Askar oʻgʻilning muvaffaqiyatidan baxtiyor ota-ona

Atrofimizda oilaviy qadriyatlarni yuksak bilib, jamiyatimizning tayanchiga aylangan koʻplab namunali oilalar bor. Ularning halol mehnat, samimiyat va oʻzaro mehr-muhabbat bilan yashash tarzi kelajak avlod uchun ibratdir. Amudaryo tumanining Doʻstlik mahallasida istiqomat qiluvchi Saidabdulla Oʻtapov va Munavvar Eshjonova oilasi ham ana shunday ibratli oilalardan biri sanaladi. Ularning hayot yoʻli, oilaviy qadriyatlari va farzandlariga boʻlgan munosabatlari boshqalar uchun namuna, desak adashmaymiz.

Saidabdulla Oʻtapov bolaligidan sanʼatga mehr qoʻyib, 1995-yildan buyon toʻy-marosimlarni va boshqa tadbirlarni videotasvirga olish ishlari bilan shugʻullanib keladi. U oʻz kasbi orqali yuzlab oilalarning baxtli damlarini abadiylikka muhrlab, el-yurt oldida hurmat qozongan. Bugungi kunda Saidabdulla Oʻtapov “Sher Media” studiyasiga rahbarlik qilib, oʻz sohasi boʻyicha koʻplab tajribali shogirdlarni tarbiyalagan ustoz sanaladi.

Munavvar Eshjonova esa tibbiyot sohasida faoliyat yuritib, 2016-yildan buyon Amudaryo tumani Tibbiyot birlashmasida kichik hamshira sifatida ishlab kelyapti. U bemorlar dardiga malham boʻlishni oʻz hayotining mazmuni deb biladi. Ularning umr yoʻllari nafaqat mehnatga sadoqat, balki bir-birlariga boʻlgan hurmat va mehrning yorqin namunasidir.

Ikkala qahramonimiz 1997-yilda oila qurib, uch nafar farzandni jamiyatga naf keltiradigan insonlar qilib voyaga yetkazishmoqda. Ota-ona tarbiyasida ulgʻaygan farzandlarining barchasi oʻz kasblarida muvaffaqiyatlarga erishib, oilasi va jamiyat uchun xizmat qilmoqda. Katta qizi Surayyo Xudoyberganova maktabgacha taʼlim tashkilotida tarbiyachi sifatida ishlab, bolalarning tarbiyasi va rivojlanishiga katta hissa qoʻshmoqda. Oʻrtancha farzand Shohruh Xudoyberganov otasi Saidabdulla akaning yordamchisi. U videotasvirga olish sohasida faoliyat yuritib, oilaviy anʼanalarni davom ettiryapti.

Oilaning kenja farzandi Sherzod Xudoyberganov esa bolaligidan harbiy hayotga katta qiziqish bilan qarar, bu sohani oʻzining kelajakdagi yoʻli sifatida tanlagan edi. U maktab davridayoq chaqiriqqacha tayyorgarlik fanini qiziqib oʻrgandi, qoʻshimcha ravishda harbiylarga oid kitoblarni mutolaa qilib, bilimini boyitdi. Jismoniy chiniqish va sport, xususan, futbol hayotining ajralmas qismiga aylandi.

2023-yilda Sherzod maktabni aʼlo baholar bilan tamomlaganidan soʻng, harbiy xizmatga chaqirilgan tengqurlari qatorida tibbiy, aqliy-maʼnaviy va jismoniy sinovlardan muvaffaqiyatli oʻtdi. U oʻzining qatʼiyati va tayyorgarligi bilan tengdoshlaridan ancha ajralib turardi. Bugungi kunda Sherzod Samarqand shahrida, Oʻzbekiston Respublikasi Qurolli Kuchlari kichik mutaxassislarni tayyorlash markazi kommendantlik vzvodi 3-guruh oʻqchisi boʻlib, harbiy xizmatni sharaf bilan oʻtayapti.

Sherzod harbiy qismdagi dastlabki kunlardanoq oʻzining chaqqonligi, intizomi va masʼuliyati bilan rahbariyat eʼtiborini qozondi. U berilgan topshiriqlarni aʼlo darajada bajarib, qisqa vaqt ichida xizmatdoshlari orasida hurmatga sazovor boʻldi. Jismoniy mashqlarga boʻlgan qiziqishi va mehnatsevarligi unga harbiy hayotga tez moslashishda yordam berdi.

Sherzodning xizmat davomida erishgan yutuqlari ota-onasini yanada quvontirdi. Harbiy xizmatdagi namunali xizmati sabab, Shimoli-gʻarbiy harbiy okrug tomonidan Saidabdulla aka va Munavvar opaga minnatdorchilik xati topshirildi. Bu albatta, ota-onaning mehnati va tarbiyasining natijasidir. 

Harbiy xizmat davomida Sherzod oʻzining zamonaviy texnologiyalarga boʻlgan qiziqishini rivojlantirib, kompyuter mutaxassisi sifatidagi mahoratini namoyish etdi. Uning kelgusi rejasi – huquqni muhofaza qilish sohalarida faoliyat yuritishdir. U bu orqali nafaqat oilasining, balki butun jamiyatning ishonchini oqlashni niyat qilgan.

Hozirda oddiy askar Sherzod Xudoyberganov oliy taʼlim muassasalariga kirishda imtiyoz beradigan tavsiyanoma uchun jismoniy va nazariy testlarga astoydil tayorgarlik koʻrmoqda. Harbiy xizmatdagi muvaffaqiyatlari uning bolalikdagi orzularining amalga oshayotganini koʻrsatadi. Shubhasiz, farzandining bunday masʼuliyatli yoʻlda oʻzini namoyon etayotgani har bir ota-onaga faxr baxsh etadi.

Oʻtapovlar oilasi oʻz tarbiyasi va halol mehnati bilan farzandlariga nafaqat hayotiy bilim, balki insoniy qadriyatlarni ham oʻrgatib kelmoqda. Bu kabi namunali oilalar jamiyatimizning mustahkam poydevori boʻlib, ular bagʻrida voyaga yetayotgan farzandlar kelgusida mamlakat ravnaqiga oʻz hissasini qoʻshishi shubhasiz.

Shohzod Qurbonboyev