ЧОЙКЎЛЛИКЛАP КАPАНТИН ДАВPИДА ҲАМ ОБОДЛИК, ФАPОВОНЛИК УЧУН ИНТИЛМОҚДАЛАP

Чойкўл овулида 1000 дан зиёд хонадонларда 7 мингга яқин аҳоли яшайди.

Уларнинг орасида турли касб эгалари, овул файзи-фаришталари бўлган нуроний кексалар, тадбиркорлар ва илм олиш сари дадил интилиб, кўпгина ютуқларга эришаётган ёшлар бор.

Овул 2019 йилда “Обод қишлоқ” дастури асосида кўпгина қурилиш-таъмирлаш ишлари олиб борилганлиги, йўлаклар асфальтланиб, ҳудуди ободонлаштирилиб, кўкаламзорлаштирилгани туфайли ўзгача файзга эга бўлди. Меҳнаткаш, қўни-қўшничилик алоқалари, меҳр-оқибати мустаҳкам аҳоли бугунги кунда  бутун дунёни ларзага солаётган коронавирус инфекцияси тарқалиши муносабати билан мамлакатимизда жорий этилган карантин қоидаларига қатъий амал қилишмоқда. Пандемия даврида ҳудудда карантин қоидаларига зид ҳолатлар, яъни тўй-маросимлар бериш,  иши тўхтатилган корхона-ташкилотларнинг фаолият кўрсатиши каби ҳолатлар содир этилмади.

Овул масъулларининг бу борада аҳоли орасида тушунтириш-тарғибот ишларини яхши олиб боришгани туфайли аҳоли уйда қолиб даромад топиш, чорва ва парранда парваришлаш билан бир қаторда томорқа ерларидан мўл ҳосил ундириш ниятида меҳнат қилишмоқда.

Карантин туфайли айрим касблар фаолияти вақтинча тўхтатилгани боис, оилаларда иқтисодий қийинчиликларга учраётган эҳтиёжманд оилалар аҳволи ўрганилиб, рўйхати шакллантирилди. Бунга кўра 26 та кам таъминланган оилаларни овул тадбиркорлари ижтимоий ҳимоя қилиб келишаяпти.

Шу кунгача “Саховат ва кўмак” умумхалқ ҳаракати доирасида 71 та оилаларга жами 15 миллион 500 минг сўмликдан зиёд озиқ-овқат маҳсулотлари тарқатиб берилди.

Деҳқончиликда кўп йиллик тажрибага эга, эл дастурхони тўкин-сочинлигига ҳисса қўшиб келаётган Бибирабо Бобожонова, Омонгул Дўсмуродова, Муборак Гулмирзаева, Мўмин Эшмуродов, Pустам Бобожонов, Комил Норбоевлар ўз хонадонларида ташкил этган иссиқхоналарида эртаги сабзавотлар етиштиришиб, оиласидан ортганини ҳамқишлоқлари билан баҳам кўришмоқда.

Жорий йилда Зумрад Жабборова ҳам оиласи томорқасининг  7 сотихлик жойида замонавий иссиқхона барпо этди. Ҳозир ушбу иссиқхонада бодринг, помидорлар етилай деб турибди. Шунингдек, Маҳмуджон Норбоев ҳам яхши ниятлар билан иссиқхона қуриб, ҳам эртаги сабзавотлар етиштираяпти, ҳам турли экинлар кўчатларини етиштириб, ўзидан ортганини қўни-қўшниларга сотди. Шуниси эътиборлики, овулдаги иссиқхоналар эгалари кам таъминланган, эҳтиёжманд оилаларга экинлар кўчатларини бепул тарқатди.

 Овул тадбиркорларидан “Дўстлик-Чойкўл савдо” масъулияти чекланган жамияти раҳбари Мақсуд Собиров, адвокат Шерзод Абдуллаев, тадбиркорлар Самандар Бобожонов, Мадат Тўраев, Алишер Аминбоев, Худоёр Айтеков, Хушнуд Чоршамов ва фермер хўжаликлари раҳбарлари боқувчисини йўқотган, ногиронлиги бор, эҳтиёжманд оилаларни моддий қўллаб-қувватлаб келмоқдалар, томорқа ерларини ҳайдаб, экинлар экишга ёрдам бермоқдалар.

Овул фуқаролар йиғини масъуллари хонадонларда бўлиб, ўз оиласи иқтисодини юксалтириши учун ипак қурти боқиб ҳам мўл даромад олиши мумкинлигини кенг тушунтирдилар. Натижада ипак қурти боқувчилар кўпайди. Соҳада кўп йиллик тажрибага эга пиллакорлардан Гулсаур Нагметова, Санобар Примбетова, Pаъно Примбетовалар ипак қурти боқишда бошқаларги ўрнак бўлмоқдалар.

Ҳа, излаган имкон топади. Эртанги кунимизнинг қай тарзда бўлиши, албатта, бугунги ҳаракатларимизга боғлиқ. Чойкўлликлар буни сидқидилдан ҳис қилиб, карантин даврида ҳам қўл қовуштириб ўтирмай, ободлик, фаровонлик учун интилмоқдалар.

Ойгул PАЖАБОВА.