Президентимизнинг Парламентга Мурожаатномаси бўйича тарғибот тадбири ўтказилди

Айни кунларда мамлакатимиз бўйлаб Ўзбекистон Республикаси Президенти Шавкат Мирзиёевнинг 2020 йил 29 декабрдаги Олий Мажлисга Мурожаатномасининг мазмун-моҳиятини кенг тарғиб қилиш мақсадида учрашувлар, давра суҳбатлари ўтказилмоқда. “2021 йил: янги марралар, якдил қадамлар” мавзусида ўтказилаётган тарғибот тадбирларида Президентимиз Шавкат Мирзиёевнинг Олий Мажлисга Мурожаатномасига батафсил шарҳ берилиб, жорий йилда амалга оширилиши режалаштирилаётган улкан ишлар ҳақида кенг маълумотлар тақдим қилинмоқда.

Бу каби тарғибот тадбирлари Амударё туманида ҳам ташкил қилинди. Тадбирларга бир қатор олий таълим муассасаларининг профессор-ўқитувчилари ташриф буюришди. Тошкент давлат иқтисодиёт университети профессорлари – фалсафа фанлари доктори Азамат Мухторов, Иқтисодиёт фанлари доктори Норбой Каримов, Самарқанд ветеринария медицинаси институти Нукус филиали доценти Куралбай Атаназаров, Ўзбекистон давлат жисмоний тарбия ва спорт университети Нукус филиали доценти Бахрам Утемуратов, Нукус давлат педагогика институти Педагогика кафедраси мудири Меруерт Пазилова, Тошкент ахборот технологиялари университети Нукус филиали доценти Шаригул Арзуова, Нукус давлат педагогика институти ассистенти Тўра Пазилов, Қорақалпоғистон тиббиёт институти кафедра мудири Гулмурод Хўжаметовлардан иборат тарғибот гуруҳи аъзолари бир неча кун давомида Амударё туманида бўлиб, учрашувларда иштирок этди.

Дастлабки тарғибот тадбири 15 январь куни Амударё туманидаги 82-сонли умумтаълим мактабида ташкил қилинди. Тадбирда 1-сектор ҳудудида жойлашган мактабларнинг директорлари ва уларнинг ўринбосарлари, маҳалла раислари ҳамда уларнинг ўринбосарлари, ҳудуддаги ташкилот ва корхона жамоалари ҳамда раҳбарлари, тадбиркорлар, ёшлар етакчилари, тиббиёт соҳаси вакиллари иштирок этди. Тадбирда тарғибот гуруҳи аъзолари, туман ҳокими Султонбой Йўлдошев ва бошқалар сўзга чиқиб, Президентимизнинг Парламентга Мурожаатномасининг мазмун-моҳияти ҳақида кенг турда тўхталиб ўтдилар.

Таъкидланганидек, Мурожаатномада мамлакатимизда 2020 йилда амалга оширилган ишлар натижалари сарҳисоб қилиниб, 2021 йилда ижтимоий-иқтисодий ривожлантиришнинг энг устувор йўналишлари ҳамда мамлакатни янада тараққий эттиришнинг асосий йўналишлари белгилаб берилди.

Президентимиз томонидан 2021 йил “Ёшларни қўллаб-қувватлаш ва аҳоли саломатлигини мустаҳкамлаш йили” деб номланиши ёшларга кўрсатилаётган эътибор давлат сиёсати даражасига кўтарилганлигининг яна бир исботи бўлди. Зеро, ватанимиз келажагини интеллектуал салоҳиятли, билимли, дунёқараши кенг ва юксак маънавиятли ёшларсиз тасаввур этиб бўлмайди. Мурожаатномада қайд этилганидек, ёшларни замонавий билим ва тажрибалар, миллий ва умумбашарий қадриятлар асосида мустақил ва  мантиқий фикрлайдиган, эзгу фазилатлар эгаси этиб вояга етказиш ҳар доим долзарб масала бўлиб келган ва бундан кейин ҳам шундай бўлиб қолади.

Муҳтарам Президентимиз Мурожаатномада инсон саломатлиги энг олий неъмат эканини яна бир бора эътироф этиб ўтдилар. Шу сабабли ҳам давлатимиз раҳбари 2021 йилда коронавирус пандемияси сабабли юзага келган мураккаб тиббий вазиятни яхшилаш йўлида барча имкониятлар сафарбар этилиб, аҳоли саломатлигини мустаҳкамлаш, соғлом турмуш тарзини тарғиб қилиш бўйича қатор ишлар амалга оширилишини таъкидлаб ўтдилар.

Тадбирда тарғибот гуруҳи аъзолари яқин истиқболдаги тараққиётимиз йўналишлари ҳақида кенг ахборот бериб, Мурожаатномада белгилаб берилган вазифалар ижросига кенг жамоатчиликни сафарбар қилиш лозимлиги ҳақида фикр билдирдилар.

Тадбир давомида тарғиботчилар томонидан “Мурожаатномада давлат ва жамият қурилиши тизимини такомиллаштиришдаги янги вазифалар”, “Суд-ҳуқуқ тизимини ислоҳ этиш ва қонунийликни мустаҳкамлашнинг устувор йўналишлари”, “Иқтисодиётда бозор механизмларини жорий этиш – узоқ муддатли барқарор ўсишнинг пойдевори”, “Мурожаатномада ижтимоий соҳани ривожлантириш борасида белгиланган вазифалар” ҳамда “Хавфсизлик, миллатлараро тотувлик ва диний бағрикенгликни таъминлаш ҳамда ташқи сиёсат соҳасидаги устувор йўналишлар”, “Ватанпарварлик ‒ инсонийликнинг олий тимсоли” каби мавзуларда маърузалар ўқилди.

Тарғиботчилар Мурожаатномани самарали ҳужжатга айлантирадиган нарса – унинг ижроси эканини таъкидлаб, Мурожаатномадан ўрин олган ғояларнинг ижросидан ҳар бир фуқаро бирдек манфаатдор бўлишини ҳаётий мисоллар орқали кенг турда тушунтирди.

Тарғибот тадбири очиқ ва самимий руҳда, расмиятчиликдан ҳоли равишда ўтказилди. Ташкилотчилар аудиториянинг ёш ва индивидуал хусусиятларини эътиборга олган ҳолда иштирокчилар билан самимий мулоқот қилдилар. Мурожаатнома юзасидан савол-жавоблар, викториналар ташкил қилиниб, ғолиблар ҳамда фаол иштирокчилар рағбатлантириб борилди.

Ғ.Ешниёзов