Туманимизда энергиянинг муқобил манбаларидан фойдаланиш кўрсаткичи ортмоқда

Мамлакатимизда иқтисодиёт барқарор ўсишини таъминлашга ва аҳолининг фаровонлик даражасини оширишга, ёқилғи-энергетика ресурсларига бўлган талаб-эҳтиёжни узлуксиз қаноатлантиришга қаратилган нефть-газ, электр энергетика, кўмир, кимё, қурилиш соҳаларини ривожлантириш борасида кенг қамровли ишлар амалга оширилмоқда.

Бугунги кунда бутун мамлактимиз бўйлаб мавжуд ёқилғи-энергетика ресурсларидан оқилона фойдаланиш мақсадида энергия тежовчи манбаларининг жорий қилиниши жараёнлари янада жадал тус олмоқда. Амударё туманининг Олмазор маҳалласидаги янгидан қурилаётган кўп қаватли уй-жойларнинг том қисмига ана шундай энергия тежовчи манбалардан қуёш панеллари ўрнатилмоқда ҳамда қурилиш-монтаж ишлари олиб борилмоқда.

"Ўз энерго инспекция" Қорақалпоғистон Республикаси ҳудудий бўлими томонидан амалга оширилаётган бу каби ишлар қизғин кўриниш касб этмоқда. Олмазор маҳалласидаги уйларга қуёш панелларини ўрнатиш орқали хонадонларни электр энергияси билан таъминлаш кўзланган. Шу мақсадда кўп қаватли уйларнинг том қисмига 48 дона энергия тежовчи қуёш панеллари ўрнатилмоқда.

Айтиш керакки, бугун иқтисодиёт тармоқлари ва ижтимоий соҳанинг энергия самарадорлигини ошириш, энергия тежовчи технологиялар ва қайта тикланувчи энергия манбаларини кенг жорий этиш давлат сиёсатининг ҳозирги босқичдаги долзарб йўналишларидан бири бўлиб қолмоқда.

Ўзбекистон Республикаси Президентининг “Иқтисодиёт тармоқлари ва ижтимоий соҳанинг энергия самарадорлигини ошириш, энергия тежовчи технологияларни жорий этиш ва қайта тикланувчи энергия манбаларини ривожлантиришнинг тезкор чора-тадбирлари тўғрисида”ги қарори ижросини таъминлаш мақсадида туманда ҳам тизимли ишлар олиб борилмоқда.

Таъкидлаш керакки, ушбу қарорга мувофиқ маъмурий биноларда, аҳоли пунктларида ва ишлаб чиқариш объектларида энергия самарадорлигини ошириш, энергия тежовчи технологияларни кенг жорий этиш ва қайта тикланувчи энергия манбаларидан фойдаланиш бўйича комплекс чора-тадбирлар қабул қилиниши белгиланган бўлиб, ушбу қарор асосида қайта тикланувчи энергия манбаларидан фойдаланиш соҳасидаги қатор имтиёз ва афзалликлар кўрсатилган. Хусусан, қайта тикланувчи энергия манбаларининг қурилмаларини ишлаб чиқарувчилар давлат рўйхатидан ўтказилган санадан эътиборан беш йил муддатга солиқнинг барча турларини тўлашдан, қайта тикланувчи энергия манбалари қурилмаларини ўрнатганлик учун улар фойдаланишга топширилган пайтдан эътиборан ўн йил муддатга мол-мулк солиғини ҳамда ушбу қурилмалар билан банд бўлган участкалар бўйича ер солиғини тўлашдан озод этилиши кўрсатилган.

Шунингдек, ишлаб турган энергетика ресурслари тармоқларидан тўлиқ узиб қўйилган яшаш учун мўлжалланган жойларда қайта тикланувчи энергия манбаларидан фойдаланувчи шахслар қайта тикланувчи энергия манбаларидан фойдаланилган ойдан эътиборан уч йил муддатга ер солиғини тўлашдан озод этилади.

Қайд этиш керакки, туманимиздаги Болалар сув спорт саройи биноси ёнига қуёш энергиясидан фойдаланган ҳолда сув иситгич радиатори ўрнатилган бўлиб, сув спорт саройидаги сувни иситишда фойданиб келинмоқда. Эндиликда ҳам шу каби қуёш батареяларини аҳоли хонадонларига ўрнатиш ишларини янада кенгайтириш режалаштирилмоқда.

Қуёш орқали иситишнинг асосий афзаллиги қуёшдан оладиган энергиянинг бепул эканлигидир. Қуёшли иссиқ сув иситгичи камдан-кам ҳолларда электр ёки газ тизимини алмаштиришга қодир, аммо иссиқ сув тизимига қуёш иситиш панеллари қўшилса, сувни иситиш учун харажатларни икки баравар камайтириши мумкин. Худди шундай, иссиқлик учун қуёш энергияси ҳам анъанавий печларни тўлдириши ва қиш ойларида харажатларни камайтириши мумкин, бу эса энг совуқ об-ҳаво учун ёқилғини тежашга имкон беради.

"Ўз Энерго инспекция" Қорақалпоғистон Республикаси ҳудудий бўлими ходимлари энергия тежовчи манбаларнинг, жумладан, қуёш батареялари, қуёш панелларидан фойдаланишнинг афзалликларини юртдошларимизга янада кенгроқ тушунтиришмоқда. Шу мақсадда аҳоли ва тадбиркорлик субектларига тушунтириш тарғибот ишларини жадал суръатларда олиб бормоқдалар.

Чарос Арслонова, туман ҳокимлигининг Ахборот хизмати раҳбари.