Oʻzbekiston Respublikasi Suv xoʻjaligi vaziri ishtirokida seminar boʻlib oʻtdi

Joriy yilning 3-iyul kuni Amudaryo tumani Qilichboy ovulidagi "Rajabov Omonboy" fermer xoʻjaligida qishloq xoʻjaligi ekinlarini suv bilan taʼminlashda zamonaviy texnologiyalardan samarali foydalanish, pahtani tomchilatib sugʻorish, gʻalladan boʻshagan ekin maydonlariga takroriy ekinlar ekish masalalariga bagʻishlangan seminar boʻlib oʻtdi. Seminarda Oʻzbekiston Respublikasi Suv xoʻjaligi vaziri Shavkat Hamroyev, Respublika qishloq xoʻjaligi sohasi mutaxassislari, professor, olimlar, tuman hokimi Sultonboy Yoʻldashev, tumandagi toʻrtta sektor rahbarlari, fermer xoʻjaliklari raislari hamda qishloq xoʻjaligi sohasi masʼullari ishtirok etdilar.

Seminarda Oʻzbekiston Respublikasi Suv xoʻjaligi vaziri Shavkat Hamroyev soʻzga chiqib, Amudaryo tumani qishloq xoʻjaligi sohasida katta natijalarga erishirayotganligi, sohadagi ishlar samarali tashkil qilinganligi, tuman agrar sohada mamlakatdagi eng ilgʻor tumanlardan biri ekanligini alohida taʼkidladi.

Shuningdek, soʻnggi yillarda tabiiy iqlim sharoitining keskin oʻzgarayotgani sababli dunyoda suv tanqisligi muammosi tobora kuchayotganini qayd etib, mavjud suv zahiralaridan oqilona foydalanish zarurligi haqida soʻz yuritdi.

Suv tanqisligi muammosi, ayniqsa, agrar soha taraqqiy etgan hududlarda yaqqol sezilmoqda. Shu jumladan, tumanimizda ham suv yetishmovchiligi bilan bogʻliq muammolar koʻzga tashlanmoqda. Hududlardagi suv taqchilligini yumshatishda qishloq xoʻjaligi ekinlarini suv bilan taʼminlashda suv tejovchi texnologiyalardan oqilona foydalanish sezilarli natijalarni bermoqda.

Aytish kerakki, joriy yilda tumandagi jami 3800 gektar ekin maydonida suvni tejaydigan texnologiyalarni joriy qilish belgilangan boʻlib, shundan 3730 gektar yer tomchilatib sugʻorish, 30 gektar maydon yomgʻirlatib sugʻorish, 40 gektar yer esa diskret usulida sugʻorilishi rejalashtirilgan.

Shu yilning may oyi holatiga jami 169 ta fermer xoʻjaligi va 1 ta klaster tashkiloti tomonidan 2 816 gektar ekin maydonida suvni tejaydigan texnologiyalarni joriy qilish boʻyicha pudratchi tashkilotlar bilan shartnomalar tuzilgan.

Shuningdek, paxta xomashyosini yetishtirishda tomchilatib sugʻorish texnologiyasini joriy qilish boʻyicha 145 ta fermer xoʻjaligi tomonidan 2 581 gektar, 1 ta klaster tashkiloti tomonidan 34,5 gektar maydonda, mevali bogʻ va boshqa ekin maydonlarida tomchilatib sugʻorish texnologiyasini joriy qilish boʻyicha 19 ta fermer xoʻjaligi tomonidan 130 gektar maydonda pudratchi tashkilotlar bilan shartnomalar qilingan. Jumladan, "Rajabov Omonboy" fermer xoʻjaligida 37 gektar ekin maydonida tomchilatib sugʻorish texnologiyasi joriy qilingan boʻlib, gektaridan 60 tsentnergacha hosil olish koʻzlamoqda.

Seminarda yigʻilganlarga tomchilatib sugʻorish texnologiyasining afzalliklari, texnologiyadan foydalanishning oʻziga xos jihatlari xususida maʼlumotlar berib oʻtildi.

Tumanimizdagi qishloq xoʻjaligi sohasi mutaxassislari masʼullarga qator muammolar yuzasidan murojaatlar qildilar. Murojaatlardagi masalalarni ijobiy hal qilish uchun tegishli masʼullar bilan kelishib olindi, qator murojaatlar tushuntirishlar berish orqali shu yerning oʻzida hal qilindi. Qolaversa, seminarda ishtirok etayotgan professor, olimlar fermerlar tomonidan berilgan savollarga javoblar berdilar.

Charos Arslonova, tuman hokimligining Axborot xizmati rahbari.