АҲДИ ВА ШАҲДИ БАЛАНД ЁШ ФЕРМЕР

Қишлоқда туғилиб-ўсгани учунми, Самаджон қайси  ишга қўл урса, уддасидан чиқадиган, уддабурон бола бўлиб вояга етди. Умумтаълим мактабида ўқиб юрган кезларидаёқ вақтдан унумли фойдаланишга, ҳар бир ишни режа асосида бажаришга одатланган Самаджон ўқишдан бўш вақтларида ота-онасига томорқа ишларида яқин кўмакдош бўлди. Айниқса, отаси Холбой оға “Самад СХА” фермер хўжалигини ташкил этганида ўзида йўқ қувонди. Бу пайтда Нукус Давлат Педагогика институтида таҳсил олаётган Самаджоннинг бир оёғи овулда бўлиб қолди. У то институтни тамомлагунча ўқишдан бўш вақтларида отаси раҳбарлик қилаётган фермер хўжалиги далаларида  опа-акалари, хўжалик ишчилари билан баб-баравар меҳнат қилди.

Қизиқишлари устун келдими, ҳар қалай, институтни тугатиб, “Самад СХА” фермер хўжалиги иш бошқарувчиси сифатида илк меҳнат фаолиятини бошлаган Самаджон Хидирбоев бир йил давомида фермер хўжалиги фаолиятига оид иқтисодий-молиявий асосларни пухта ўзлаштирди. Натижада 2014 йилда пенсияга чиққан отаси Холбой оға Хидирбоев фермер хўжалигини Самаджонга ишонч билан топширди. Мана, саккиз йилдирки, Самаджон “Хидирбоев Самад” фермер хўжалигини моҳирлик билан бошқариб келмоқда. У фермерлик фаолиятини бошлаган 2014 йилдаёқ пилла етиштириш режаси 115 фоизга, 2015 йилда бу кўрсаткич 118 фоизга уддаланди. Фақат 2014-2015 қишлоқ хўжалик йилида “Хидирбоев Самад” фермер хўжалигида йиллик даромад 210 млн. сўмни ташкил этиб, 68 млн. сўм соф даромад олинди.

Орадан уч йил ўтиб, 2017 йилда ёш ва ташаббускор фермер Самаджон Хидирбоев Тошкент шаҳрида ўтказилган Ўзбекистон ёш фермерларининг 1-Республика форумида фаол иштирок этиб, диплом билан тақдирланди. Анъанавий равишда ҳар йили ташкил этиладиган “Ташаббус” кўрик-танловининг фаол иштирокчиси бўлган Самаджон Хидирбоев 2018 йилда “Йилнинг энг фаол ёш мутахассиси” республика кўрик-танловининг туман босқичида “Энг ёш фермер” номинацияси совриндори, мазкур кўрик-танловнинг Республика босқичида эса “Йилнинг энг фаол ёш фермери” йўналиши бўйича 1-ўрин соҳиби бўлди ва 1-даражали диплом, қимматбаҳо совғалар билан тақдирланди.

Халқимиз “Меҳнат қилган элда азиз”, – дея ардоқлайди ўз фидойи фарзандларини. Самаджон ҳам ёш бўлишига қарамай, ўзининг ишбилармонлиги, элпарварлиги билан овулдошлари ҳурматига, эътиборига сазовор бўлганлардан.

Айни пайтда фермер хўжалигида 60 нафар киши доимий иш билан таъминланган. Жорий деҳқончилик йилида 56 гектар ерга пахта эккан хўжалик деҳқонларининг кўзлаган марралари юксак. Ҳар гектар ҳисобига ҳосилдорликни 40 центнерга, умумий пахта хирмонини 224 тоннага етказишга аҳд қилишган. 2021 йилги пилла топшириш режасини эса 102 фоизга уддалашди.

Хўжаликда нафақат пахта, ғаллачилик ва пиллачилик, балки эртаги ҳамда кузги сабзавот ва полиз экинлари етиштиришга ҳам алоҳида эътибор қаратилади. Шу боис, хўжалик ишчиларининг моддий манфаатдорлиги ҳам юқори. Хўжалик ишчиларига йил давомида ҳар бир оила ҳисобига 400 кг.дан картошка, 250 кг. пиёз, 350 кг. сабзи ва турли мевалар берилиши йўлга қўйилган.

– Ишчиларимиз меҳнатига яраша ҳақларини ҳам олишлари керак, ҳаётларидан рози бўлиб яшашмаса, қилаётган ишида унум бўлмайди, – дейди Самаджон Хидирбоев. – Хўжалигимиз ишчилари менинг қўл-қанотларим.

Айни кунларда хўжалик далаларида жорий деҳқончилик йилининг иккинчи ҳосили – буғдой ўрим-йиғими ҳам ниҳоясига етган. Хўжаликнинг бу йилги ғалла хирмони ҳам юксалиб, 50 тонна қирмизи дон йиғиштириб олинди, омборлар донга тўлди. Ёш фермернинг эса шаҳди ҳам, аҳди ҳам баланд. Биз Самаджон Хидирбоевга келгусида янада юксак марраларни забт этишида омадлар ёр бўлишини тилаймиз.

Робия ЙЎЛДОШЕВА.