ЁШ ШАХМАТЧИЛАР ҒАЛАБАСИ
Спорт инсонни нафақат соғломлаштиради, балки унга ҳаётий фаоллик, қувноқ кайфият бахш этади. Шу боис, Президентимиз томонидан болалар спортини ривожлантириш, уларнинг бўш вақтларини мазмунли ўтказиш, спортда эришаётган ютуқларини рағбатлантиришга қаратилаётган эътибор туфайли спортнинг турли йўналишлари бўйича ўз иқтидорларини намоён этаётган ёшлар сафи тобора ошиб бормоқда.
Туманимизда ҳам спортнинг ўзлари танлаган йўналишлари бўйича нуфузли мусобақаларда иштирок этиб, совринли ўринларни эгаллаб келаётган ёшлар талайгина.
Жорий йилнинг 30 ноябрь – 15 декабрь кунлари Нукус шаҳрида бўлиб ўтган 18 ёшгача бўлган болалар ва ўсмирлар ўртасидаги шахмат спорти бўйича мусобақаларда туман БЎСМ ўқувчилари ҳам юқори натижаларни қўлга киритдилар. Хусусан, 2011 йилда туғилган ўсмирлар ўртасидаги баҳсларда Шоҳжаҳон Матсафоев, 2009 йилда туғилган ўсмир қизлар орасидаги баҳсларда Райҳона Шомуродова ҳамда 2006 йилда туғилган ўсмир қизлар ўртасида Дурдона Раҳимовлар фахрли 1-ўринни эгаллаб, Қорақалпоғистон Республикаси чемпиони бўлдилар.
Шунингдек, мазкур мусобақаларда ўз ёш тоифаларига кўра, Зиёда Саъдуллаева 2-ўринни , Ботиржон Рустамов, Улуғбек Рустамов ҳамда Севинчой Сафарбоевалар 3-ўринни эгаллашди.
Шуниси эътиборга лойиқки, мазкур спорт мусобақаларида биринчи ва иккинчи ўринларни эгаллаган БЎСМнинг ёш шахматчилари 2021 йилнинг январь-февраль ойларида Тошкент шаҳрида бўлиб ўтадиган 18 ёшгача бўлган болалар ва ўсмирлар ўртасидаги шахмат спорти бўйича Ўзбекистон чемпионатида Қорақалпоғистон Республикаси шарафини ҳимоя қилишади.
Айни кунларда ғолиб шахматчилар туман БЎСМнинг шахмат секциясида мураббийлари раҳбарлигида қизғин тайёргарлик босқичини ўташмоқда. Биз туманимизнинг иқтидорли, ёш шахматчиларига келгуси мусобақаларда катта ютуқлар тилаймиз.
Робия ЙЎЛДОШЕВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
