Barkamol farzandlar

"Oʻrta qalʼa” ovulidagi "Bogʻ” mahallasi hududida yashovchi Oʻrinovlar oilasini bugungi kunda nafaqat ahil-inoq, balki sogʻlom oila sifatida koʻpchilik yaxshi biladi.

Oila boshligʻi Davlatboy aka Oʻrinov umr yoʻldoshi Jamila opa bilan 5 nafar farzandni tarbiyalab, voyaga yetkazishdi. To nafaqaga chiqquncha ichki ishlar boʻlimi xodimi lavozimida  ishlagan Davlatboy aka farzandlarining ham oʻzi kabi Vatan himoyachilari boʻlishini astoydil niyat qildi. Shu niyat yoʻlida 13-sonli umumtaʼlim oʻrta maktabida tahsil olayotgan farzandlarining taʼlim-tarbiya olishi uchun bor imkoniyatini ayamadi. Toʻngʻich farzandi Davronbek Oʻrinov 1997-yilda Samarqand Oliy harbiy avtomobil-qoʻmondonlik-muhandislik bilim yurti talabasi boʻlish baxtiga musharraf boʻldi. 2001-yilda bilim yurtini muvaffaqiyatli tamomlagan Davronbek bugungi kunda Markaziy harbiy okrugida xizmat qilmoqda, mayor.

Akasiga havas qilgan Nurbekjon 2000-yilda Toshkent Axborot texnologiyalari Universitetining maxsus fakultetini aʼlo baholarga tugatib, hozirga kunda Toshkent harbiy okrugining harbiy qismlaridan birida xizmat qilmoqda. Uning harbiy darajasi kapitan.

Oilaning uchinchi farzandi Ulugʻbek ham akalari izidan borib, Vatan himoyachisi boʻlishdek sharafli kasbni tanladi. U Nukus shahar iqtisodiyot kasb-hunar kollejini tugatib, ichki ishlar boʻlimida ishlash uchun zarur test sinovlaridan va taktik sinovlardan muvaffaqiyatli oʻtib, el-yurt osoyishtaligi posbonlari safidan joy oldi.

Davlatboy akaning qizi Nilufarxon NDPI psixologiya fakultetini tugatib, oʻz sohasi boʻyicha 21-maktabda faoliyat  yuritayotgan boʻlsa, oilaning kenja farzandi Azizbek ota-onasi bagʻrida dehqonchilik ishlari bilan mashgʻul.

Biz  ana shunday farzandlarni voyaga yetkazgan oila sohibi Davlatboy aka va barkamol farzandlar onasi Jamila  opa Jumaniyozova bilan uchrashib, suhbatlashdik.

- Farzandlarimizning Vatan tinchligi, xalqimiz osoyishtaligi yoʻlida xizmat qilayotganidan, yurtimizning harbiy zobitlar oilasi uchun koʻrsatayotgan eʼtibor va gʻamxoʻrliklaridan minnatdormiz, - deyishdi ular mamnuniyat bilan.

Aziza Ahmedova,

13-sonli maktab oʻqituvchisi.