"МАШАҚҚАТЛАРДА ТОБЛАНГАН УМР" КИТОБИНИНГ ТАҚДИМОТИ БЎЛИБ ЎТДИ

Китоб – беминнат устоз. Билим ва маънавий юксалишга эришишнинг энг асосий манбаи ҳисобланади.  Инсоннинг билимли, тарбияли, касб-ҳунарли ва албатта бахтли ва давлатли бўлишининг муҳим омил – бу китобга дўст бўлиш, ҳамиша китоб ўқиш ва китоб мутолаасини умр бўйи канда қилмасликдир. Айниқса, ёшларнинг бахту камоли, осойишта ва фаровон ҳаётида китобнинг алоҳида ўрни бор. Чунки, яхши китоб инсонда Ватанга муҳаббат, умуммиллий ва умуминсоний қадриятларга ҳурмат туйғуларини юксалтириб, яхшилик ҳамда эзгуликка ундайди.

Жорий йилнинг 14 июнь куни амударёлик тадбиркор, меҳнат фахрийси Турсунбой Аҳмедовнинг машаққатли умр йўллари ҳақида ҳикоя қилувчи “Машаққатларда тобланган умр” китобининг тақдимот маросими бўлиб ўтди. Журналист Ойгул Ражабова қаламига мансуб ушбу китоб Турсунбой Аҳмедовнинг босиб ўтган  йўллари, ёшларимизга ўрнак бўлувчи  ибратли ҳикоялардан ташкил топган.

Тадбирда туман маҳалла ва оилани қўллаб-қувватлаш бўлимидан Бекман Аллаберганов, маҳалла фаолларидан Ўринбой Бердибаев, Норбой Ибодуллаев, Шеримбат Бекимбатов, Атахон Қуралов, Сапаргул Хўжамуратова, тадбиркор Собир Эримбетов, фермер Озод Тажимуратов, Беруний маҳалла фуқаролар йиғини раиси Озод Камолов, шу маҳалла хотин-қизлар масалалари бўйича ўринбосари Маҳфуза Ибраҳимовалар иштирок этишди.

Китоб – қалб чироғи, тафаккур қаноти. Айниқса, босма китобдан таралаётган  ўзига хос ёқимли ҳидни туйиб, варақлаш асносида мўжизавий саҳифаларнинг сирли шитирлашидан кўнгил чексиз завққа тўлади. Бундай китобларни мутолаа  қилиш ва унинг мазмуни ҳақида бошқа китобхонлар билан фикрлашишнинг ҳузур ҳаловати тамоман ўзгачадир.

Тақдимот кечасини Бекман ота Аллаберганов очиб берди. Тақдимот давомида Халқ депутатлари туман Кенгашига Беруний маҳалласидан сайланган депутат Нилуфар Давлетова, тадбиркорнинг шогирди Озод Тажимуратовлар сўзга чиқиб, Турсунбой аканинг фаолияти, қилган меҳнатлари ҳақида батафсил тўхталиб ўтдилар. Сўзга чиққанлар Турсунбой Аҳмедовнинг иш фаолияти давомида ҳаттоки, қўл остидаги ҳайдовчилар, ишчилар билан раҳбар эмас, балки дўстлардек муомалада бўлганликларини, ҳодимларининг ҳаётларидаги муаммоларига ҳеч қачон бефарқ қарамасликларини, намунали ишчи-ходимларни рағбатлантириб боришни ва бошқа инсоний хислатларини алоҳида таъкидлаб ўтди.

Чиндан ҳам, ҳаётининг салкам ярим асрида раҳбарлик лавозимларида ишлаб, машаққатларда тобланган, "Қорақалпоғистонда хизмат кўрсатган коммунал, маиший хизмат ва савдо ходими" унвони, "Ўзбекистон Республикаси мустақиллигига 25" йил кўкрак нишони соҳиби, 36 йилдан ортиқ вақтдан бери "Манғит" масъулияти чекланган жамиятига раислик қилиб келаётган Турсунбой ака Аҳмедовнинг ҳаёт йўли кўпчилик учун ибрат мактабидир.

Муҳтарам Президентимиз таъкидлаб ўтганидек, бугунги мураккаб ва таҳликали замонда ёзувчининг башариятнинг эртанги кунини ўйлаб, одамларни эзгуликка, инсоф-диёнат, меҳр-оқибат ва бағрикенгликка даъват этишга қаратилган ҳароратли сўзи ҳар қачонгидан ҳам муҳим аҳамият касб этмоқда. Шундай экан, ижодкорнинг ҳар бир асари китобхонлар учун маънавият уммонининг бир чашмаси сифатида қадрлидир. Журналист Ойгул Ражабова ҳам замонамиз қаҳрамонларидан бири ҳақида ҳикоя қилувчи “Машаққатларда тобланган умр” китоби билан ана шу уммоннинг янада мавжли бўлишига ҳисса қўшди.

Тадбир ниҳоясида йиғилганларга “Машаққатларда тобланган умр” китоби совға қилинди.

Севара ИСМОИЛОВА