Табиатга эҳтиёткорона муносабатда бўлиш тарғиб қилинмоқда

Мамлакатимизда экологик мусаффоликни сақлаш, табиий ресурслардан оқилона фойдаланиш, табиатни асраб-авайлаш борасида кўпгина чора-тадбирлар амалга оширилмоқда. Боиси ҳар бир жонзот, одамзотнинг тириклиги, ҳаёт кечириши табиат билан чамбарчас боғлиқ.

Афсусланарли жиҳати – қатор йиллар давом этган инсонларнинг табиатга нотўғри муносабати оқибатида табиий мувозанатга путур етди. Натижада бугунги кунга келиб, инсоният экологик муаммолар қуршовида қолди, зилзилалар, ёнғин, тўфон, сув тақчиллиги, ўсимликлар ва ҳайвонот дунёсининг тури тобора камайиб бораётгани, иқлим ўзгаришлари ва бошқа кўплаб глобал муаммолар юзага келди.

Юртимизда экологик мувозанат яхшиланиши йўлида олиб борилаётган саъй-ҳаракатлар, соҳага оид қонунчилик мустаҳкамланаётгани ва такомиллаштирилаётгани, аҳолининг экологик маданиятини юксалтиришга, атроф-муҳитга оқилона муносабатда бўлиш, табиий бойликларни келгуси авлодга безавол етказиш йўлида чора-тадбирлар амалга оширилаётгани келгусида албатта, ўзининг ижобий натижаларини беради.

Айтиш жоизки, экологик муаммолар фақатгина бизнинг юртимиздагина эмас, бутун дунёда кузатилмоқда. Бунга қарши кураш чоралари сифатида ҳар йили 19 сентябрда “Бутунжаҳон тозалик куни” сифатида нишонланади. Бу кунда табиий барқарорликни сақлашга хизмат қилувчи кўпгина тадбирлар ўтказилади, фуқаролар кўнглида табиатга меҳр уйғотилади ва тежамкорликка ўргатилади.

Мазкур сана муносабати билан Қорақалпоғистон Республикаси Экология ва атроф-муҳитни муҳофаза қилиш қўмитаси Амударё туман инспекцияси ва “Тоза ҳудуд” давлат унитар корхонаси ҳамкорлигида бир қатор тадбирлар ўтказилди. Хусусан аҳолига мавзу юзасидан кенг тушунтиришлар олиб борилди, ҳовли-жойларни тоза-озода сақлаш, маиший чиқиндиларни белгиланмаган жойларга ташламаслик, ҳар бир одам аввало ўз ҳовлиси, кўчаси озода ва обод бўлиши учун интилмоғи, ҳовлилар фасад қисмини кўкаламзорлаштириш, мевали ва манзарали дарахтлар, гуллар экиб, парваришлаш лозимлиги борасида тарғибот-ташвиқот олиб бордилар.

Шу куни “Тоза ҳудуд” давлат унитар корхонаси ишчилари ва кўнгилли аҳоли Манғит шаҳрининг Олмазор, Бўстон маҳаллалари ҳудудларини тўпланиб қолган чиқиндилардан тозалашди ва Қипчоқ кўчаси бўйидаги манзарали дарахтларни оқлаб, йўл бўйларини ободонлаштирдилар.

Қипчоқ шаҳарчасининг дарё соҳилига яқин ҳудудда истиқомат қилувчи аҳоли орасида чиқиндилар ташламаслик, дарё сувини ифлос қилмаслик юзасидан тушунтириш ишлари олиб борилди. Шундан кейин “Бодай тўқай” қўриқхонасининг Амударё туманига қарашли ҳудудида ўрмонни қўриқлашга масъул бўлган ўрмонбегилари билан суҳбат ўтказилди. Қорақалпоғистон Республикаси Экология ва атроф-муҳитни муҳофаза қилиш қўмитаси Амударё туман инспекцияси бошлиғи Нурбек Узоқбоев, биринчи даражали инспектори Нилуфар Абдуллаевалар бебаҳо табиий бойлик ҳисобланмиш тўқайдаги ҳар бир наботат, ҳайвонот турларини кўз қорачиғидай асраш, дарахтларни ўтин қилиш мақсадида кесиб кетишларига йўл қўймаслик лозимлиги хусусида гапирдилар.

Масъуллар ўрмонбегиларни, аҳолини қизиқтирган саволларга батафсил жавоблар қайтардилар.

Ойгул Ражабова.