KUZGI BUGʻDOY SIFATLI PARVARIShLANMOQDA

Kuzgi bugʻdoydan moʻl hosil olinishi kuz, qish, bahor mavsumida barcha agrotexnik tadbirlarni oʻz vaqtida sifatli oʻtkazishga bogʻliq.

Sugʻoriladigan yer sharoitida kuzgi bugʻdoy parvarishi bugʻdoy urugʻi ekilganidan boshlanadi. Yaʼni urugʻ bir tekis  unib chiqishiga namlik yetarli boʻlishi uchun sugʻoriladi.

Maqbul muddatlarda ekilgan gʻalla maydonlaridan bir tekis nihol olinganda nihollarning kuzgi rivojlanishi  taʼminlansa, qishdan yaxshi chiqadi. Chunki gʻalla nihollari unib chiqqach, 20-25 kun ichida tuplanish fazasi boshlanadi. Agar ushbu muddat biroz kechiksa, har gektariga 5 tonnadan chirigan goʻng sepish eng samarali usuldir. Gʻalla niholining hosildor boʻlib yetilishida mahalliy oʻgʻitning ahamiyati katta.

Gʻalla maydonlarini har bir oziqlantirishdan soʻng, sugʻorish ishlarini  amalga oshirish, bunda sharbat usulidan foydalanish juda yaxshi samara beradi. Har 5 gektar gʻalla maydoniga 1 dona sharbat oʻralar qazish, hamda gektariga 5 tonnadan mahalliy oʻgʻit jamgʻarish kutilganiday hosil yetishtirishga asos boʻladi.

Tumanimizda ham 2021-yil hosili uchun ekilgan gʻalla maydonlarida bu muhim ishga ulkan eʼtibor berilayotir. Jami gʻalla ekilgan 3800 gektar maydonlarda tekis nihol olishga erishildi va kuzgi-qishni parvarishlash ishlari qizgʻin bormoqda. Shu kungacha rejadagi 905 dona xandaq qazilib, kuzgi sugʻorish ishlari sharbat usulida olib borildi. Kuniga  458 tonnadan ziyod mahalliy oʻgʻit bugʻdoy dalalari boshiga jamgʻarilmoqda. Jamgʻarilgan oʻgʻitlar esa peshma-pesh bugʻdoyzorlarga sepilayapti.

Bu ishlarga tumanimizdagi mavjud muqobil mashina traktor parklari texnikalari fermer xoʻjaliklarining texnikalari jalb etilayapti. Shu boisdan ham kuniga mahalliy oʻgʻit jamgʻarish rejasining ikki yarim foizidan ortigʻi ado etilayotir.

Tumanimizning Holimbeg, Qipchoq ovullarida ham bugʻdoy parvarishi, ayniqsa dalalarga moʻl hosil garovi hisoblanmish mahalliy oʻgʻit jamgʻarish va sepish ishlari qizgʻin olib borilmoqda.

Maʼlumki mamlakatimiz qishloq xoʻjaligida keng koʻlamli islohotlar amalga oshirilmoqda. Xususan, gʻalla yetishtirishda davlat buyurtmasidan voz kechilib, narx belgilash erkinlashtirildi. Bundan koʻzlangan asosiy maqsad – mahsulot yetishtirish hajmini keskin oshirish, dehqonning manfaatdorligini taʼminlashdir.

Bugungi kunda koronavirus pandemiyasi insonlar hayotiga xavf solish bilan birga butun dunyoni iqtisodiy inqirozga ham olib kelayotgani tobora ravshan boʻlib bormoqda.

Ana shunday vaziyatda gʻallachilikdan yuqori hosil olishga erishish – mamlakatimiz aholisini xavfsiz don mahsulotlari bilan taʼminlashni yaxshilashning garovi boʻlib xizmat qiladi. Respublikamizda boʻlgani kabi tumanimizda ham buning uchun ayni kunlarda barcha chora-tadbirlar amalga oshirilayapti.

Oygul RAJABOVA.