КУЗГИ БУҒДОЙ СИФАТЛИ ПАРВАРИШЛАНМОҚДА

Кузги буғдойдан мўл ҳосил олиниши куз, қиш, баҳор мавсумида барча агротехник тадбирларни ўз вақтида сифатли ўтказишга боғлиқ.

Суғориладиган ер шароитида кузги буғдой парвариши буғдой уруғи экилганидан бошланади. Яъни уруғ бир текис  униб чиқишига намлик етарли бўлиши учун суғорилади.

Мақбул муддатларда экилган ғалла майдонларидан бир текис ниҳол олинганда ниҳолларнинг кузги ривожланиши  таъминланса, қишдан яхши чиқади. Чунки ғалла ниҳоллари униб чиққач, 20-25 кун ичида тупланиш фазаси бошланади. Агар ушбу муддат бироз кечикса, ҳар гектарига 5 тоннадан чириган гўнг сепиш энг самарали усулдир. Ғалла ниҳолининг ҳосилдор бўлиб етилишида маҳаллий ўғитнинг аҳамияти катта.

Ғалла майдонларини ҳар бир озиқлантиришдан сўнг, суғориш ишларини  амалга ошириш, бунда шарбат усулидан фойдаланиш жуда яхши самара беради. Ҳар 5 гектар ғалла майдонига 1 дона шарбат ўралар қазиш, ҳамда гектарига 5 тоннадан маҳаллий ўғит жамғариш кутилганидай ҳосил етиштиришга асос бўлади.

Туманимизда ҳам 2021 йил ҳосили учун экилган ғалла майдонларида бу муҳим ишга улкан эътибор берилаётир. Жами ғалла экилган 3800 гектар майдонларда текис ниҳол олишга эришилди ва кузги-қишни парваришлаш ишлари қизғин бормоқда. Шу кунгача режадаги 905 дона хандақ қазилиб, кузги суғориш ишлари шарбат усулида олиб борилди. Кунига  458 тоннадан зиёд маҳаллий ўғит буғдой далалари бошига жамғарилмоқда. Жамғарилган ўғитлар эса пешма-пеш буғдойзорларга сепилаяпти.

Бу ишларга туманимиздаги мавжуд муқобил машина трактор парклари техникалари фермер хўжаликларининг техникалари жалб этилаяпти. Шу боисдан ҳам кунига маҳаллий ўғит жамғариш режасининг икки ярим фоизидан ортиғи адо этилаётир.

Туманимизнинг Ҳолимбег, Қипчоқ овулларида ҳам буғдой парвариши, айниқса далаларга мўл ҳосил гарови ҳисобланмиш маҳаллий ўғит жамғариш ва сепиш ишлари қизғин олиб борилмоқда.

Маълумки мамлакатимиз қишлоқ хўжалигида кенг кўламли ислоҳотлар амалга оширилмоқда. Хусусан, ғалла етиштиришда давлат буюртмасидан воз кечилиб, нарх белгилаш эркинлаштирилди. Бундан кўзланган асосий мақсад – маҳсулот етиштириш ҳажмини кескин ошириш, деҳқоннинг манфаатдорлигини таъминлашдир.

Бугунги кунда коронавирус пандемияси инсонлар ҳаётига хавф солиш билан бирга бутун дунёни иқтисодий инқирозга ҳам олиб келаётгани тобора равшан бўлиб бормоқда.

Ана шундай вазиятда ғаллачиликдан юқори ҳосил олишга эришиш – мамлакатимиз аҳолисини хавфсиз дон маҳсулотлари билан таъминлашни яхшилашнинг гарови бўлиб хизмат қилади. Республикамизда бўлгани каби туманимизда ҳам бунинг учун айни кунларда барча чора-тадбирлар амалга оширилаяпти.

Ойгул РАЖАБОВА.