Амударё туманида сайловларга пухта тайёргарлик кўрилмоқда

Халқ депутатлари Амударё туман Кенгашининг 2020 йил 19 август кунги 12-сессиясида туман Кенгашининг бўшаб қолган 24-Оқ олтин ва 28-Дарёбўйи сайлов округларда 2020 йилнинг 20 сентябрь куни сайлов ўтказилиши белгиланган эди. Туман сайлов комиссиясининг қарори билан сайловга тайёргарлик кўриш ва уни ўтказиш бўйича тадбирларнинг календарь режаси тасдиқланди.

Ушбу режага мувофиқ бўшаган ўринларга бўлиб ўтадиган сайловга тайёргарлик кўриш юзасидан туман сайлов комиссияси, 2 та округ ва 4 та участка сайлов комиссиялари томонидан Сайлов кодекси асосида ишлар ўз муддатларида амалга оширилиб келинмоқда.

Туман сайлов комиссиясининг 12 сентябрь куни бўлиб ўтган йиғилишида сайловга тайёргарлик кўриш ва уни ўтказиш бўйича тадбирларнинг календарь режасида белгиланган вазифаларнинг ижроси муҳокама қилинди.

Айтиш керакки, туман сайлов комиссиясининг 4 сентябрдаги 22-сонли қарори билан бўшаган ўринларга халқ депутатлари Амударё туман Кенгаши депутатлигига номзодлар рўйхатга олинди. Жумладан, 24-Оқ олтин сайлов округидан 3 нафар, 28-Дарёбўйи сайлов округидан 3 нафар жами 6 нафар номзодлар рўйхатга олинди. 

Туман сайлов комиссияси сайловни қонун талаблари ва карантин қоидаларига риоя қилган ҳолда ўтказишда округ, участкалар сайлов комиссиялари аъзоларига яқиндан ёрдам бериб келмоқда.

Шунингдек, туман сайлов комиссияси аъзолари тушунтириш-тарғибот ишлари билан ҳам шуғулланиб, Сайлов Кодексининг мазмун-моҳияти, фуқароларнинг сайлаш ҳуқуқи ва конституциявий бурч ҳамда мажбуриятлари ҳақида сайловчиларга кенг тушунчалар бериб келмоқда.

***

Сайлов участкаларида ҳам тайёргарлик ишлари жадал суръатда олиб борилмоқда.

Сайлов бўлиб ўтадиган 2 та округ ва 4 та участка сайлов комиссиялари томонидан Сайлов кодекси асосида амалга оширилиши лозим бўлган вазифаларнинг ўз муддатларида ижроси таъминланмоқда. Жумладан, сайловчилар рўйхатига аниқлик киритиш, фуқароларга пандемия шароитида сайловлар ўтказиш тартибини тушунтириш, сайлов участкаларини жиҳозлаш каби тайёргарлик ишлари намунали тарзда ташкил қилинмоқда.

Халқ депутатлари туман Кенгашининг “24-Оқ олтин” сайлов округидан депутатлигига 3 нафар номзодлар рўйхатга олинган. Айни кунларда участка сайлов комиссиялари жойлашган бинолар депутатликка номзодларнинг таржимаи ҳоли ҳақидаги маълумотлар билан таъминланган бўлиб, комиссия аъзолари аҳоли орасида тушунтириш-тарғибот ишларини амалга оширмоқдалар.

Шу ўринда таъкидлаш керакки, сайловларни очиқ-ошкора, миллий сайлов қонунчилигимиз талабларига мувофиқ, демократик сайловлар ўтказиш бўйича тўпланган бой миллий тажрибамизга асосланган ҳолда ҳамда умумэътироф этилган халқаро ҳуқуқ нормалари ва стандартлари талабларига ҳамоҳанг тарзда ташкил этиш, энг асосийси сайловлар жараёнида ҳар бир фуқарога, сайловчига ўз хоҳиш-иродасини эркин ифода этиши учун шарт-шароит ва имконият яратиб бериш муҳим аҳамият касб этади. Шу сабабли участка сайлов комиссиялари раислари ва аъзолари ушбу муҳим сиёсий жараёнга муносиб тайёргарлик кўрмоқдалар.

“24-Оқ олтин” округ сайлов комиссияси раиси, 41-сонли умумтаълим мактаби директори Дуйсенбой Нуржанов округ ва участкалар сайлов комиссиялари аъзоларига самарали фаолият олиб боришлари учун қулай шароитлар яратиш, сайлов округи ва участкалар жойлашган биноларнинг барча талабларга жавоб беришини назорат қилиш, сайловга оид қўлланмалар ва зарурий жиҳозлар билан тўлиқ таъминлаш, сайлов округи ва участкалари жойлашган бинолар атрофларини ободонлаштириш ва муҳандислик-коммуникация тармоқларининг узлуксиз ишлашларини таъминлаш ишларига катта эътибор қаратмоқда.

Шуни алоҳида таъкидлаш жоизки, Республика махсус комиссияси хулосасига кўра пандемия шароитида аҳолининг хавфсизлигини таъминлаш мақсадида сайловчиларга чақирув қоғозлари тарқатилмайди. Шундай экан, Оқ олтин овулининг “Кўнабосу”, “Тозабосу”, “Пахтаобод”, “Деҳқонобод” ва “Жийдали Қулон” аҳоли пунктларида, “Қипчоқ” шаҳарчасида, шунингдек, Дарёбўйи маҳалласи “Тараққиёт” аҳоли пунктининг жанубий қисмидаги хонадонларда истиқомат қилувчи сайлов ҳуқуқига эга бўлган барча юртдошларимизни 20 сентябрь куни бўлиб ўтадиган сайловларда фаол иштирок этиб, ўз конституциявий ҳуқуқларидан фойдаланишга ҳамда ўзлари муносиб деб билган номзодларга овоз беришга чақирамиз.

Ойгул Ражабова,

Чарос Арслонова.