МЕНИНГ ЎҒЛИМ – ВАТАН ҲИМОЯЧИСИ
Она Юрт ҳимоячисининг онаси бўлиш қанчалик шарафли, шу билан бирга масъулиятли эканини фарзанди ҳарбий хизматда бўлган оналар жуда яхши тушунадилар.Ўтган 2019 йилнинг февраль ойида ўғлим Шаҳзоджон Каримовни ҳарбий хизматга кузатдик. Доимо бағримда бўлган ўғлимнинг бир йил давомида мамлакатимизнинг жанубий вилояти, қолаверса, нотинч Афғонистон давлати билан чегарадош ҳудуддаги ҳарбий қисмлардан бирида хизмат қилиши она сифатида менда ҳам фахр, ҳам бироз хавотир уйғотди. Худога минг-минг шукурки, Ватанимиз тинч, сарҳадларимиз мустаҳкам.
Айни пайтда Шаҳзоджон қуруқликдаги қўшинлар таркибидаги ҳарбий қисмлардан бирида ўз йигитлик бурчини ўтамоқда. Унинг ҳарбий қасамёд қабул қилган лаҳзалардаги мағрур туришларини, ҳайбатини кўриб қанчалар қувонган бўлсам, ҳарбий қисм қўмондонлиги томонидан ташаккурнома олганимда ўзимни дунёдаги энг бахтиёр она сифатида ҳис қилдим.
Қаранг, бир пасда бир йил вақт ўтиб кетди. Худо хоҳласа, ўғлим шу йилнинг баҳорида ҳарбий хизматдан қайтади. Ўғлим билан телефон орқали тез-тез гаплашиб тураман ва шуни ҳис қиламанки, у анча ўзгарган. Дунёқараши кенг, босиқ, мулоҳазали, меҳр-оқибатли, матонатли шахс сифатида шаклланган. Бу менга қувонч бағишлайди ва ўғлим билан фахрланаман.
Фурсатдан фойдаланиб, барча аскар оналарини, Ватанимиз сарҳадларида ҳамиша собит Она Юрт посбонларини, жонажон халқимизни Ватан ҳимоячилари куни билан табриклайман. Ҳамиша осмонимиз мусаффо, сарҳадларимиз тинч ва мустаҳкам, Она юрт посбонлари – азиз ҳарбийларимиз омон бўлсинлар!
Нилуфар МАДРАИМОВА,
уй бекаси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
