FUQAROLARNING OʻZINI-OʻZI BOShQARISh TIZIMI: jamoatchilik va davlat idoralarining hamkorlikdagi faoliyati

Har tong oʻrnimizdan turib eshigimizni ochsak, koʻzimiz qoʻshnilarimizga tushadi. Ular bilan salomlashib, omonlik soʻrashib, koʻnglimiz xotirjam boʻladi. Chunki qoʻshnilarimiz tinch boʻlsa, qoʻshnilarimizdan, yaqinlarimizdan tarkib topgan mahallamiz tinch boʻlsa, oʻzimiz ham tinch boʻlamiz. Demak, har birimizning turmushimiz oʻzimiz yashayotgan mahalla bilan chambarchas bogʻliq.

Aholining tinch-totuv yashashiga erishishda, sogʻlom farzandlarning dunyoga kelishi va shiddatli zamonamizga mos intellektual salohiyatli, ona yurtiga fidoyi boʻlib ulgʻayishida, oilalardagi baʼzi bir muammolarning ijobiy hal etilishida mahallalarning oʻrni beqiyosdir. Xalqimizning  turmushi sifatini yanada yaxshilash maqsadida mahalla, ovul fuqarolar yigʻinlari faoliyati tubdan yangilanib, oʻzini-oʻzi boshqarish sohasida takomillashtirilgan tizimlar joriy etilmoqda.

Mahalla, ovul fuqarolar yigʻinlari faoliyatiga tatbiq etilgan jamoatchilik va davlat idoralarining hamkorlikdagi faoliyat tizimi ham shular jumlasidandir.

Yaqinda Mangʻit shahridagi Beruniy  mahallasida mazkur tizimga bagʻishlangan koʻrgazmali seminar boʻlib oʻtdi.

Koʻrgazmali seminarga tuman hokimi birinchi oʻrinbosari F.Saʼdullayev, tuman hokimi oʻrinbosari, xotin-qizlar qoʻmitasi raisi M.Ahmedova, "Mahalla” xayriya jamoat fondi tuman boʻlinmasi  raisi R.Roʻzmetov, tuman tibbiyot birlashmasi boshligʻi O.Halimov, Mangʻit shahridagi mahallalar oqsoqollari, diniy maʼrifat va maʼnaviy axloqiy tarbiya masalalari boʻyicha maslahatchilari, posbonlari va ommaviy axborot vositalari xodimlari ishtirok etdilar.

Ishtirokchilar dastlab mahallada tashkil etilgan "Maslahat markazi” va "Orasta qizlar davrasi” faoliyatidan hikoya qiluvchi koʻrgazmalar bilan tanishdilar.

Koʻrgazmali seminarda tuman  hokimi oʻrinbosari, xotin-qizlar qoʻmitasi raisi M.Ahmedovaning yangi tizim xususidagi taqdimoti tinglandi. Mazkur tizimda mahalla, ovul fuqarolar yigʻinlarida beshta sektor - "Oilaga kirish sektori”, "Jinoyatchilik profilaktikasi sektori”, "Bandlik sektori”, "Salomatlik sektori”, "Taʼlim va tarbiya sektori” belgilangan reja asosida faoliyat yuritadi. Bu sektorlarga hududdagi davlat va jamoat tashkilotlari rahbarlari va xodimlari yetakchilik qiladilar va hamkorlikda ish olib boradilar. Har bir sektor oʻz tuzilishiga, vazifalariga egadir. Masalan, "Salomatlik sektori” aʼzolari sogʻlom turmush tarzini shakllantirishda mahallada hafta kunlarini taqsimlash sxemasini ishlab chiqib, boshqa sektorlar bilan hamkorlikda ish olib boradi. Mazkur sxemaga muvofiq haftaning dushanbasi nuroniylar kuni, deya belgilangan boʻlib,  sektor aʼzolari bu kuni hududdagi keksa va nuroniylardan xabar olishib, kasalliklar profilaktikasi, dori-darmonlardan oqilona foydalanish va xonadonning saranjom-sarishta, ozodaligida keksalarning yoʻl-yoʻriqlari xususida suhbatlashadi. Seshanba - homiladorlar kunida hududdagi homilador ayollar bilan homiladorlik davridagi zarur qoidalar, bexatar onalik kabi mavzularda suhbatlar uyushtiradi va muammolari boʻlsa, hamkorlikda choralar koʻradi. Chorshanba – bolalar va oʻsmirlar kuni munosabati bilan hududdagi bolalar va oʻspirinlar bilan shaxsiy gigiyena, zararli odatlardan saqlanish, erta va qarindoshlar oʻrtasidagi nikohlarning salbiy oqibatlari xususida suhbatlar oʻtkazadi. Payshanba esa xonadon va ekologiya masalalariga bagʻishlanadi. Juma - ayollar va qizlar kuni deb belgilanganligi munosabati bilan oilada sanitariya holatining  yaxshilanishida bekalarning roli, qizlarni mustaqil hayotga va oilaga tayyorlash, sogʻlom turmush tarzi afzalliklari xususida suhbatlar oʻtkazish belgilangan. Shanba – oʻquv muassasalari kunida esa mahalladagi oʻquv muassasalariga tashrif buyurib, oʻquvchilarda gigiyenik salomatlikni shakllantirish, sport bilan doʻstlashishning foydasi, ichish-chekish  kabi zararli odatlardan saqlanish kabi mavzularda suhbatlar oʻtkazadi.

Mahallada tashkil etilgan beshta sektor rahbarlarining oʻz faoliyatlari taqdimotidan soʻng joriy etilgan tizim xususida fikr almashuvlar, taklif-mulohazalar bildirildi. Tuman hokimi birinchi oʻrinbosari F.Saʼdullayev, xotin-qizlar qoʻmitasi raisi M.Ahmedova, "Mahalla” xayriya jamoat fondi tuman boʻlinmasi raisi R.Roʻzmetovlar mahalla, ovul fuqarolar yigʻinlari faoliyatiga joriy etilgan tizim  afzalliklari va uni amalga oshirishdagi vazifalarga keng toʻxtaldilar.

Koʻrgazmali seminarda muhokama etilgan masalalar yuzasidan qaror qabul qilindi.

O.RAJABOVA,

jurnalist.