ИССИҚХОНАЛАРДА ЭКИН ЭКИШГА ТАЙЁРГАРЛИК КЎРИЛАЯПТИ
Мамлакатимизда халқимиз дастурхони тўкин-сочинлигига муҳим ҳисса қўшаётган иссиқхоналар сонини ошириш ва майдонини кенгайтириш, иссиқхона хўжаликларини барқарор ривожлантиришга қаратилган комплекс чора-тадбирлар ишлаб чиқиш ва амалга оширишга алоҳида эътибор берилаётир. Натижада ҳар бир ҳудуднинг тупроқ иқлим шароитларини ҳисобга олган ҳолда ҳосилдор сабзавот, полиз экинлари экилиб, юқори ҳосил етиштиришга муваффақ бўлинаётир.
Шуниси эътиборлики, кейинги йилларда бу борада хорижий инвестициялар иштирокида қатор лойиҳаларнинг самарали фаолияти йўлга қўйилмоқда.
Туманимизнинг Тошёп овулида Ёлғош Боймуродов раҳбарлик қилаётган «Mang‘it invest plyus» масъулияти чекланган жамият қўшма корхонасининг 1 гектарлик иссиқхонаси Хитой технологияси асосида фаолият юритади.
Ушбу иссиқхонада ўтган мавсумда помидор, бодринг каби экинлардан мўл ҳосил олинди ва етиштирилган маҳсулотлар асосан экспортга йўналтирилди. Ҳудуднинг 15 нафар фуқаролари иш билан таъминланган замонавий иссиқхонада помидорнинг “Аламино” нави етиштирилган эди. Ўтган мавсумдаги тажрибалардан келиб чиқиб, яна шу нав кўчатларини иссиқхонага ўтқазиш режалаштирилаяпти.
Бунинг учун иссиқхона ҳудудидаги экин майдони хас-чўплардан тозаланиб, янги мавсумга пухта тайёрланди.
Ҳозирги кунда иссиқхона ери сифатли ҳайдалиб, ўқариқлар олиниб, кўчат ўтқазишга сифатли тайёрланмоқда. Бунда кичик сурим агрегатни бошқараётган Болтамурод Қурбонов, Нуркен Ўрозовлар тупроқ қатламининг сифатли юмшатилишига алоҳида эътибор беришаяпти.
Сифатли ҳайдалган ерларга тортилаётган ўқариқларга эрта-индин кўчат ўтқазиш ишлари бошланади.
Хўжалик ишчилари ички бозорларимизни озиқ-овқат маҳсулотлари, барра сабзавотлар билан тўлдиришга ҳисса қўшиш билан чекланмай, маҳсулотларини экспортга ҳам йўналтиришни режалаштирмоқда.
Ўтган мавсумда ушбу иссиқхонадан 370 миллион сўмдан ортиқ соф даромад олинди.
Овулнинг яна бир тадбиркор, миришкор деҳқони Давлатбой Жуманиёзовнинг томорқасида 7 сотихлик иссиқхонаси бор. У ўтган йилларда ҳам шу ердан мўл ҳосил етиштириб, иссиқхонада экин экиш афзалликларини, фойдалилигини исботлаган эди.
У жорий мавсумга ҳам пухта тайёргарлик кўрди. Иссиқхонасини экинлар пояларидан тозалаб, ерини суғориб, экин экишга тайёр ҳолга келтирди. Ер тобига келиши билан сифатли юмшатиб, қулупнай экишга ҳозирлик кўраяпти. Бунинг учун тадбиркор ўқиб, изланиб, қулупнай экиш ва етиштиришга оид кўпгина билимларни эгаллади ва шунга кўра қулупнайни гидропоника усулида етиштиришни режалаштираяпти. Бунда ўсимлик учун зарур мўътадил омиллар сунъий равишда қопчада вужудга келтирилади ва кўчат шу қопчаларга экилади. Бундай усулда ўсимлик жадал ўсиб-ривожланади ва ҳосилдор бўлиб етилади.
Давлатбой Жуманиёзов мавсумда қулупнайдан мўл ҳосил етиштириш учун Тошкент шаҳридан 30 қути Калифорния чувалчангини ҳам олиб келиб, қулупнай кўчатлари қопчаларига солишга тайёрлаб қўйибди.
Ҳаракатда – баракат, дейди халқимиз. Ўз меҳнатлари билан аҳоли ризқ-рўзини мўл-кўл қилишга ҳисса қўшишдек эзгу ният билан экин экишга чоғланаётган тадбиркор деҳқонларга муваффақиятлар ёр бўлишини тилаб қоламиз.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
