“ЁШ КЕЛИН-КУЁВЛАР ИННОВАЦИОН МАКТАБИ”: УНИНГ МАШҒУЛОТЛАРИ ЁШЛАРГА МАНЗУРМИ?

“Оила” илмий-амалий тадқиқот маркази туман бўлимида 2019 йилнинг кузида “Ёш келин-куёвлар инновацион мактаби” ташкил этилиб, ўз фаолиятини бошлаган эди. Унда 2019 йил 3 октябрдан 7 декабргача 4 та гуруҳда 96 нафар ёш келин-куёвлар оила қадриятлари асосида таълим олдилар.

Бўлғуси келин-куёвларга оила сабоқлари, ҳуқуқий-иқтисодий, диний, психологик, репродуктив йўналишлар бўйича сабоқ берилди. Яқинда “Ёш келин-куёвлар инновацион мактаби”да таълим олган ёшлар ўртасида сўровнома ўтказилди. Сўровнома таҳлил қилинганда тингловчиларнинг 60 фоизи ушбу курсга келишидан аввал оилавий хаёт ҳақидаги сабоқларни яқин қариндошлар ва ўқитувчиларидан эшитганлигини, 40 фоиз ёш оила вакиллари эса оилавий сабоқлар ҳақида умуман эшитмаганлигини айтишди. 100 фоиз тингловчилар эса ёшларни оилавий ҳаётга тайёрлашга мўлжалланган мазкур ўқув курсида ўқиш фойдали бўлганлигини қайд этишди.

Тингловчиларнинг 11,4 фоизи оила ҳуқуқи тушунчаси мавзуси, 27 фоиз тингловчилар диний мавзу,  25 фоизи оила психологияси мавзуси, 37 фоиз тингловчилар эса барча мавзулар ўзларига маъқул бўлганлигини билдиришган.

Шунингдек, 5 фоиз тингловчилар тадбиркорлик бўйича, 30 фоизи диний мавзуларни, 10 фоиз тингловчилар саломатликка оид дарсларни ўрганишни ва 48,9 фоизи барча мавзуларни ҳамда оила психологиясини  кўпроқ ўрганиш истаги борлигини маълум қилишган.

Шуниси эътиборга моликки, 100 фоиз тингловчилар олган билимлари фойдали бўлганлигини таъкидлаш билан бирга ўқув курси ёш келин-куёвларнинг ўзаро муносабатлари яхшиланишига, бир-бирларини кўпроқ ўрганишларига ёрдам бера олади, дея фикр билдиришди.

Ўтказилган сўровномада тингловчиларнинг ота-оналари ҳам ўз фикрларини изҳор этишган ва ўқув курси машғулотларига ижобий баҳо беришиб, ёшларни янада кенгроқ қамраб олиш зарурлигини қайд этишган. Ёшлар эса “Ёш келин-куёвлар инновацион мактаби”ни янада кенгайтириш зарурлиги ва машғулотларга барча ёш келин-куёвларни жалб этиш фойдали бўлиши ҳақидаги таклиф ва истакларини киритишди.

Демак, туманимиз ёшлари учун ушбу мактаб машғулотлари зарур ва бу машғулотлар орқали ёш келин-куёвлар ҳаётга теран назар билан қараш орқали ўз оилаларига меҳр-оқибатли бўлишни ўрганишмоқда. Меҳр-оқибат эса оила мустаҳкамлигининг бирдан-бир мезонидир.

Г.Юсупова,
“Оила” маркази раҳбари.