СУҒОРИШ – ҒЎЗА ПАРВАРИШИДА ЭНГ МАСЪУЛИЯТЛИ ЖАРАЁН

Маълумки, ғўза парваришида энг муҳим агротехник тадбирлардан бири бу биринчи суғориш ишларини меъёрида, тўғри ташкил этишдир. Чунки биринчи сув билан қондириб суғорилган ғўза ниҳоллари соғлом ва дуркун ривожланади, гул-ғунчалари банди мустаҳкам бўлади. Ғўзани суғориш даврида сувдан тежаб-тергаб, оқилона фойдаланиш эса сув етишмовчилиги билан боғлиқ муаммоларга чек қўяди.
Туманимизда 2020 йилги ғўза вегетацияси учун 480 млн. 800 минг кубометр миқдорида сув сарфланиши режалаштирилган. Айни пайтда туман фермер хўжаликлари тасарруфидаги 15250 гектар ғўза пайкалларини суғориш ишларини ўз вақтида, сифатли олиб бориш мақсадида 18 та суғориш отрядлари ташкил этилиб, суғориш кампанияси даврида фермер хўжаликлари томонидан 2118 нафар сувчилар жалб қилиниши режалаштирилган. Бундан ташқари, ғўзани суғориш ишларида фермер хўжаликларига амалий ёрдам кўрсатиш мақсадида сув хўжалиги ташкилотларидан 289 нафар, сув истеъмолчилари уюшмасидан 20 нафар ходимлар бириктирилган.
Вегетация жараёнида кунлик суғориш ишларининг бориши мониторинг қилиб борилади. Шу мақсадда туманда ва ҳар бир сектор ҳудудида биттадан, жами 5 та суғориш штаблари ташкил этилиб, шарбат усулида суғоришга алоҳида эътибор қаратилади. Шуни инобатга олган ҳолда ғўзани шарбат усулида  суғориш учун ҳар 5 гектар майдонга биттадан, жами 3050 та шарбат хандақлари қазилиб, тайёрлаб қўйилмоқда.
Суғориш ишларини мутахассислар қатъий назорат остида кузатиб боришларига алоҳида аҳамият берилади. Шунинг учун биринчи суғориш бўйича суғориш жадвали ишлаб чиқилиб, барча далаларда суғориш ишларини 16 июнь санасидан бошлаш белгиланди.
Шуниси эътиборга моликки, бу йилги мавсумда пахта экилган майдонларни сифатли суғориш ишларини ташкил этишда сувни тежайдиган технологиялардан фойдаланишга алоҳида аҳамият қаратилади. Хусусан, жорий йилда туманда 75 гектар майдондаги ғўза пайкалларида томчилатиб суғориш технологияси жорий этилиши назарда тутилган.
Шунингдек, 140 гектар майдондаги ғўзалар эгилувчан қувурлар ёрдамида, 40 гектар ғўзани эса эгатларига плёнка тўшаб суғориш технологиясини жорий этган ҳолда суғориш режалаштирилган.
Албатта, соҳага жорий этилаётган янгиликлар, инновацион лойиҳаларнинг барчаси деҳқоннинг меҳнатини енгиллаштириш, даромадини ошириш, буромадини имкони борича камайтиришга эришишдир. Ғўзани суғоришдаги тежамкор усулларни қўллаш иқтисодий жиҳатдан катта фойда келтиришини яхши англаб етган илғор фермер хўжаликларида аллақачон эгилувчан  қувурлардан фойдаланишга киришилди. Жорий йилнинг 1 июнь санасида Тўлқин овулидаги “Амет Тўраев” фермер хўжалигида туманда биринчи бўлиб, айнан ана шундай тежамкор технология – эгилувчан қувурлар орқали ғўза пайкалларига биринчи сув тараш ишлари бошлаб юборилди.

Робия ЙЎЛДОШЕВА.