6 минг гектарга яқин майдон кузги шудгор қилинди

Экинлардан мўл ҳосил етиштиришда кузги шудгорнинг аҳамияти катта. Ота-боболаримиз “Ер ҳайдасанг куз ҳайда, куз ҳайдамасанг юз ҳайда”, деб бекорга айтишмаган.  Зеро,  сифатли ўтказилган кузги шудгор келгуси йил ҳосилига пухта замин яратади.

Шу сабабли барча ҳудудларда кузги шудгорлаш ишлари қизғин тарзда олиб борилмоқда. Хусусан, туманимизнинг Дўрсан овулида фаолият юритаётган фермер хўжаликлари, мазкур хўжаликларга хизмат кўрсатувчи “Йўлдош Ўразбоев” муқобил машина трактор парки жамоаси ҳам шудгорлаш ишларини сифатли ташкил қилмоқда.

Айтиш жоизки, туманимизда 2020 йил ҳосили учун жами 12 минг гектар майдонда кузги шудгорлаш ўтказилиши режалаштирилган. Кузги шудгорлаш ишларида жами 81 та сурим техникалари, шундан 40 та юқори унумли ва 41 та оддий сурим техникалари қатнашиши режалаштирилган. Мавжуд техникалар 22 та сурим отрядларига бириктирилган. Отрядларга раҳбар қилиб ҳудудлардаги ёқилғи мойлаш материаллари қуйиш шохобчалари мудирлари тайинланган.

Шўр ювиш, яхоб суви бериш натижасида эрта баҳорда тупроқни экишга, тайёрлаш ҳамда экиш каби агротехник тадбирларни ўз вақтида ва самарали ўтказишга эришилади.

Туманнинг бошқа овул ва маҳаллаларидаги фермер хўжаликари қаторида дўрманлик қишлоқ хўжалиги соҳаси илғорлари ҳам келгуси йил учун қизғин тайёргарлик кўрмоқда. Хусусан, овул бўйича 2020 йил ҳосили учун 950 гектар ер майдонларини кузги шудгорлаш режалаштирилган. Шундан ҳозирга қадар 450 га ер майдонлари сифатли шудгор қилинди.

Мазкур хўжаликларга хизмат кўрсатувчи “Йўлдош Ўразбоев” муқобил машина трактор парки раиси таъкидлагидек, ерларни сифатли ва юқори унум билан шудгорлашга эришиш учун трактор ва плуглар олдиндан ишга шай ҳолга келтирилган ва созланган, далалар эса ҳайдовга сифатли тайёрланган. Эндиликда ҳайдов тўғри ташкил этилиши ҳамда унинг сифати доимий назорат остида.

Туманда кузги шудгорлаш ишларини белгиланган муддатларда якунлаш мақсадида 25 октябрдан 20 ноябргача кунлик шудгорлаш графиклари ишлаб чиқилган бўлиб, мазкур агротехник тадбирларнинг ўз вақтида ва сифатли бажарилиши назорат қилиб борилмоқда.

Мутахассисларнинг таъкидлашларича, кузги шудгорлаш амалга оширилган далаларда ўсимлик қолдиқлари, бегона ўтлар ва уларнинг уруғларини чуқур кўмилиши таъминланади. Натижада далаларда бегона ўтларнинг униб чиқиши 2–3 баравар камаяди, пахта ҳосилдорлиги гектарига 2–3 центнер ошади.

Шу сабабли ҳам амударёлик фермерлар ушбу муҳим агротехник тадбирни сифатли ва ўз вақтида, тўлиқ амалга оширишга бел боғлаганлар. Бугунги кунга қадар туман бўйича кунлик 600-700 гектар, яъни режага нисбатан 5-6 фоиз далаларда шудгорлаш ишлари амалга оширилмоқда. Мавсум бошидан бери эса жами 6 минг гектарга яқин, ёки жами режадаги майдонларнинг 50 фоизга яқини шудгор қилинди. Бу мазкур жараёнда иштирок этаётган 81 та техниканинг ҳар бирига ўртача 7,5 га майдондан тўғри келишини кўрсатади. Хўжалик раҳбарлари ва механизаторлар иш унумдорлигини ошириш, техникалардан унумли фойдаланиш ва уларни тўла қувватда ишлатиш орқали кузги шудгорлаш ишларини қисқа муддатларда якунлашни режалаштирмоқда.

Чарос АРСЛОНОВА, туман ҳокимлиги ахборот хизмати раҳбари.