БАНКРОТЛИК ТЎҒРИСИДАГИ ИШЛАР ИҚТИСОДИЙ СУДДА КЎРИЛАДИ
Банкротлик атамаси – италян тилидан келиб чиқиб, «синган курси» маъносини англатади. Банкротлик, яъни синиш дейилганида фуқаро, корхона, фирма ёки банкнинг маблағи етишмаганлигидан ўз мажбуриятлари бўйича қарзларни тўлашга қурби етмаслиги, қарздорнинг мажбуриятлари мол-мулкидан ошиб кетганлиги сабабли товарга ҳақ тўлаш юзасидан кредиторларнинг талабларини қондиришга, бюджетга ва бошқа фондларга мажбурий тўловларни таъминлашга қодир эмаслиги тушунилади.
Ўзбекистон Республикаси Иқтисодий процессуал кодексининг 25-моддасида банкротлик тўғрисидаги ишлар иқтисодий судга тааллуқли эканлиги кўрсатилган.
Ўзбекистон Республикасининг «Банкротлик тўғрисида»ги Қонуни 6-моддасига асосан иқтисодий судга қарздорни банкрот деб топиш тўғрисидаги ариза билан қарздор, кредитор ва прокурор мурожаат қила олади. Мажбурий тўловлар бўйича мажбуриятларни бажармаганлиги муносабати билан қарздорнинг банкротлиги тўғрисида иш қўзғатиш ҳақидаги ариза билан иқтисодий судга қарздор, прокурор, солиқ хизмати органлари, шунингдек, устав фондида давлат улушига эга бўлган ва пул мажбуриятлари бўйича Ўзбекистон Республикаси олдида қарзи бўлган юридик шахсларга нисбатан банкротлик тўғрисидаги ишлар буйича давлат органи ва унинг ҳудудий органлари мурожаат қилиш ҳуқуқига эга. Қарздорда банкротлик аломатлари мавжуд бўлса, иш иқтисодий суд томонидан қўзғатилиши мумкин.
Банкротлик тўғрисидаги ишлар бўйича давлат органи, шунингдек, давлат солиқ хизмати органи ва прокурорнинг қарздорни банкрот деб топиш ҳақидаги аризалари иқтисодий судлар томонидан давлат божи тўловисиз иш юритишга қабул қилинади. Суд томонидан ариза қаноатлантирилган тақдирда давлат божи қарздордан ундириш орқали қопланади.
Белгиланган тартибда ва миқдорда почта ҳаражатлари қопланганлигини тасдиқловчи ҳужжатлар тақдим этилмаган бўлса, Ўзбекистон Республикаси Иқтисодий процессуал кодекси 155-моддаси биринчи қисмининг 6-бандига асосан ариза ва унга илова қилинган ҳужжатлар қайтарилади.
Судья қарздорни банкрот деб топиш тўғрисидаги аризани Ўзбекистон Республикасининг Иқтисодий процессуал кодекси талабларига риоя этилган ҳолда берилган бўлса ўз иш юритувига қабул қилиниши ва суд кузатувни жорий этиш ва муваққат бошқарувчини тайинлаш тўғрисида ажрим чиқариши мумкин.
Хулоса қилиб айтганда, банкротлик тўғрисидаги ишларнинг банкротлик ҳолатининг вужудга келиш сабаблари чуқур синчковлик билан иқтисодий судларда кўриб чиқилиши тартиби оммага кенг ёритилиб борилиши, ҳаракатдаги корхоналар инқирозининг олдини олишга замин бўлиб хизмат қилади.
Б.Бекмуродов, Беруний туманлараро Иқтисодий суди судьяси.
Қ.О.Хожамуродов, Беруний туманлараро Иқтисодий суди судьяси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
