ПИЛЛАКОРЛАРИМИЗ ЕТИШТИРГАН ҲОСИЛ – МАНҒИТДА ҚАЙТА ИШЛАНМОҚДА

Мамлакатимиз иқтисодиётни ривожлантиришнинг муҳим шарти ҳисобланмиш экспортбоп, харидоргир маҳсулотлар ишлаб чиқариш ва сотишни йўлга қўйиш бўйича амалга оширилаётган тизимли ишлар бугунги кунда ўзининг ижобий самараларини бераяпти.

“Ўзипаксаноат” уюшмасига қарашли “Jayhun Silk” масъулияти чекланган жамияти пиллакорларимиз етиштирган маҳсулотни туманнинг ўзида қайта ишлашмоқда. Амударё туманидан ташқари Қорақалпоғистон Республикасининг Беруний, Хўжайли, Тахиатош, Шуманай, Қангликўл, Нукус, Кегейли ва Чимбой туманлари пиллакорлари етиштирган пилла ҳосили ҳам айнан “Jayhun Silk” корхонасида қайта ишланади ва ипак толаси ҳолида экспорт қилинади. Корхона бу жараёнларни амалга ошириш учун янги, замонавий технологиялар билан жиҳозланган. Бу йилдан бошлаб мазкур корхона қуруқ пиллани қайта ишлаб, хом ипак ип ишлаб чиқаришга ихтисослаштирилди.

Мазкур масъулияти чекланган жамият томонидан жорий йилнинг баҳорида туманимиздаги 1572 нафар касаначиларга 1575 қути, 266 та фермер хўжаликларига 2193 қути ипак қурти уруғи етказиб берилиб, 208 тонна ҳосил етиштириш юзасидан шартномалар тузилган эди. Белгиланган хорижий ипак қурти уруғлари туманимиздаги 16 та инкубаторияларда сифатли жонлантирилди ва тарқатилди.

Ипак қурти боқиш мавсумини кўп йиллик тажрибалар ва замонавий илм-фан ютуқлари асосида ташкил этган пиллакорлар жорий йилги мавсумда ҳам кунни тунга улаб, фидокорона  меҳнат қилдилар ва зиммаларидаги режаларини ортиғи билан адо этдилар. Мавсум давомида Манғит шаҳридаги пиллахонада 50 нафар, Хитой овулидаги пиллахонада 20 нафар ишсиз фуқаролар мавсумий иш билан таъминланди.

“Jayhun Silk” масъулияти чекланган жамиятида 100 нафардан ортиқ ишчи-ходимлар иш билан таъминланган бўлиб, айни пайтда у ерда етиштирилган қуруқ пилладан хом ипак ишлаб чиқариш жараёнлари қизғин кечмоқда. Ходимлар ҳар куни ишхонага кириб келишида масофадан туриб, ҳарорати ўлчанади ва соғломлиги аниқлангач, ичкарига киритилади.

Ишчилар аввало пиллаларнинг сифатига қараб, саралашади. Сараланган пиллалардан замонавий технологиялар ёрдамида ип олинади ва қадоқланади.

Масъулияти чекланган жамиятда жорий йилнинг кўкламида ипак қурти боқиш мавсумида Беруний, Хўжайли, Тахиатош, Шуманай, Қангликўл, Нукус, Кегайли ва Чимбой туманлари пиллакорлари етиштирган пилла ҳосили ҳам қабул қилиниб, қайта ишлаш учун ғамлаб қўйилди.

Шунингдек, келгуси йилда ҳам туманимизда юксак пилла хирмони бунёд этиш учун замин яратилди. Ипак қуртига мўл озуқа заҳирасини яратиш учун баҳорда ўтқазилган 343 минг дона тут кўчатлари шу кунларда сифатли парвариш қилинмоқда.

Пиллачилик – қадим-қадимдан етти хазинанинг бири, дея баҳоланган ва айни кунда ҳам қишлоқ хўжалигининг муҳим тармоғи ҳисобланади. Шу боис сўнгги йилларда соҳани илм-фан ютуқлари асосида ривожлантиришга янада кўпроқ эътибор берилмоқда. Туманимизда ҳам етиштирилган ҳосилни қайта ишлаш йўлга қўйилгани ва маҳсулотнинг экспорт қилиниши соҳани яна ҳам даромадли қилиши тайин.

О.РАЖАБОВА.