ISSIQXONALARDA EKIN EKIShGA TAYYoRGARLIK KOʻRILAYaPTI

Mamlakatimizda xalqimiz dasturxoni toʻkin-sochinligiga muhim hissa qoʻshayotgan issiqxonalar sonini oshirish va maydonini kengaytirish, issiqxona xoʻjaliklarini barqaror rivojlantirishga qaratilgan kompleks chora-tadbirlar ishlab chiqish va amalga oshirishga alohida eʼtibor berilayotir. Natijada har bir hududning tuproq iqlim sharoitlarini hisobga olgan holda hosildor sabzavot, poliz ekinlari ekilib, yuqori hosil yetishtirishga muvaffaq boʻlinayotir.

Shunisi eʼtiborliki, keyingi yillarda bu borada xorijiy investitsiyalar ishtirokida qator loyihalarning samarali faoliyati yoʻlga qoʻyilmoqda.

Tumanimizning Toshyop ovulida Yolgʻosh Boymurodov rahbarlik qilayotgan «Mang‘it invest plyus» masʼuliyati cheklangan jamiyat qoʻshma korxonasining 1 gektarlik issiqxonasi Xitoy texnologiyasi asosida faoliyat yuritadi.

Ushbu issiqxonada oʻtgan mavsumda pomidor, bodring kabi ekinlardan moʻl hosil olindi va yetishtirilgan mahsulotlar asosan eksportga yoʻnaltirildi. Hududning 15 nafar fuqarolari ish bilan taʼminlangan zamonaviy issiqxonada pomidorning “Alamino” navi yetishtirilgan edi. Oʻtgan mavsumdagi tajribalardan kelib chiqib, yana shu nav koʻchatlarini issiqxonaga oʻtqazish rejalashtirilayapti.

Buning uchun issiqxona hududidagi ekin maydoni xas-choʻplardan tozalanib, yangi mavsumga puxta tayyorlandi.

Hozirgi kunda issiqxona yeri sifatli haydalib, oʻqariqlar olinib, koʻchat oʻtqazishga sifatli tayyorlanmoqda. Bunda kichik surim agregatni boshqarayotgan Boltamurod Qurbonov, Nurken Oʻrozovlar tuproq qatlamining sifatli yumshatilishiga alohida eʼtibor berishayapti.

Sifatli haydalgan yerlarga tortilayotgan oʻqariqlarga erta-indin koʻchat oʻtqazish ishlari boshlanadi.

Xoʻjalik ishchilari ichki bozorlarimizni oziq-ovqat mahsulotlari, barra sabzavotlar bilan toʻldirishga hissa qoʻshish bilan cheklanmay, mahsulotlarini eksportga ham yoʻnaltirishni rejalashtirmoqda.

Oʻtgan mavsumda ushbu issiqxonadan 370 million soʻmdan ortiq sof daromad olindi.

Ovulning yana bir tadbirkor, mirishkor dehqoni Davlatboy Jumaniyozovning tomorqasida 7 sotixlik issiqxonasi bor. U oʻtgan yillarda ham shu yerdan moʻl hosil yetishtirib, issiqxonada ekin ekish afzalliklarini, foydaliligini isbotlagan edi.

U joriy mavsumga ham puxta tayyorgarlik koʻrdi. Issiqxonasini ekinlar poyalaridan tozalab, yerini sugʻorib, ekin ekishga tayyor holga keltirdi. Yer tobiga kelishi bilan sifatli yumshatib, qulupnay ekishga hozirlik koʻrayapti. Buning uchun tadbirkor oʻqib, izlanib, qulupnay ekish va yetishtirishga oid koʻpgina bilimlarni egalladi va shunga koʻra qulupnayni  gidroponika usulida yetishtirishni rejalashtirayapti. Bunda oʻsimlik uchun zarur moʻʼtadil omillar sunʼiy ravishda qopchada vujudga keltiriladi va koʻchat shu qopchalarga ekiladi. Bunday usulda oʻsimlik jadal oʻsib-rivojlanadi va hosildor boʻlib yetiladi.

Davlatboy Jumaniyozov mavsumda qulupnaydan moʻl hosil yetishtirish uchun Toshkent shahridan 30 quti Kaliforniya chuvalchangini ham olib kelib, qulupnay koʻchatlari qopchalariga solishga tayyorlab qoʻyibdi.

Harakatda – barakat, deydi xalqimiz. Oʻz mehnatlari bilan aholi rizq-roʻzini moʻl-koʻl qilishga hissa qoʻshishdek ezgu niyat bilan ekin ekishga chogʻlanayotgan tadbirkor dehqonlarga muvaffaqiyatlar yor boʻlishini tilab qolamiz.

Oygul RAJABOVA.