Баҳорги тараддуд – кузги мўл ҳосил
ЎзА, А.Ортиқбоев, 25.02.2014 19:58
Қорақалпоғистон Республикаси Амударё туманида қишлоқ хўжалиги техникаларини баҳорги экиш мавсумига тайёрлаш масалаларига бағишланган кўргазмали семинар ўтказилди.
Туманлар ҳокимлари, қишлоқ ва сув хўжалиги бўлимлари, машина-трактор парклари ҳамда фермер хўжаликлари раҳбарлари иштирок этган тадбирда Амударё тумани марказий машина-трактор паркида қишлоқ хўжалиги техникаларини баҳорги мавсумга тайёрлаш борасида олиб борилаётган ишлар кўздан кечирилди.
Тадбирда Президентимиз раҳнамолигида аграр соҳада амалга оширилаётган изчил ислоҳотлар самарасида қишлоқ хўжалигида ҳосилдорлик ошиб, сифати юксалишига эришилаётгани таъкидланди. Қишлоқ хўжалиги маҳсулотлари ишлаб чиқарувчиларни ёнилғи-мойлаш материаллари, минерал ўғитлар билан таъминлаш сезиларли даражада яхшилангани бу борада муҳим аҳамият касб этмоқда.
Президентимизнинг 2007 йил 29 октябрда қабул қилинган "Ерларнинг мелиоратив ҳолатини яхшилаш тизимини тубдан такомиллаштириш чора-тадбирлари тўғрисида”ги фармони асосида ҳудудда кенг кўламли ишлар амалга оширилмоқда.
– Баҳорги экиш мавсумига тайёргарлик жараёнида 43 магнум трактори, 215 сеялка, 1 минг 700 тиргак ва бошқа техникалар шай ҳолатга келтирилди, – дейди Амударё тумани ҳокими Р.Йўлдошев. – Қорақалпоғистон Республикасида ҳар бир даланинг шароитига қараб, ернинг шўрини ювиш муҳим аҳамият касб этади. Туманда бу йил баҳорги экиш мавсуми олдидан 19 минг 800 гектар майдоннинг шўрини ювиш режалаштирилган эди. Айни пайтда бу ишлар тажрибали мутахассислар томонидан сифатли амалга оширилмоқда. Олиб борилаётган изчил ислоҳотлар самарасида туманда қишлоқ хўжалиги маҳсулотлари етиштириш 2000 йилга нисбатан 28 баробар кўпайиб, ғалла етиштириш 2,2 марта, картошка 2,7, полиз маҳсулотлари 4,5, узум 2,1, гўшт 2,3 ва сут етиштириш ҳажми 2,7 марта ошди.
Зараркунандаларга қарши биологик кураш қишлоқ хўжалигида мўл ҳосил етиштиришнинг муҳим омилидир. Тадбир иштирокчилари бу борада амалга оширилаётган ишлар юзасидан "Тўлқин” овул фуқаролар йиғинидаги биолаборатория фаолияти билан яқиндан танишди.
Мутахассисларнинг таъкидлашича, жорий йилда тумандаги 270 фермер хўжалиги учун 130 килограмм трихограмма, 60 миллион дона олтинкўз, 160 миллион дона бракон биомаҳсулотлари тайёрланмоқда.
Кўргазмали семинарда Қорақалпоғистон Республикаси Вазирлар Кенгаши раиси Б.Янгибоев сўзга чиқди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
