ИСТИРОҲАТ БОҒИДА САЛОМАТЛИК КУНИГА БАҒИШЛАНГАН ТАДБИРЛАР ЎТКАЗИЛДИ
Инсон учун энг катта бойлик бу саломатликдир. Соғлом инсон соғлом фикрлайди, ўз мақсади сари олға интилади. Саломатликни асраш учун энг муҳим восита эса бу бадан тарбияси, жисмоний ҳаракат ҳисобланади. Шу боис спорт билан шуғулланадиган кишилар нафақат жисмонан, балки маънан соғлом, иродаси мустаҳкам, соғлом фикрлайдиган инсонлар саналишади.
Спорт руҳиятни ҳам соғлом қилади, руҳияти соғлом инсон эса ҳаётнинг ҳар жабҳасида фаол ва ҳаракатчан бўлади. Қолаверса, спорт билан мунтазам шуғулланадиганлар тартиб-интизомга, тозаликка одатланади, серҳаракатлиги боис овқат ҳазм қилиш жараёни ҳам яхши кечади.
Шу йил 7 апрелда Бутунжаҳон саломатлик куни муносабати билан тумандаги Истироҳат боғида Тиббиёт бирлашмаси ходимлари томонидан тадбирлар ташкил этилди. Тадбирда туман Тиббиёт бирлашмаси масъуллари иштирок этдилар ва 1950 йилдан бошлаб, 7 апрелнинг Бутунжаҳон саломатлик куни сифатида белгилангани, шундан буён инсонларнинг саломатлигини сақлаш мақсадида йил касаллиги белгиланиб, унинг олдини олиш бўйича чора-тадбирлар ишлаб чиқиш, профилактика ишларини олиб бориш йўлга қўйилгани хусусида сўзладилар.
Шунингдек, Президентимизнинг ўтган йилги “Соғлом турмуш тарзини кенг татбиқ этиш ва оммавий спортни янада ривожлантиш чора-тадбирлари тўғрисида”ги Фармонида соғлом овқатланиш тамойиллари, жисмоний фаоллик ва оммавий спорт турлари билан шуғулланишни кенг тарғиб этиш кўрсатилгани, шунга кўра ташкилот ва корхоналарда, мактабгача таълим ташкилотлари ва мактабларда шанба саломатлик куни деб белгилангани, бу борада амалга оширилаётган чора-тадбирларга кенг тўхталиб ўтилди. Турли спорт мусобақаларини ўтказиш, шахсий гигиенанинг аҳамияти, зарарли одатларга берилмаслик ҳар бир фуқаронинг кундалик ҳаёти тарзига айлантирилишига имкон яратиш Давлат сиёсати даражасига кўтарилгани таъкидланди.
Тадбирда сўзга чиққан Тиббиёт бирлашмаси шифокори Жумабой Явқашев Президент Фармон ва Қарорлари асосида ўтказилаётган соғломлаштириш тадбирларида аҳоли саломатлигини яхшилаш, соғлом турмуш тарзини кенг татбиқ қилиш, жисмоний фаоллик, соғлом овқатланиш, зарарли одатлардан воз кечишни кундалик ҳаёт тарзига айлантириш орқали ҳар бир фуқарода кучли иммун тизими пайдо бўлишини таъминлаш кўзда тутилганига кенг тўхталди. Шунингдек, ўсмирлар акушер-гинекологи Гулистон Ақназарова репродуктив ҳуқуқ, эрта турмуш қуришнинг салбий оқибатлари хусусида батафсил маълумот берди. Тиббиёт бирлашмасининг тери-таносил касалликлари шифокори Неъматжон Артиқов эса тери-таносил касалликлари, уларнинг юқиш йўллари ҳақида сўз юритди. Шифокорлар Тамара Саидова ҳамда Матёқуб Эрназаровлар ҳам тадбир иштирокчиларига соғлом овқатланиш тартиби, шахсий гигиена, коронавирусдан сақланишда карантин чора-тадбирларига амал қилиш тартиблари тўғрисида тушунчалар бердилар.
Сўнгра болалар жарроҳи, спорт тарғиботчиси Ибодулла Нуримбетов томонидан бадантарбия, оммавий жисмоний фаолликнинг инсон саломатлигини сақлаш ва мустаҳкамлашдаги роли ҳақида маълумот берилди ва нафас гимнастикаси, фаол юриш машқлари бажарилди. Тадбир давомида иштирокчиларига коронавирусдан сақланиш, ўсмир қизлар репродуктив саломатлиги, ёшлар ўртасида соғлом турмуш тарзини тарғиб қилиш, соғлом овқатланиш, зарарли одатлардан сақланиш кабиларга доир буклет ва эслатмалар ҳам тарқатилди.
Тадбир иштирокчилари юқумли ва юқумсиз касалликлар профилактикаси, гимнастика, фаол ва пиёда юриш, велосайр, кечки сайлларнинг инсон саломатлигини мустаҳкамлашдаги аҳамияти тўғрисидаги кенг тушунчаларга эга бўлдилар.
Ж Явқашев, туман Тиббиёт бирлашмаси АСТТҚҚ ва ЖФО марказ бўлими мудири.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
