"BARKAMOL AVLOD" BOLALAR MAKTABIDA "DOLZARB 90 KUN" LOYIHASI DOIRASIDA TADBIR OʻTKAZILDI

Ayni paytda mamlakatimizdagi barcha umumtaʼlim maktablari oʻquvchilari uchun yozgi taʼtil boshlandi. Oʻquvchi yoshlarning boʻsh vaqtlarini mazmunli oʻtkazishlarini taʼminlash maqsadida deyarli har yili nafaqat Maktabgacha va maktab taʼlimi vazirligi, balki kelajak bunyodkorlari boʻlgan yosh avlod taʼlim-tarbiyasiga masʼul mutasaddi tashkilotlar tomonidan ham oʻquvchi-yoshlarning yozgi taʼtil paytida maroqli dam olishlari, aqlan va jismonan chiniqishlari, maʼnaviy jihatdan shakllanishlarini oʻzida mujassam etgan tadbirlar tashkil etilib, bu tadbirlarga deyarli barcha oʻquvchi-yoshlar qamrab olinadi.

Joriy yilgi yozgi taʼtil butun mamlakatimizda yanada joʻshqinlik va hamjihatlik bilan boshlandi. 2025-yilning 15-may sanasida maktabgacha va maktab taʼlimi sohasi boʻyicha boʻlib oʻtgan videoselektor yigʻilishida muhtaram Prezidentimiz tomonidan ilgari surilgan “Dolzarb 90 kun” loyihasida belgilab berilgan vazifalar soha vakillariga ishchanlik kayfiyatini bagʻishladi va mazkur loyiha doirasida boshlanib ketgan koʻngilochar tadbirlar eng chekka qishloqlarda ham yuqori saviyada tashkil etilmoqda.

1-iyun – Xalqaro bolalarni himoya qilish kuni munosabati bilan tashkillashtirilgan bayram tadbirlarining uzviy davomi sifatida Amudaryo tumani “Barkamol avlod” bolalar maktabi maʼmuriyati tomonidan “Dolzarb 90 kun” loyihasi doirasida ishlab chiqilgan tadbirlar rejasiga koʻra, may oyining soʻnggi haftasida “Barkamol avlod bolalar haftaligi” boʻlib oʻtdi.

Mazkur haftalikning yakuniy qismi sifatida joriy yilning 2-iyun sanasida 2024-2025 oʻquv yili sarhisobiga bagʻishlangan “Quvonchga toʻldiraylik bolalikni!” shiori ostida tantanali adabiy-musiqiy bayram tadbiri oʻtkazildi.

Bayram tadbirida tuman “Barkamol avlod” bolalar maktabi va Olmazor mahallasi masʼullari, tarbiyachi-pedagoglar, oʻquvchilarning ota-onalari va toʻgaraklar rahbarlari ishtirok etdilar.

Mangʻit shahridagi istirohat bogʻida tashkil etilgan tadbirda tuman “Barkamol avlod” bolalar maktabi oʻquvchilarining 2024-2025 oʻquv yili davomida erishgan yutuqlari, maktabda faoliyat olib boruvchi turli yoʻnalishlardagi toʻgaraklar aʼzolarining axborot texnologiyalari va robototexnikaga oid bilim va izlanishlari tadbir ishtirokchilariga oʻzgacha ruh va koʻtarinki kayfiyat bagʻishladi. Ota-onalar esa oʻz farzandlarining qobiliyat va iqtidorlaridan mamnun boʻldilar.

Tadbirda soʻzga chiqqan tuman “Barkamol avlod” bolalar maktabi direktori Xonimjon Rajabova 2024-2025 oʻquv yilida maktab oʻquvchilari tomonidan turli koʻrik-tanlovlarda, sport musobaqalarida erishilgan yutuqlar va kelgusidagi rejalar haqida soʻz yuritib, ishtirokchilarni oʻquv yilining muvaffaqiyatli yakuni va 1-iyun – Xalqaro bolalarni himoya qilish kuni bilan samimiy tabrikladi hamda farzandlarining kelajagiga befarq boʻlmagan har bir ota-onani “Barkamol avlod” bolalar maktabida tashkil etilgan va bolalarni intellektual rivojlantirishga qaratilgan toʻgaraklar faoliyati bilan yaqindan tanishishga, farzandlarining qobiliyatlarini yanada rivojlantirish maqsadida maktab bilan doimiy aloqada boʻlishga daʼvat etdi.

Shundan soʻng 2024-2025 oʻquv yilida maktabdagi mashgʻulotlarini turli yoʻnalishlar boʻyicha toʻliq tamomlagan 677 nafar toʻgarak aʼzolariga maktabni bitirganlik haqidagi guvohnomalar tantanali ravishda topshirildi. Oʻquv yili davomida farzandlarining toʻgaraklar mashgʻulotlarida qatnashishlari uchun zarur shart-sharoitlar yaratib bergan eng faol ota-onalardan bir guruhiga “Tashakkurnoma”lar topshirildi.

Tadbirda soʻzga chiqqan Olmazor mahallasi masʼullaridan Oʻrozgul Yakubova hamda boshqalar “Barkamol avlod” bolalar maktabi oʻquvchilari orasida xalqaro miqyosdagi koʻrik-tanlovlar gʻoliblari ham borligini, maktabda taʼlim-tarbiya ishlari namunali darajada tashkil etilganini alohida eʼtirof etishib, toʻgaraklar rahbarlariga va pedagoglarga chin dildan minnatdorchilik bildirdilar.

“Quvonchga toʻldiraylik bolalikni!” ezgu shiori ostida, “Dolzarb 90 kun” loyihasi doirasida oʻtkazilgan tadbir davomida maktabning “Shoʻx bolalar” jamoasi tomonidan taqdim etilgan kontsert dasturi ishtirokchilarga zavq-shavq bagʻishladi.

Haqiqatdan ham biri-biridan shoʻx bolalar ijrosidagi kuy-qoʻshiqlar, goʻzal kuylar va dilbar raqslar tadbirga yanada joʻshqinlik, qalblarga quvonch ulashdi.

ROBIYa YOʻLDOShEVA.