OʻZ OILASIDA BAXTIYoR, HAMQIShLOQLARIGA BAXT ULAShIShGA INTILAYoTGAN XOTIN-QIZLAR FAOLI

Amir Temur nomli ovul fuqarolar yigʻini xotin-qizlar faoli Dildora Xudoyberganova uchun hamqishloqlarining turmush tarziga oid muammolarini hal etishga koʻmaklashish shu el farzandi sifatida hayotiy ehtiyoj kabi oʻta muhim.

- Men shu qishloqda tugʻilib-oʻsganman. Hamqishloqlarimning barchasi xuddi et bilan tirnoq kabi taqdirlari biri-biriga tutash, qon-qarindosh, qardosh, men ham ulardan biriman, - deydi Dildoraxon Amir Temurliklar haqida.

Qishloq aholisining asosiy qismi oʻzbeklar boʻlsa-da, Dildoraxon aytganlariday, azaliy qon-qarindosh va qardosh boʻlgan hamqishloqlar uchun turkman, qozoq, qoraqalpoq, tatar, rus millatiga mansub aholi vakillari eldoshlarining yaxshisini oshirib, yomonini yashirib, nihoyatda ahil-inoqlikda yashashadi. Biri-birining tilini va dilini yurakdan anglab, totuvlik tugʻini boshlariga jigʻa qilib olgan Amir Temurliklarning ahilliklari tahsinga munosib.

Oilalardagi hamjihatlik ovul hayotiga fayz bagʻishlaydi, albatta. Bundayin hamjihatlik muhitini yaratishda OFY raisi Oybek Yusupov rahbarligidagi ovul masʼullarining fidoyiliklari, hamkorlikdagi faoliyatlari muhim ahamiyatga ega.

Ilk mehnat faoliyatini 2016-2018-yillarda qishloqdagi 4-sonli umumtaʼlim maktabida oʻqituvchi boʻlib ishlashdan boshlagan Dildora Xudoyberganovaning nomzodini 2018-yilda OFY xotin-qizlar faoli lavozimiga qoʻyishganida biroz ikkilandi:

- Qishloq hududi katta, aholisi koʻpmillatli, qanday boʻlarkan? – degan hadik bilan hujjatlarini taqdim etdi.

Oliy maʼlumotli ona tili va adabiyot fani oʻqituvchisi, ijodkor, maʼnaviyatli qizning xotin-qizlar faoli sifatida OFYda faoliyat olib borishidan hamqishloqlari, toʻgʻrisi, mamnun boʻlishdi. Toʻgʻri-da, gapini oʻrnida ayta oladigan muloyim, samimiy, oʻzgalar tashvishiga ogʻrinmay yelka tutadigan Dildora Xudoyberganovadan munosib nomzod bormi?!

Barchaga manzur boʻlgan Dildoraxon shijoat bilan ishga kirishdi. Oʻzbek oilalarining kayvoni, ibratli onaxonlari bilan turkman oilalarining namunali ejelari, uddaburon qozoq jengeylari, qoraqalpoq kempir apaylari bilan bamaslahat ayol-qizlar orasidan koʻcha boshchilari saylanishiga eʼtibor qaratdi. OFY raisi Oybek Yusupov, ovuldagi hokim yordamchisi, yoshlar yetakchisi, hudud boʻyicha profilaktika inspektori hamda hududiy inspektor-psixologlar bilan hamkorlik tufayli faqat 2023-yilning oʻzida “Ayollar daftari” roʻyxatiga kiritilgan 13 nafar ayol-qizlarga oʻz davromad manbalarini yaratishlari uchun imtiyozli kredit olishlariga koʻmaklashdi. 1 nafar ayolning qiziqishlari, chevarlik hunari inobatga olinib, qasbga oʻqitildi va subsidiya asosida tikuv mashinasi bilan taʼminlandi. Yana bir ayol esa doimiy ishga joylashtirilib, ijtimoiy himoyaga muhtoj 17 nafar xotin-qizlar mavsumiy ish bilan taʼminlanishdi.

Oilalarning tinch-totuvligi nafaqat oʻsha oilalarga, balki jamiyatimizga ham ziynat, fayz-baraka bagʻishlashini Amir Temurliklar juda yaxshi bilishadi. Oilalarda ana shunday toʻkislikni taʼminlashda Dildora Xudoyberganova kayvoni, ibratli onaxonlar bamaslahat qozoq, qoraqalpoq oilalarida asrlar davomida shakllangan oʻzaro mehr-oqibat, bagʻrikenglik, totuvlik tuygʻulari darz ketmasligi uchun jon kuydiradi. OFY raisi Oybek Yusupov va qishloqning kayvoni onaxonlari bilan birgalikda oilaviy nizolar tufayli ajrashish yoqasiga borib qolgan 9ta oila yarashtirilib, hamjihatlikda yashashlariga erishilgani ham ana shu goʻzal tuygʻularning ustuvorligidan, qishloq kayvoni onaxonlarining tadbirli, hamfikr va hamjihatligidan! Bundan ham muhimi, OFY xotin-qizlar faoli Dildora Xudoyberganovaning zimmasidagi masʼuliyatni chuqur his qilib, hamqishloqlariga qayishib, el boʻlib ketganidan.

- Qishlogʻimizdagi har bir ayol-qiz hayotiga oid muammoning ijobiy hal etilishi xuddi oʻz shaxsiy muammoyimning had etilishi kabi koʻnglimga xotirjamlik bagʻishlaydi, - deydi Dildora mamnuniyat bilan.

Jamiyatda ayolning tinch, xotirjam faoliyat yuritishi, albatta, uning oilaviy hayotiga koʻp jihatdan bogʻliq. Dildoraning bu tomondan koʻngli toʻq. U baxtiyor oila bekasi, ibratli kelin. Umr yoʻldoshi, Jumurtov ShFY hokim yordamchisi Ravshan Arikov bilan ikki nafar farzandni tarbiyalab, voyaga yetkazishmoqda.

- Ishlashim, jamiyatga faol aralashishim uchun barcha sharoitlarni yaratib bergani uchun oilam, umr yoʻldoshimdan minnatdorman, - deydi u ehtirom bilan. – Oiladagi ana shu gʻamxoʻrlik tufayli juda baxtiyorman.

Oʻzini baxtiyor his etgan inson hamisha oʻzgalarga baxt ulashishga qodir boʻladi. Dildoraxon Xudoyberganovaning har bir ish kuni hamqishloq ayollar turmushini toʻkis, ularning mushkullarini oson qilishdek ezgu niyatlar bilan oʻtadi. Oʻzi aytganiday, Amir Temurlik ayollarning quvonchi ham, tashvishi ham oʻziniki.

Robiya YOʻLDOShEVA.