ТУМАНДАГИ БОШ ВАЗИР ҚАБУЛХОНАСИ ТАДБИРКОРЛАР КЎМАКЧИСИГА АЙЛАНДИ

Ўзбекистон Республикаси Бош вазирининг Амударё туманидаги Тадбиркорлар мурожаатларини кўриб чиқиш қабулхонаси томонидан тегишли ишчи гуруҳ, штаб, ваколатли органлар вакиллари ҳамкорлигида тадбиркорларга уларни қийнаётган, фаолиятига тўсиқ бўлаётган муаммоларни бартараф этишда яқиндан кўмак берилмоқда. Қабулхона ҳузуридаги фаол тадбиркорлар, ҳуқуқшунослар ва тадбиркорларнинг бошқа вакилларидан иборат Тадбиркорлар жамоатчилик кенгаши билан ҳам бу борада мунтазам равишда тегишли чора-тадбирлар амалга оширилмоқда.

Таъкидлаш жоизки, ўтган 2020 йил давомида қабулхона томонидан ҳудудларда 42 та сайёр қабуллар ташкил этилди. Олиб борилган тарғибот-ташвиқот ишлари ҳамда ўтказилган суҳбатлар давомида қабулхонада жами 326 та масалалар бўйича 313 та мурожаатлар рўйхатга олинди. Келиб тушган мурожаатларнинг 10 таси Республика миқёсидаги, 102 таси Қорақалпоғистон Республикаси миқиёсидаги, 201 таси туман миқёсидаги мурожаатлар бўлиб, мурожаатларнинг 71 таси ўтказилган сайёр қабуллар орқали, 98 таси бевосита қабулхонага мурожаат қилиш орқали, 139 таси “Ишонч телефони” орқали, 5 таси махсус портал орқали электрон тарзда келиб тушган.

Мурожаатлар асосан кредит ажратиш масаласида бўлиб, ушбу масала бўйича 104 та мурожаат қабул қилинди. Шунингдек, ер, кадастр ва архитектура қурилиш масалалари бўйича 58 та мурожаат қабул қилинган бўлиб, уларда асосан ер ресурслари ва давлат кадастри масаласи,  фермерлик ер масалалари, бино-иношоотлар ажратиш масалалари бўйича кўмак бериш сўралган. Ундан ташқари, инфратузилма масалалари бўйича 20 та, бошқа масалалар бўйича эса 144 та мурожаат қабул қилинди. Рўйхатга олинган 313 та мурожаатдан 251 таси қаноатлантирилди. Қолган 72 тасига тушунтиришлар берилиб, 3 та мурожаат рад этилди.

Ўтган йил давомида тадбиркорларнинг мурожаатлари кўриб чиқилиши мобайнида муддат бузилиши, юзаки кўриб чиқиш ҳолатларига йўл қўйган корхона-ташкилот раҳбарларига ушбу камчиликларни бартараф этиш юзасидан 7 та тақдимнома хатлари киритилиб, 4 нафар ходимга нисбатан интизомий таъсир чоралари кўрилди.

Қабулхонага 2020 йил 8 июль куни Тош ёп овулида яшовчи Давлатбой Жуманиязовнинг томорқасидаги иссиқхонасини кенгайтириш мақсадида “Ҳар бир оила – тадбиркор” дастури бўйича 30 млн. сўм кредит ажратилишида амалий ёрдам сўраб қилган мурожаати атрофлича ўрганиб чиқилди. Шундан сўнг, Халқ банкининг туман филиали кўмагида ушбу масалани ҳал этишга эътибор қаратилгани натижасида тадбиркор кредит маблағи эвазига томорқасидаги 7 сотих ер майдонига иссиқхона ташкил қилди. Ҳозирги кунда қўшимча даромад манбаига эга бўлган тадбиркор оила аъзолари билан биргаликда иссиқхонада иккинчи экиш мавсумига тайёргарлик кўришмоқда.

2020 йил 19 октябрь куни "Сарвинисо-Мавжуда" масъулияти чекланган жамияти раҳбари Кенжабой Ражабов ҳам рухсатнома, лицензия ва бошқа ҳужжатларни расмийлаштиришда ҳамда банкдан кредит ажратилишида амалий ёрдам сўраб Қабулхонага мурожаат қилди. Ушбу мурожаат ҳам атрофлича ўрганиб чиқилди ва ҳал этилишига яқиндан ёрдам кўрсатилди. Корхонасида янгидан учта иш ўрнини яратиб, 3 нафар фуқаро иш билан таъминланди.

Қабулхона ҳузурида ташкил этилган фаол тадбиркорлар, ҳуқуқшунослар ва тадбиркорларнинг бошқа вакилларидан иборат Жамоатчилик Кенгаши томонидан кичик бизнес ва тадбиркорликни ривожлантиришга тўсиқ ва ғов бўлаётган муаммолар ўрганилиб борилмоқда. Ўтган йил мобайнида Кенгаш томонидан 12 марта йиғилиш ўтказилиб, аниқланган муаммоларни бартараф этиш бўйича Кичик бизнес ва тадбиркорликни ривожлантириш агентлигига 17 та таклифлар киритилди.

Қабулхонанинг амалий ёрдами туфайли, элимиз фаровонлигига ҳисса қўшаётган тадбиркорлар сони кўпаймоқда. Тадбиркорларнинг ҳақ-ҳуқуқларини ҳимоя қилишда, муаммоларига ечим топишда Қабулхона томонидан кўрсатилаётган қатор амалий ёрдам ишбилармонликни рағбатлантиришга, аҳолига хизматлар кўрсатишни яхшилашга муҳим ҳисса бўлиб қўшилмоқда.

О. Худойберганова.