Баҳордай яшнаб юринг, азизлар

 Рўзимбой Нуримбетов – туман тиббиёт бирлашмаси касаба уюшма қўмитаси раиси:

- Туман тиббиёт бирлашмаси ҳузуридаги шифохоналарда меҳнат қилаётган шифокор аёлларни кўрсам, гўё дунёнинг барча гўзаллиги уларнинг қиёфаларида, бири-биридан ораста юришларида, дилларга малҳам янглиғ сўзлашларида жамландай ҳис қиламан. Шифохонамиз ҳам ана шу оппоқ либосли аёлларимиз билан файзли, иш кунларимиз мароқли назаримда. Тиббиёт бирлашмамиз тасарруфидаги шифо масканларида 1106 нафар аёл-қизлар, шундан 168 нафар олий маълумотли шифокор аёллар халқимиз саломатлиги йўлида меҳнат қилишади.

Байрам яқин. 8 март – Халқаро хотин-қизлар куни ҳам оиламиз учун, ҳам касбдош шифокор аёллар – азиз опа-сингилларимиз учун баҳорнинг энг латофатли, назокатли айёми. Биз бу кунни нишонлаш учун жиддий тараддуд кўрдик. Ўз ишининг фидойилари бўлган, хулқи гўзал, хушмуомала, назокатли аёлларимизга муносиб совға-саломлар ҳозирлаб қўйдик.

Истагим, нажот фаришталари, оилаларимизнинг қувончи, азиз аёлларимиз бор бўлсинлар. Ҳар бирингизга соғлик-омонлик, оилавий бахт-саодат, эл-у юрт эҳтироми ёр бўлсин, дейман.

Омонбой Ердашев, Шимолий-Ғарбий ҳарбий округнинг "Қўскўл” горнизони сержанти, "Тўлқин” овулида яшовчи онахон Бибисара Қўчқорованинг ўғли:

– Онажон! Сизни жуда соғиндим. Эсингиздами, 1-синфга қабул қилинган куним менга бошдан-оёқ янги либослар кийдириб, бағрингизга босганингиз. Ўшанда Сизнинг кўзингизда ёш кўрган эдим. "Нега йиғлаяпсиз?”, - десам, "қувончимдан”, - дегансиз. "Қувончдан ҳам одам йиғлар экан-да”, - дея ҳайратлангандим ўшанда. Энди ўйласам, ҳаёт қийинчиликларини кўп тотиган қалбингиз бир оғизгина ширин сўздан ҳам пойимизга тўкилаверган экан. Буни ўзим ота бўлганимда, ўғлимни мактабга олиб чиққанимда ҳис қилдим, Онажон! Бу ҳаётда ота-она учун фарзандлар камолидан ҳам улуғроқ бахт йўқ экан, аслида. Менинг  ўғлим ҳарбий, дийдаси қаттиқ, деб ўйламанг. Сизнинг меҳр-муҳаббатингиз қошида бутун жисму жаҳони эриб-эврилгувчи гўдагингизман.

Биламан, 8 март кунига ҳар доим алоҳида тараддуд кўрасиз. Иссиқ, қат-қат патирлар ёпасиз, бўғирсоқлар, қирмишлар пиширасиз. Ич-ичингиздан биз ҳарбий болаларингизга тўкилиб турасиз: "Ҳаммалари келса экан. Мана бу неъматлардан тотса экан”, - деб интиқ бўласиз. Бизнинг дийдоримиз Сиз учун энг улуғ совға эканлигини билиб, биримиз байрамдан олдин, биримиз байрам куни ё кейин олдингизга ошиқамиз. Сизни қувонтириш, Сизнинг бағрингизда бир лаҳза бўлиш ҳам бизга байрам!

Онажон! Дунёнинг жамики гўзалликлари Сизга ёр бўлсин. Ўғил-қизларингизнинг азиз дийдорларидан, қувончларидан бахтиёр, узоқ умр кўринг, байрамингиз қутлуғ бўлсин!

Равшанбек Йўлдошев, "Тошёп” овулида яшовчи тадбиркор: - Ота-онам доимо: "бир-бирларингга меҳрибон бўлинглар, айниқса, қиз боланинг дилини оғритиб бўлмайди, қизлар – ота уйнинг меҳмонлари”, – дея тез-тез такрорлаб турадилар. "Фарзанд ҳам меҳмон бўладими?” – деб қўярдим ичимда. Лекин ўзим улғайиб, аввало опам ўзга хонадонга узатилиб кетганларида ота-онам  қайта-қайта такрорлайдиган бу сўзларнинг мағзини чақдим. Менинг опа-сингилларим, энди билсам, меҳр-оқибат бобида онамдай жонфидо эканлар.

Онамдай азиз ва меҳрибон, отамдай суюкли опа-сингилларим! Сизларни меҳр-муҳаббат билан бағримга босиб, 8 март – Халқаро хотин-қизлар куни билан табриклайман. Ҳамиша бахтимга баҳордай яшнаб-яшариб юринг. Сизларга оилавий бахт-саодат тилайман, азизларим!

Табрикларни Робия ЙЎЛДОШЕВА ёзиб олди.

(Фото - http://uza.uz)