Ўзбекистон Республикаси Сув хўжалиги вазири иштирокида семинар бўлиб ўтди

Жорий йилнинг 3 июль куни Амударё тумани Қиличбой овулидаги "Ражабов Омонбой" фермер хўжалигида қишлоқ хўжалиги экинларини сув билан таъминлашда замонавий технологиялардан самарали фойдаланиш, паҳтани томчилатиб суғориш, ғалладан бўшаган экин майдонларига такрорий экинлар экиш масалаларига бағишланган семинар бўлиб ўтди. Семинарда Ўзбекистон Республикаси Сув хўжалиги вазири Шавкат Ҳамроев, Республика қишлоқ хўжалиги соҳаси мутахассислари, профессор, олимлар, туман ҳокими Султонбой Йўлдашев, тумандаги тўртта сектор раҳбарлари, фермер хўжаликлари раислари ҳамда қишлоқ хўжалиги соҳаси масъуллари иштирок этдилар.

Семинарда Ўзбекистон Республикаси Сув хўжалиги вазири Шавкат Ҳамроев сўзга чиқиб, Амударё тумани қишлоқ хўжалиги соҳасида катта натижаларга эришираётганлиги, соҳадаги ишлар самарали ташкил қилинганлиги, туман аграр соҳада мамлакатдаги энг илғор туманлардан бири эканлигини алоҳида таъкидлади.

Шунингдек, сўнгги йилларда табиий иқлим шароитининг кескин ўзгараётгани сабабли дунёда сув танқислиги муаммоси тобора кучаётганини қайд этиб, мавжуд сув заҳираларидан оқилона фойдаланиш зарурлиги ҳақида сўз юритди.

Сув танқислиги муаммоси, айниқса, аграр соҳа тараққий этган ҳудудларда яққол сезилмоқда. Шу жумладан, туманимизда ҳам сув етишмовчилиги билан боғлиқ муаммолар кўзга ташланмоқда. Ҳудудлардаги сув тақчиллигини юмшатишда қишлоқ хўжалиги экинларини сув билан таъминлашда сув тежовчи технологиялардан оқилона фойдаланиш сезиларли натижаларни бермоқда.

Айтиш керакки, жорий йилда тумандаги жами 3800 гектар экин майдонида сувни тежайдиган технологияларни жорий қилиш белгиланган бўлиб, шундан 3730 гектар ер томчилатиб суғориш, 30 гектар майдон ёмғирлатиб суғориш, 40 гектар ер эса дискрет усулида суғорилиши режалаштирилган.

Шу йилнинг май ойи ҳолатига жами 169 та фермер хўжалиги ва 1 та кластер ташкилоти томонидан 2 816 гектар экин майдонида сувни тежайдиган технологияларни жорий қилиш бўйича пудратчи ташкилотлар билан шартномалар тузилган.

Шунингдек, пахта хомашёсини етиштиришда томчилатиб суғориш технологиясини жорий қилиш бўйича 145 та фермер хўжалиги томонидан 2 581 гектар, 1 та кластер ташкилоти томонидан 34,5 гектар майдонда, мевали боғ ва бошқа экин майдонларида томчилатиб суғориш технологиясини жорий қилиш бўйича 19 та фермер хўжалиги томонидан 130 гектар майдонда пудратчи ташкилотлар билан шартномалар қилинган. Жумладан, "Ражабов Омонбой" фермер хўжалигида 37 гектар экин майдонида томчилатиб суғориш технологияси жорий қилинган бўлиб, гектаридан 60 центнергача ҳосил олиш кўзламоқда.

Семинарда йиғилганларга томчилатиб суғориш технологиясининг афзалликлари, технологиядан фойдаланишнинг ўзига хос жиҳатлари хусусида маълумотлар бериб ўтилди.

Туманимиздаги қишлоқ хўжалиги соҳаси мутахассислари масъулларга қатор муаммолар юзасидан мурожаатлар қилдилар. Мурожаатлардаги масалаларни ижобий ҳал қилиш учун тегишли масъуллар билан келишиб олинди, қатор мурожаатлар тушунтиришлар бериш орқали шу ернинг ўзида ҳал қилинди. Қолаверса, семинарда иштирок этаётган профессор, олимлар фермерлар томонидан берилган саволларга жавоблар бердилар.

Чарос Арслонова, туман ҳокимлигининг Ахборот хизмати раҳбари.