“ЭЛ ЭЪТИРОФИ – МЕН УЧУН БАХТ”

Бобур овулида туғилиб ўсган Луиза Янгибоева умр бўйи тиббий пунктда фельдшер  бўлиб ишласа-да, овулдошлари “Тўлибой  дўхтир” дея ҳурмат билан тилга оладиган, эҳтиёж туғилганида ярим кечалари ҳам эшик қоқиб келгандан ёрдамини аямайдиган, элга қилган хизматидан ҳеч  оғринмайдиган отасига ўхшашни орзу қилиб, тиббиёт соҳасига қадам қўйди. Мактабни тугатгач, Андижон тиббиёт билим юртининг акушерлик бўлимига ўқишга кирди. Билим юртини муваффақиятли тугатиб, Андижон шаҳар туғруқ комплексида акушерка бўлиб ишлай бошлади.

Ўша йиллар унинг танлаган касбининг масъулиятини теран англаб етган, акушерлик маҳоратини ошириши йўлида муҳим давр бўлиб қолди ҳаётида.  Туғруқ жараёнига ҳар бир аёлни қабул қилган вақтида доим онасининг “аёл боласини  жонини хатарга қўйиб, икки дунё оралиғида туриб дунёга келтиради, уларга қўлингдан келганича ёрдам берсанг, ширин сўзинг билан тасалли берсанг, савоб бўлади”, деган сўзлари қулоқларида янграрди.

Ота-онасидан олисда, улар соғинчи билан яшаб юрган қиз бутун меҳрини кўзи ёриётган аёлларга кўрсатар, тўлғоқ азоби ҳам аёл учун бахт эканлигини, ҳадемай фарзандини бағрига олишини айтиб, уларни юпатар,  тасалли берарди.

1999 йилнинг июлида туманимизга қайтиб, 2005 йилгача туман Тиббиёт бирлашмасининг туғруқхона бўлимида катта доя бўлиб, 2015-2018 йилларда ҳомиладор аёллар патологияси бўлимида ҳамшира бўлиб ишлади. 2018 йилдан ҳозирги кунгача туман Тиббиёт бирлашмасининг катта ҳамшираси бўлиб ишлаб келмоқда.

Ўз касбига масъулияти, меҳри уни доимо жамоасида обрў-эътиборли қилиб келмоқда.

– Одам ўз фаолиятидан қониқса, касбида ихлос билан ишласа, чарчамайди, – дейди Луиза Янгибоева кулиб. – Аксинча, вақт ўтишини санаб, бу ишни эртага қилсам ҳам бўлар деб, ё қўл учида ишлаган одам доим ҳорғин юради. Бизнинг соҳада иккинчи даражали ишнинг ўзи йўқ.

Луиза ўз ишига ана шундай ёндошгани учун ҳам ишлаб чарчамайди. Ишдан келиб оиласида фарзандлари тарбияси билан шуғулланади, ўқишларини, хулқини назорат қилади, мол боқиб оиласида қўшимча даромад манбаи яратилишига, томорқа ерида оиласи эҳтиёжига зарур маҳсулотлар етиштирилишига кўмаклашади.

Бугун у бахтли оила соҳибаси. Турмуш ўртоғи билан ҳамжиҳатликда вояга етказаётган фарзандлари орзу-интилишларига қанот. Тўнғичи Элдор хорижий олийгоҳнинг, қизи Ирода эса тиббиёт олийгоҳи талабалари. Кичкинаси эса ҳали мактаб ўқувчиси.

Олий тоифали ҳамшира Луиза Янгибоева ўз фаолиятида ҳамкасбларининг, одамларнинг эътирофларидан руҳий қувват олиб, ғайрат-шижоат билан ишлашга, ўрта тиббиёт ходимларига одилона муносабатда бўлиб, меҳнатларини муносиб баҳолаб, камчиликларини ўз вақтида бартараф этишига кўмаклашишга интилади. Буни ўзи учун улкан бахт деб ҳисоблайди.

Юртимизда 8 март – Халқаро хотин-қизлар куни кенг нишонланаётган ушбу сурурли дамларда ўз касбининг фидойиси бўлган Луизахонни ҳам байрам билан қутлаб қоламиз.

Ойгул РАЖАБОВА.