Аскар ўғилнинг муваффақиятидан бахтиёр ота-она
Атрофимизда оилавий қадриятларни юксак билиб, жамиятимизнинг таянчига айланган кўплаб намунали оилалар бор. Уларнинг ҳалол меҳнат, самимият ва ўзаро меҳр-муҳаббат билан яшаш тарзи келажак авлод учун ибратдир. Амударё туманининг Дўстлик маҳалласида истиқомат қилувчи Саидабдулла Ўтапов ва Мунаввар Эшжонова оиласи ҳам ана шундай ибратли оилалардан бири саналади. Уларнинг ҳаёт йўли, оилавий қадриятлари ва фарзандларига бўлган муносабатлари бошқалар учун намуна, десак адашмаймиз.
Саидабдулла Ўтапов болалигидан санъатга меҳр қўйиб, 1995 йилдан буён тўй-маросимларни ва бошқа тадбирларни видеотасвирга олиш ишлари билан шуғулланиб келади. У ўз касби орқали юзлаб оилаларнинг бахтли дамларини абадийликка муҳрлаб, эл-юрт олдида ҳурмат қозонган. Бугунги кунда Саидабдулла Ўтапов “Шер Медиа” студиясига раҳбарлик қилиб, ўз соҳаси бўйича кўплаб тажрибали шогирдларни тарбиялаган устоз саналади.
Мунаввар Эшжонова эса тиббиёт соҳасида фаолият юритиб, 2016 йилдан буён Амударё тумани Тиббиёт бирлашмасида кичик ҳамшира сифатида ишлаб келяпти. У беморлар дардига малҳам бўлишни ўз ҳаётининг мазмуни деб билади. Уларнинг умр йўллари нафақат меҳнатга садоқат, балки бир-бирларига бўлган ҳурмат ва меҳрнинг ёрқин намунасидир.
Иккала қаҳрамонимиз 1997 йилда оила қуриб, уч нафар фарзандни жамиятга наф келтирадиган инсонлар қилиб вояга етказишмоқда. Ота-она тарбиясида улғайган фарзандларининг барчаси ўз касбларида муваффақиятларга эришиб, оиласи ва жамият учун хизмат қилмоқда. Катта қизи Сурайё Худойберганова мактабгача таълим ташкилотида тарбиячи сифатида ишлаб, болаларнинг тарбияси ва ривожланишига катта ҳисса қўшмоқда. Ўртанча фарзанд Шоҳруҳ Худойберганов отаси Саидабдулла аканинг ёрдамчиси. У видеотасвирга олиш соҳасида фаолият юритиб, оилавий анъаналарни давом эттиряпти.
Оиланинг кенжа фарзанди Шерзод Худойберганов эса болалигидан ҳарбий ҳаётга катта қизиқиш билан қарар, бу соҳани ўзининг келажакдаги йўли сифатида танлаган эди. У мактаб давридаёқ чақириққача тайёргарлик фанини қизиқиб ўрганди, қўшимча равишда ҳарбийларга оид китобларни мутолаа қилиб, билимини бойитди. Жисмоний чиниқиш ва спорт, хусусан, футбол ҳаётининг ажралмас қисмига айланди.
2023 йилда Шерзод мактабни аъло баҳолар билан тамомлаганидан сўнг, ҳарбий хизматга чақирилган тенгқурлари қаторида тиббий, ақлий-маънавий ва жисмоний синовлардан муваффақиятли ўтди. У ўзининг қатъияти ва тайёргарлиги билан тенгдошларидан анча ажралиб турарди. Бугунги кунда Шерзод Самарқанд шаҳрида, Ўзбекистон Республикаси Қуролли Кучлари кичик мутахассисларни тайёрлаш маркази коммендантлик взводи 3-гуруҳ ўқчиси бўлиб, ҳарбий хизматни шараф билан ўтаяпти.
Шерзод ҳарбий қисмдаги дастлабки кунларданоқ ўзининг чаққонлиги, интизоми ва масъулияти билан раҳбарият эътиборини қозонди. У берилган топшириқларни аъло даражада бажариб, қисқа вақт ичида хизматдошлари орасида ҳурматга сазовор бўлди. Жисмоний машқларга бўлган қизиқиши ва меҳнатсеварлиги унга ҳарбий ҳаётга тез мослашишда ёрдам берди.
Шерзоднинг хизмат давомида эришган ютуқлари ота-онасини янада қувонтирди. Ҳарбий хизматдаги намунали хизмати сабаб, Шимоли-ғарбий ҳарбий округ томонидан Саидабдулла ака ва Мунаввар опага миннатдорчилик хати топширилди. Бу албатта, ота-онанинг меҳнати ва тарбиясининг натижасидир.
Ҳарбий хизмат давомида Шерзод ўзининг замонавий технологияларга бўлган қизиқишини ривожлантириб, компьютер мутахассиси сифатидаги маҳоратини намойиш этди. Унинг келгуси режаси – ҳуқуқни муҳофаза қилиш соҳаларида фаолият юритишдир. У бу орқали нафақат оиласининг, балки бутун жамиятнинг ишончини оқлашни ният қилган.
Ҳозирда оддий аскар Шерзод Худойберганов олий таълим муассасаларига киришда имтиёз берадиган тавсиянома учун жисмоний ва назарий тестларга астойдил таёргарлик кўрмоқда. Ҳарбий хизматдаги муваффақиятлари унинг болаликдаги орзуларининг амалга ошаётганини кўрсатади. Шубҳасиз, фарзандининг бундай масъулиятли йўлда ўзини намоён этаётгани ҳар бир ота-онага фахр бахш этади.
Ўтаповлар оиласи ўз тарбияси ва ҳалол меҳнати билан фарзандларига нафақат ҳаётий билим, балки инсоний қадриятларни ҳам ўргатиб келмоқда. Бу каби намунали оилалар жамиятимизнинг мустаҳкам пойдевори бўлиб, улар бағрида вояга етаётган фарзандлар келгусида мамлакат равнақига ўз ҳиссасини қўшиши шубҳасиз.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
