Prezidentimizning Parlamentga Murojaatnomasi boʻyicha targʻibot tadbiri oʻtkazildi

Ayni kunlarda mamlakatimiz boʻylab Oʻzbekiston Respublikasi Prezidenti Shavkat Mirziyoyevning 2020-yil 29-dekabrdagi Oliy Majlisga Murojaatnomasining mazmun-mohiyatini keng targʻib qilish maqsadida uchrashuvlar, davra suhbatlari oʻtkazilmoqda. “2021-yil: yangi marralar, yakdil qadamlar” mavzusida oʻtkazilayotgan targʻibot tadbirlarida Prezidentimiz Shavkat Mirziyoyevning Oliy Majlisga Murojaatnomasiga batafsil sharh berilib, joriy yilda amalga oshirilishi rejalashtirilayotgan ulkan ishlar haqida keng maʼlumotlar taqdim qilinmoqda.

Bu kabi targʻibot tadbirlari Amudaryo tumanida ham tashkil qilindi. Tadbirlarga bir qator oliy taʼlim muassasalarining professor-oʻqituvchilari tashrif buyurishdi. Toshkent davlat iqtisodiyot universiteti professorlari – falsafa fanlari doktori Azamat Muxtorov, Iqtisodiyot fanlari doktori Norboy Karimov, Samarqand veterinariya meditsinasi instituti Nukus filiali dotsenti Kuralbay Atanazarov, Oʻzbekiston davlat jismoniy tarbiya va sport universiteti Nukus filiali dotsenti Baxram Utemuratov, Nukus davlat pedagogika instituti Pedagogika kafedrasi mudiri Meruyert Pazilova, Toshkent axborot texnologiyalari universiteti Nukus filiali dotsenti Sharigul Arzuova, Nukus davlat pedagogika instituti assistenti Toʻra Pazilov, Qoraqalpogʻiston tibbiyot instituti kafedra mudiri Gulmurod Xoʻjametovlardan iborat targʻibot guruhi aʼzolari bir necha kun davomida Amudaryo tumanida boʻlib, uchrashuvlarda ishtirok etdi.

Dastlabki targʻibot tadbiri 15-yanvar kuni Amudaryo tumanidagi 82-sonli umumtaʼlim maktabida tashkil qilindi. Tadbirda 1-sektor hududida joylashgan maktablarning direktorlari va ularning oʻrinbosarlari, mahalla raislari hamda ularning oʻrinbosarlari, hududdagi tashkilot va korxona jamoalari hamda rahbarlari, tadbirkorlar, yoshlar yetakchilari, tibbiyot sohasi vakillari ishtirok etdi. Tadbirda targʻibot guruhi aʼzolari, tuman hokimi Sultonboy Yoʻldoshev va boshqalar soʻzga chiqib, Prezidentimizning Parlamentga Murojaatnomasining mazmun-mohiyati haqida keng turda toʻxtalib oʻtdilar.

Taʼkidlanganidek, Murojaatnomada mamlakatimizda 2020-yilda amalga oshirilgan ishlar natijalari sarhisob qilinib, 2021-yilda ijtimoiy-iqtisodiy rivojlantirishning eng ustuvor yoʻnalishlari hamda mamlakatni yanada taraqqiy ettirishning asosiy yoʻnalishlari belgilab berildi.

Prezidentimiz tomonidan 2021-yil “Yoshlarni qoʻllab-quvvatlash va aholi salomatligini mustahkamlash yili” deb nomlanishi yoshlarga koʻrsatilayotgan eʼtibor davlat siyosati darajasiga koʻtarilganligining yana bir isboti boʻldi. Zero, vatanimiz kelajagini intellektual salohiyatli, bilimli, dunyoqarashi keng va yuksak maʼnaviyatli yoshlarsiz tasavvur etib boʻlmaydi. Murojaatnomada qayd etilganidek, yoshlarni zamonaviy bilim va tajribalar, milliy va umumbashariy qadriyatlar asosida mustaqil va  mantiqiy fikrlaydigan, ezgu fazilatlar egasi etib voyaga yetkazish har doim dolzarb masala boʻlib kelgan va bundan keyin ham shunday boʻlib qoladi.

Muhtaram Prezidentimiz Murojaatnomada inson salomatligi eng oliy neʼmat ekanini yana bir bora eʼtirof etib oʻtdilar. Shu sababli ham davlatimiz rahbari 2021-yilda koronavirus pandemiyasi sababli yuzaga kelgan murakkab tibbiy vaziyatni yaxshilash yoʻlida barcha imkoniyatlar safarbar etilib, aholi salomatligini mustahkamlash, sogʻlom turmush tarzini targʻib qilish boʻyicha qator ishlar amalga oshirilishini taʼkidlab oʻtdilar.

Tadbirda targʻibot guruhi aʼzolari yaqin istiqboldagi taraqqiyotimiz yoʻnalishlari haqida keng axborot berib, Murojaatnomada belgilab berilgan vazifalar ijrosiga keng jamoatchilikni safarbar qilish lozimligi haqida fikr bildirdilar.

Tadbir davomida targʻibotchilar tomonidan “Murojaatnomada davlat va jamiyat qurilishi tizimini takomillashtirishdagi yangi vazifalar”, “Sud-huquq tizimini isloh etish va qonuniylikni mustahkamlashning ustuvor yoʻnalishlari”, “Iqtisodiyotda bozor mexanizmlarini joriy etish – uzoq muddatli barqaror oʻsishning poydevori”, “Murojaatnomada ijtimoiy sohani rivojlantirish borasida belgilangan vazifalar” hamda “Xavfsizlik, millatlararo totuvlik va diniy bagʻrikenglikni taʼminlash hamda tashqi siyosat sohasidagi ustuvor yoʻnalishlar”, “Vatanparvarlik ‒ insoniylikning oliy timsoli” kabi mavzularda maʼruzalar oʻqildi.

Targʻibotchilar Murojaatnomani samarali hujjatga aylantiradigan narsa – uning ijrosi ekanini taʼkidlab, Murojaatnomadan oʻrin olgan gʻoyalarning ijrosidan har bir fuqaro birdek manfaatdor boʻlishini hayotiy misollar orqali keng turda tushuntirdi.

Targʻibot tadbiri ochiq va samimiy ruhda, rasmiyatchilikdan holi ravishda oʻtkazildi. Tashkilotchilar auditoriyaning yosh va individual xususiyatlarini eʼtiborga olgan holda ishtirokchilar bilan samimiy muloqot qildilar. Murojaatnoma yuzasidan savol-javoblar, viktorinalar tashkil qilinib, gʻoliblar hamda faol ishtirokchilar ragʻbatlantirib borildi.

Gʻ.Yeshniyozov