашади. Сешанба - ҳомиладорлар кунида ҳудуддаги ҳомиладор аёллар билан ҳомиладорлик давридаги зарур қоидалар, бехатар оналик каби мавзуларда суҳбатлар уюштиради ва муаммолари бўлса, ҳамкорликда чоралар кўради. Чоршанба – болалар ва ўсмирлар куни муносабати билан ҳудуддаги болалар ва ўспиринлар билан шахсий гигиена, зарарли одатлардан сақланиш, эрта ва қариндошлар ўртасидаги никоҳларнинг салбий оқибатлари хусусида суҳбатлар ўтказади. Пайшанба эса хонадон ва экология масалаларига бағишланади. Жума - аёллар ва қизлар куни деб белгиланганлиги муносабати билан оилада санитария ҳолатининг  яхшиланишида бекаларнинг роли, қизларни мустақил ҳаётга ва оилага тайёрлаш, соғлом турмуш тарзи афзалликлари хусусида суҳбатлар ўтказиш белгиланган. Шанба – ўқув муассасалари кунида эса маҳалладаги ўқув муассасаларига ташриф буюриб, ўқувчиларда гигиеник саломатликни шакллантириш, спорт билан дўстлашишнинг фойдаси, ичиш-чекиш  каби зарарли одатлардан сақланиш каби мавзуларда суҳбатлар ўтказади.

Маҳаллада ташкил этилган бешта сектор раҳбарларининг ўз фаолиятлари тақдимотидан сўнг жорий этилган тизим хусусида фикр алмашувлар, таклиф-мулоҳазалар билдирилди. Туман ҳокими биринчи ўринбосари Ф.Саъдуллаев, хотин-қизлар қўмитаси раиси М.Аҳмедова, "Маҳалла” хайрия жамоат фонди туман бўлинмаси раиси Р.Рўзметовлар маҳалла, овул фуқаролар йиғинлари фаолиятига жорий этилган тизим  афзалликлари ва уни амалга оширишдаги вазифаларга кенг тўхталдилар.

Кўргазмали семинарда муҳокама этилган масалалар юзасидан қарор қабул қилинди.

О.РАЖАБОВА,

журналист.