Орзу йўлинг ойдин бўлсин, Қундузой

- Тенгдошларим қандай фикрда, билмадим-у ўқитувчи-устозларимиз, ҳатто ота-оналаримизнинг ҳам тинмай панд-насиҳат қилиб, ўқишга, ҳунар ўрганишга ундашлари ҳар доим ҳам самара беравермайди, - дейди Қундузой, – менимча, илм олишга, ҳунар ўрганишга қизиқиш, аввало ҳар бир одамнинг юрагида туғилади. Ота-она ва устоз ёрдами билан биз уни ривожлантириб, ўзимиз учун севимли машғулотга айлантириб оламиз.

Қундузой ҳали жуда ёш, умум-таълим мактабининг  7-синф ўқувчиси. Лекин у ҳаётга теран боқади, ўта қизиқувчан, мулоҳаза  билан иш юритиб, атрофидагиларни ҳайрон қолдирган ҳолда жиддий хулосалар чиқара олади. Бўш вақтини мазмунли ўтказишни яхши билади у. Бадиий гимнастика билан шуғулланади, китоблар мутолаа қилади, шеърлар ижод этади. 16-сонли ихтисослашган умумтаълим мактабининг инглиз тили синфида ўқийди, "Баркамол авлод” болалар марказининг тўқувчилик тўгараги машғулотларида қатнашади. Интилувчан, аълочи ва фаол бўлган Қундузой тенгдошларидан фарқли ўлароқ, турли хил тадбирлар иштирокчиси ва ғолиби, "Билимлар беллашуви”нинг туман босқичида инглиз тили бўйича фахрли ўрин соҳибаси, спортнинг бадиий гимнастика тури бўйича ўтказилган мусобақаларда энг нафосатли спортчи, "Янги авлод - 2012”болалар ижодиёти фестивали лауреати, "Камалак юлдузлари - 2013” болалар  ижодиёти фестивали Республика босқичи ғолиби сифатида танилган. Ўқишда ва ижоддаги ютуқлари учун "Камолот” ЁИҲ Марказий Кенгашининг махсус сертификат ва Дипломи, Фахрий ёрлиқлари, Қорақалпоғистон Республикаси ҳамда Ўзбекистон Республикаси халқ таълими Вазирликларининг Фахрий ёрлиқлари ҳамда эсдалик совғалари билан тақдирланган. Устозлари раҳбарлигида инглиз тилини қунт билан ўрганаётган Қундузойнинг орзулари бир олам.

- Келажакда туманимиз ижодкорларининг асарларини инглиз тилига таржима қилиб, Амударё туманимиз номини жаҳонга танитиш менинг орзуим, - дейди у.

Биз Қундузойга: "Орзу йўлларинг ойдин бўлсин!”, деймиз.

Робия ЙЎЛДОШЕВА.

Касблар

Касблар кўпдир дунёда,

Бир-биридан зиёда.

Хоҳлаганингни танла,

Олдин уларни сана!

Биз жуда кўп биламиз,

Ҳар ҳил касблар ҳақида.

Бирма-бир танишамиз.

Келинг, инглиз тилида!

Шифокор сўзи "Doctor”,

Дер: "доимо тоза юр”.

"Gardener” эса боғбон,

Боғ яратар бир жаҳон.

"Policeman” тинчликни

Муҳофаза қилувчи.

Ўқитувчи – "teacher”

Тинмасдан ўқинглар дер.

"Builder” эса бинокор,

Бу жуда керакли кор.

Ошпаз бўлади – "cook”

Пиширар мазали "soup”,

"Dressmaker” эса чевар,

Чиройли кўйлак тикар.

"Baker” аталар нонвой,

Ёпади ширин ширмой.

"Farmer” – бу бобо деҳқон,

"Carrot” экади ҳар он.

"Pilot” эса учувчи,

Осмонларни кезувчи.

"Firemen” ўт ўчирувчи,

Ҳамда у қутқарувчи.

"Reporter” эса мухбир,

Буни дилда сақлаб юр!

Ватан

Ҳур  бошида ҳумолар учган,

Осмонини тинчлик, эрк қучган.

Ватанимни севарман жондан,

Токи ўзим ҳаёт эканман,

Адабиёт-кўркам бир гулзор,

Унда бизлар гуллар ғунчаси.

Шу гулзордан оларман илҳом,

Чунки Ватан таним ичра жон.

Қундузой Юсупова.