“СПОРТ БИЛАН СОҒЛОМ ҲАЁТ САРИ!” ШИОРИ ОСТИДА ҚИШКИ МАРАФОН ЎТКАЗИЛДИ

Дўрман овулида ҳудуддаги умумтаълим мактаб  ўқувчиларининг дарсдан бўш вақтларини мазмунли ўтказиш мақсадида ОФЙ раиси Отамурод Юсупов раҳбарлигида турли спорт мусобақалари, мактаблараро беллашувлар, кўнгилочар тадбирлар ўтказилиб келинади. Янги йил байрами арафасида 20-,84-, 70-сонли умумтаълим мактаблари ўқувчилари иштирокида ўтказилган қишки марафон “Соғлом ҳаёти сари!” деб номланди.
Қишки марафонни  ўтказишга бағишланган тадбирда туманимиздаги 9202 “К” ҳарбий қисмидан катта лейтенант Миршод Ҳамроев, туман Ички ишлар бўлими инспектори  Ўмирбой Носировлар иштирок этишди. Дўрман ОФЙ раиси Отамурод Юсупов  ўқувчи-ёшларга марафонни ўтказишдан кўзланган мақсад, аввало, уларнинг дарсдан бўш вақтларини мазмунли ўтказиш, қолаверса, спорт билан доимий шуғулланишлари учун зарур шароит яратишдан иборат эканлигини таъкидлади. Ўз навбатида 9202 “К” ҳарбий қисм катта лейтенанти Миршод Ҳамроев ва ИИБ инспектори Ўмирбой Носировлар спортнинг инсон камолотидаги роли ҳақида тўхталдилар.
Ўзаро аҳиллик, дўстлик руҳида ўтган “Спорт билан соғлом ҳаёт сари!” қишки марафонида ўғил болалар ўртасида  Нодир Отажонов, қиз болалар ўртасида Мафтуна Эркабоевалар 1-ўринни эгаллашди. Иккинчи ўрин Асрорбек Мадраҳимов ва Фарида Бобохоноваларга, учинчи ўрин эса Элбек Эркинбоев ҳамда Муниса Тожибоеваларга насиб этди.
Марафон ғолибларига Дўрман ОФЙ раиси Отамурод Юсупов қимматбаҳо совғалар ва пул мукофотлари тақдим этди.
Шунингдек, овул ёшлари ва 9202 “К” ҳарбий қисм аскарлари ўртасида футбол мусобақалари ҳам ўтказилди. Қизғин баҳслар ва дўстона ўтган футбол ўйинларидан овул ёшлари ва 9202 “К” ҳарбий қисм ёш аскарлари олам-олам завқ олдилар.

Маҳмуджон ШОМУРОДОВ.