ЎЗ ОИЛАСИДА БАХТИЁР, ҲАМҚИШЛОҚЛАРИГА БАХТ УЛАШИШГА ИНТИЛАЁТГАН ХОТИН-ҚИЗЛАР ФАОЛИ

Амир Темур номли овул фуқаролар йиғини хотин-қизлар фаоли Дилдора Худойберганова учун ҳамқишлоқларининг турмуш тарзига оид муаммоларини ҳал этишга кўмаклашиш шу эл фарзанди сифатида ҳаётий эҳтиёж каби ўта муҳим.

- Мен шу қишлоқда туғилиб-ўсганман. Ҳамқишлоқларимнинг барчаси худди эт билан тирноқ каби тақдирлари бири-бирига туташ, қон-қариндош, қардош, мен ҳам улардан бириман, - дейди Дилдорахон Амир Темурликлар ҳақида.

Қишлоқ аҳолисининг асосий қисми ўзбеклар бўлса-да, Дилдорахон айтганларидай, азалий қон-қариндош ва қардош бўлган ҳамқишлоқлар учун туркман, қозоқ, қорақалпоқ, татар, рус миллатига мансуб аҳоли вакиллари элдошларининг яхшисини ошириб, ёмонини яшириб, ниҳоятда аҳил-иноқликда яшашади. Бири-бирининг тилини ва дилини юракдан англаб, тотувлик туғини бошларига жиға қилиб олган Амир Темурликларнинг аҳилликлари таҳсинга муносиб.

Оилалардаги ҳамжиҳатлик овул ҳаётига файз бағишлайди, албатта. Бундайин ҳамжиҳатлик муҳитини яратишда ОФЙ раиси Ойбек Юсупов раҳбарлигидаги овул масъулларининг фидойиликлари, ҳамкорликдаги фаолиятлари муҳим аҳамиятга эга.

Илк меҳнат фаолиятини 2016-2018 йилларда қишлоқдаги 4-сонли умумтаълим мактабида ўқитувчи бўлиб ишлашдан бошлаган Дилдора Худойберганованинг номзодини 2018 йилда ОФЙ хотин-қизлар фаоли лавозимига қўйишганида бироз иккиланди:

- Қишлоқ ҳудуди катта, аҳолиси кўпмиллатли, қандай бўларкан? – деган ҳадик билан ҳужжатларини тақдим этди.

Олий маълумотли она тили ва адабиёт фани ўқитувчиси, ижодкор, маънавиятли қизнинг хотин-қизлар фаоли сифатида ОФЙда фаолият олиб боришидан ҳамқишлоқлари, тўғриси, мамнун бўлишди. Тўғри-да, гапини ўрнида айта оладиган мулойим, самимий, ўзгалар ташвишига оғринмай елка тутадиган Дилдора Худойбергановадан муносиб номзод борми?!

Барчага манзур бўлган Дилдорахон шижоат билан ишга киришди. Ўзбек оилаларининг кайвони, ибратли онахонлари билан туркман оилаларининг намунали эжелари, уддабурон қозоқ женгейлари, қорақалпоқ кемпир апайлари билан бамаслаҳат аёл-қизлар орасидан кўча бошчилари сайланишига эътибор қаратди. ОФЙ раиси Ойбек Юсупов, овулдаги ҳоким ёрдамчиси, ёшлар етакчиси, ҳудуд бўйича профилактика инспектори ҳамда ҳудудий инспектор-психологлар билан ҳамкорлик туфайли фақат 2023 йилнинг ўзида “Аёллар дафтари” рўйхатига киритилган 13 нафар аёл-қизларга ўз давромад манбаларини яратишлари учун имтиёзли кредит олишларига кўмаклашди. 1 нафар аёлнинг қизиқишлари, чеварлик ҳунари инобатга олиниб, қасбга ўқитилди ва субсидия асосида тикув машинаси билан таъминланди. Яна бир аёл эса доимий ишга жойлаштирилиб, ижтимоий ҳимояга муҳтож 17 нафар хотин-қизлар мавсумий иш билан таъминланишди.

Оилаларнинг тинч-тотувлиги нафақат ўша оилаларга, балки жамиятимизга ҳам зийнат, файз-барака бағишлашини Амир Темурликлар жуда яхши билишади. Оилаларда ана шундай тўкисликни таъминлашда Дилдора Худойберганова кайвони, ибратли онахонлар бамаслаҳат қозоқ, қорақалпоқ оилаларида асрлар давомида шаклланган ўзаро меҳр-оқибат, бағрикенглик, тотувлик туйғулари дарз кетмаслиги учун жон куйдиради. ОФЙ раиси Ойбек Юсупов ва қишлоқнинг кайвони онахонлари билан биргаликда оилавий низолар туфайли ажрашиш ёқасига бориб қолган 9та оила яраштирилиб, ҳамжиҳатликда яшашларига эришилгани ҳам ана шу гўзал туйғуларнинг устуворлигидан, қишлоқ кайвони онахонларининг тадбирли, ҳамфикр ва ҳамжиҳатлигидан! Бундан ҳам муҳими, ОФЙ хотин-қизлар фаоли Дилдора Худойберганованинг зиммасидаги масъулиятни чуқур ҳис қилиб, ҳамқишлоқларига қайишиб, эл бўлиб кетганидан.

- Қишлоғимиздаги ҳар бир аёл-қиз ҳаётига оид муаммонинг ижобий ҳал этилиши худди ўз шахсий муаммойимнинг ҳад этилиши каби кўнглимга хотиржамлик бағишлайди, - дейди Дилдора мамнуният билан.

Жамиятда аёлнинг тинч, хотиржам фаолият юритиши, албатта, унинг оилавий ҳаётига кўп жиҳатдан боғлиқ. Дилдоранинг бу томондан кўнгли тўқ. У бахтиёр оила бекаси, ибратли келин. Умр йўлдоши, Жумуртов ШФЙ ҳоким ёрдамчиси Равшан Ариков билан икки нафар фарзандни тарбиялаб, вояга етказишмоқда.

- Ишлашим, жамиятга фаол аралашишим учун барча шароитларни яратиб бергани учун оилам, умр йўлдошимдан миннатдорман, - дейди у эҳтиром билан. – Оиладаги ана шу ғамхўрлик туфайли жуда бахтиёрман.

Ўзини бахтиёр ҳис этган инсон ҳамиша ўзгаларга бахт улашишга қодир бўлади. Дилдорахон Худойберганованинг ҳар бир иш куни ҳамқишлоқ аёллар турмушини тўкис, уларнинг мушкулларини осон қилишдек эзгу ниятлар билан ўтади. Ўзи айтганидай, Амир Темурлик аёлларнинг қувончи ҳам, ташвиши ҳам ўзиники.

Робия ЙЎЛДОШЕВА.