Баркамол фарзандлар

"Ўрта қалъа” овулидаги "Боғ” маҳалласи ҳудудида яшовчи Ўриновлар оиласини бугунги кунда нафақат аҳил-иноқ, балки соғлом оила сифатида кўпчилик яхши билади.

Оила бошлиғи Давлатбой ака Ўринов умр йўлдоши Жамила опа билан 5 нафар фарзандни тарбиялаб, вояга етказишди. То нафақага чиққунча ички ишлар бўлими ходими лавозимида  ишлаган Давлатбой ака фарзандларининг ҳам ўзи каби Ватан ҳимоячилари бўлишини астойдил ният қилди. Шу ният йўлида 13-сонли умумтаълим ўрта мактабида таҳсил олаётган фарзандларининг таълим-тарбия олиши учун бор имкониятини аямади. Тўнғич фарзанди Давронбек Ўринов 1997 йилда Самарқанд Олий ҳарбий автомобиль-қўмондонлик-муҳандислик билим юрти талабаси бўлиш бахтига мушарраф бўлди. 2001 йилда билим юртини муваффақиятли тамомлаган Давронбек бугунги кунда Марказий ҳарбий округида хизмат қилмоқда, майор.

Акасига ҳавас қилган Нурбекжон 2000 йилда Тошкент Ахборот технологиялари Университетининг махсус факультетини аъло баҳоларга тугатиб, ҳозирга кунда Тошкент ҳарбий округининг ҳарбий қисмларидан бирида хизмат қилмоқда. Унинг ҳарбий даражаси капитан.

Оиланинг учинчи фарзанди Улуғбек ҳам акалари изидан бориб, Ватан ҳимоячиси бўлишдек шарафли касбни танлади. У Нукус шаҳар иқтисодиёт касб-ҳунар коллежини тугатиб, ички ишлар бўлимида ишлаш учун зарур тест синовларидан ва тактик синовлардан муваффақиятли ўтиб, эл-юрт осойишталиги посбонлари сафидан жой олди.

Давлатбой аканинг қизи Нилуфархон НДПИ психология факультетини тугатиб, ўз соҳаси бўйича 21-мактабда фаолият  юритаётган бўлса, оиланинг кенжа фарзанди Азизбек ота-онаси бағрида деҳқончилик ишлари билан машғул.

Биз  ана шундай фарзандларни вояга етказган оила соҳиби Давлатбой ака ва баркамол фарзандлар онаси Жамила  опа Жуманиёзова билан учрашиб, суҳбатлашдик.

- Фарзандларимизнинг Ватан тинчлиги, халқимиз осойишталиги йўлида хизмат қилаётганидан, юртимизнинг ҳарбий зобитлар оиласи учун кўрсатаётган эътибор ва ғамхўрликларидан миннатдормиз, - дейишди улар мамнуният билан.

Азиза Аҳмедова,

13-сонли мактаб ўқитувчиси.