Футбол бўйича Қорақалпоғистон Республикаси чемпионати ўтказилмоқда

Футбол бу чинакам атлетик ўйин. У тезкорлик, чаққонлик, кучлилик ва сакровчанликни ривожлантиришга ёрдам беради. Футболчи ўйин пайтида ҳаддан ташқари кўп иш бажаради. Бу эса одамнинг функционал имкониятлари даражасини оширишга, маънавий, иродавий хислатларини тарбиялашга ёрдам беради. Футбол ўйнаш умумий жисмоний тайёргарлик кўришда яхши восита бўлиб хизмат қила олади.

Инсон саломатлигини мустаҳкамлашда муҳим аҳамият касб этадиган футбол спорт турига ёшларнинг ҳам қизиқишлари тобора ортиб бормоқда. Бунда ушбу спорт тури бўйича ташкил этилаётган мусобақаларнинг ўрни беқиёс.

Жорий йилнинг 20 июнь санасида Амударё туманидаги Дўстлик маҳалласи ҳудудидаги футбол майдонида футбол бўйича Қорақалпоғистон Республикаси чемпионати “KUSHMAG” 2-лигаси 1-тур мусобақаси бўлиб ўтди. Мусобақада Амударё туманининг “Амударё” жамоаси ҳамда Беруний туманининг “Беруний” жамоалари ўзаро беллашдилар.

Мусобақа жуда қизғин, бахс-мунозарага бой тарзда ўтди. Ҳар иккала жамоалар аъзолари ғолибликни қўлдан бой бермаслик учун бор имкониятларини ишга солдилар. Беллашувнинг биринчи қисмида кучлар тенг келиб, дарвозларга гол киритилмади. Муросасиз кечган мусобақанинг иккинчи қисмида “Амударё” жамоаси томонидан дарвозага киритилган ягона гол мусобақа тақдирини ҳал қилди. Ўзига хос тарзда кечган бахсларнинг якуний натижаларига кўра “Амударё” жамоаси 1:0 ҳисоби билан ғолибликни эгаллади.  

Ушбу ғалаба билан туманимиз футбол термажамоаси чемпионатда 3 очкони қўлга киритди. “Амударё” жамоасининг кейинги учрашувлари меҳмонда жорий йилнинг 27 июнь куни Тўркўл туманининг “Тўрткўл” жамоаси билан ўтказилиши режалаштирилган.

Қайд этиш жоизки, бугун мамлакатимизда жисмоний тарбия ва спортга бўлган эътибор тобора ортиб бормоқда. Аҳоли саломатлиги тўғрисида ғамхўрлик қилиш, маънавий ва жисмоний баркамол авлодни шакллантириш, миллионлар ўйини бўлган ва мамлакатимизда алоҳида ўрин тутадиган спортнинг футбол турига аҳолини, айниқса ёшларни кенг жалб этиш бўйича бир қатор чора-тадбирлар амалга оширилиб келинмоқда.

Ўзбекистон Республикаси Президентининг “Футболни янада ривожлантириш чора-тадбирлари тўғрисида”ги қарори ҳамда “Жисмоний тарбия ва спорт соҳасида давлат бошқаруви тизимини тубдан такомиллаштириш чора-тадбирлари тўғрисида”ги ва “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги фармонлари юртимизда спортнинг, айниқса, футбол спорт турини ривожлантиришда муҳим ҳужжат бўлиб хизмат қилмоқда.

Шу билан бирга, юртимизда футбол спорт турини янада ривожлантириш мақсадида юқори иқтидорга эга бўлган ёш футболчиларни танлаш, саралаб олиш тизими ва футбол инфратузилмасини янада ривожлантириш, футбол бўйича спорт мактаблари фаолиятини янги босқичга кўтариш, соҳа мутахассисларини тайёрлаш ва уларни моддий рағбатлантириш тизимини яхшилаш, ўтказилаётган мусобақалар савиясини юксалтириш каби долзарб вазифаларни амалга оширишга алоҳида эътибор қаратилмоқда.

Шу ўринда туманимиз футбол термажамоасига келгусидаги мусобақаларда зафарлар тилаймиз.

Чарос Арслонова, туман ҳокимлигининг Ахборот хизмати раҳбари.