ОВ ҚУРОЛЛАРИНИ САҚЛАШ ТАРТИБИ ТУШУНТИРИЛДИ
Мамлакатимиз ҳудудида ов қуролларини сақлаш ва олиб юриш учун овчилик, балиқчилик ва спорт жамиятига аъзо бўлгандан сўнг, ички ишлар бўлимлари томонидан рухсатнома берилади. Овчилик, балиқчилик ва спорт жамиятига аъзо бўлмасдан ҳамда ички ишлардан рухсатнома олмасдан туриб, ҳар қандай ўқ-дори ва қуролларни сақлаш ноқонунийдир.
Фуқароларнинг ўз хонадонида ноқонуний равишда ов милтиқларини сақлаши ҳам жиноятдир. Ноқонуний қурол сақлаш қонунга зид бўлиши билан бирга инсон ҳаёти учун ўта хавфли восита саналади. Бундай қоидабузарликлар Ўзбекистон Республикаси Жиноят кодексининг 248-моддаси бўйича жиноий жавобгарликка тортилишига сабаб бўлади.
Шу сабабли жойларда фуқароларга тегишли бўлган қуролларнинг сақланиши ва улардан фойдаланилиши устидан назоратни кучайтириш, қурол билан боғлиқ турли нохуш ҳолатларнинг олдини олиш мақсадида Ўзбекистон Республикасининг 2019 йил 29 июлдаги “Қурол тўғрисида”ги Қонуни, Президентимизнинг 2020 йил 8 апрелдаги тегишли Фармони ҳамда Ички ишлар вазирлигининг тегишли кўрсатмаларига асосан мунтазам равишда тарғибот тадбирлари ўтказилиб борилади. Вазирлар Маҳкамасининг “Қурол муомаласи соҳасида рухсат бериш тартиб-таомилларини такомиллаштиришга доир қўшимча чора-тадбирлар тўғрисида”ги қарори, Ўзбекистон ва Қорақалпоғистон Республикаси Ички ишлар вазирлигининг тегишли кўрсатмалари ижросини таъминлаш мақсадида 5-15 март кунлари оралиғида ҳам “Арсенал” махсус профилактик тадбири ўтказилди.
Туман Ички ишлар бўлими томонидан ташкил этилган мазкур профилактик тадбирлар жараёнида фуқароларнинг ов қуролларини сақлаш ва улардан фойдаланиш тартиб-қоидаларига риоя қилиш ҳолати назорат тартибида ўрганиб чиқилди. Тадбир давомида тумандаги 377 нафар ов қуролига эга бўлган фуқароларга тегишли бўлган 441 та ов қуролларининг сақлаш тартиби текширилди. Бу борада қоидабузарликка йўл қўйган фуқароларга нисбатан белгиланган тартибда чоралар кўрилиб, аниқланган камчиликларнинг жойида бартараф этилиши таъминланди.
Маълумки, қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилганлик учун Ўзбекистон Жиноят кодексининг 248-моддаси биринчи қисмига кўра, энг кам ойлик иш ҳақининг эллик бараваригача миқдорда жарима ёки олти ойгача қамоқ, икки йилдан беш йилгача озодликни чеклаш ёхуд беш йилгача озодликдан маҳрум қилиш жазолари назарда тутилган. Мазкур модданинг иккинчи қисмига кўра, ўша ҳаракатлар такроран ёки хавфли рецидивист томонидан содир этилган бўлса, беш йилдан ўн йилгача, ўқотар қуролни, ўқ-дориларни, портловчи моддаларни ёки портлаш қурилмаларини ўтказиш эса, ўн йилдан йигирма йилгача озодликдан маҳрум қилиш билан жазоланади. Ушбу моддада назарда тутилган буюмларни ўз ихтиёри билан топширган шахс жавобгарликдан озод қилинади.
14 март куни “Арсенал” махсус профилактик тадбири доирасида Бўзёп овули ҳудудидаги 12 нафар фуқароларнинг хонадонларига борилиб, уларга тегишли ов қуролларининг сақланиш ҳолати текширилди. Текширишлар давомида ов қуроли Ички ишлар бўлимида рўйхатда турган бир нафар фуқаронинг ишлаш учун узоқ муддатга чет элга кетганлиги аниқланиб, унга тегишли бўлган ов қуроли вақтинча сақлаш учун туман Ички ишлар бўлимига олиб кетилди. Шунингдек, яна бир ов қуролига эга бўлган фуқаро вафот этганлиги сабабли унга тегишли бўлган ов қуроли ҳам Ички ишлар бўлимига келтирилди. Ундан ташқари, шу овулда яшовчи яна бир фуқаро отасига тегишли бўлган эски ҳовлини бузаётганида пахса девор орасидан ов қуролига тегишли бўлган бир қисмни топиб олганинини маълум қилиб, профилактика инспекторига топширди.
Фуқаролар қўлида ноқонуний сақланаётган ўқ-дори ва қуроллар тўғрисида ҳуқуқни муҳофаза қилувчи органларга ахборот беришлари зарур. Бундай ҳолатларда фуқароларнинг исми-шарифлари сир сақланиши кафолатланади. Бу орқали Ватанимиз тинчлигига ва турли нохуш ҳолатларнинг олдини олишга муносиб ҳисса қўшилган бўлади.
К.Тажибоев, туман Ички ишлар бўлими ЖТСБ инспектори.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
