БАХТЛИ ВА ОМАДЛИ БЎЛИШНИ ХОҲЛАСАНГИЗ...
Инсон дунёга келар экан, бахтли яшашга ҳақлидир. Бахт сўзини ҳар ким ўзича ҳар хил тасаввур қилади, лекин бу тушунча қамрови бизнинг тафаккур доирамизда анча кенг ва уни биргина ҳолат билан ифодалаб бўлмайди.
Айтайлик, инсоннинг дунёга келиши, фарзандли бўлиши, ота-она дуосини олиши каби ҳар хил бахт тушунчалари мавжуд бўлиб, уни истганча давом эттириш мумкин. Кўпчилик инсонлар ўз ҳаётидан нолийди: “Нега мен бахтсизман? Омадсизман? Нега мени Худо шундай яратган?” – деб ўзини-ўзи ёмон кўриб кетади. Мутахассислар кўп йиллик тадқиқотлар натижасида бир неча минг омадли ва бахтли инсонлар ҳаётини ўрганиб, уларнинг дунёқараши ва хатти-ҳаракатларида умумийлик борлигини исботлашди.
“Нима хоҳлайсиз? Сиз ҳаётингиз қандай бўлишини хоҳлайсиз?” – қабилидаги саволларга кўпчилик “омадли ва бахтли бўлишни хоҳлайман”, деб жавоб беришди. Лекин бу сўзлар ҳеч нарсани англатмайди. Одам ўз ҳаётининг ҳар бир соҳасида қандай натижага эришишни белгилаб олмагунча омад ва бахт ҳам келмайди. Чунки ўзингиз нима хоҳлашингизни билмасангиз, Аллоҳ ҳам нима беришни билмайди.
Ўтказилган тажриба натижаларига кўра, ҳавас қилса арзигулик инсонлар қандай ютуқларга эришмоқчи эканлигини ҳар доим хотираларида сақлашар экан. Шунинг учун ҳам бахтли ва омадли бўлишни истасак, қуйидагиларга эътибор қаратишимиз лозим. Биринчидан, ҳаётингиз сизни қувонтириши, орзу-мақсадларингиздан қувониб яшашингиз керак. Иккинчидан, ҳаётдан баҳра олиб яшашга интилинг.
Ҳаётингиздаги салбий воқеалар сонини эмас, балки қувончли воқеалар сонини ҳисобланг. Бунинг учун ҳаётингизда катта қувончли воқеа бўлиши шарт эмас. Тоза ҳаводан, гўзал табиатдан, истеъмол қилаётган таомингиздан, ҳатто кичик ишлардан ҳам қувонишни ўрганмоғингиз керак.
Ҳар доим кулиб юришга ҳаракат қилинг, орзу-ниятларни калла орқали эмас, тана орқали танланг, яъни, орзу-мақсадларингиз чексиз бўлсин.
Ҳеч қачон фақат биргина иш билан шуғулланманг, инсон аслида бирор нарсани ўйлаши, тезда амалга оширишга бўлган иштиёқи ва ақли билан бошқа мавжудотлардан устун туради. Демак, бахтли ва омадли инсон сифатида ҳаётдан рози бўлиб яшаш инсоннинг ўз қўлидадир.
Гулжанар МАРЯМБОЕВА, 41-сонли мактабнинг амалиётчи психологи.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
