1-ярим йилликда Амударё тумани Давлат солиқ инспекцияси томонидан давлат бюджети даромадларига 31 млрд. сўм маблағ ундирилди

Мамлакатимизда иқтисодиётни янада ривожлантириш борасида кенг кўламли ислоҳотлар амалга оширилаётган бўлиб, бу борада самарали солиққа тортиш тизими ва давлат солиқ хизмати органларининг фаолияти алоҳида аҳамият касб этади.

Давлат солиқ органларининг солиқ тўғрисидаги қонун ҳужжатларига риоя этилиши, солиқларнинг тўғри ҳисоблаб чиқарилиши, тўлиқ ва ўз вақтида тўланиши устидан назоратни таъминлаш, солиқларнинг Ўзбекистон Республикаси Давлат бюджетига ва давлат мақсадли жамғармаларига тўлиқ ҳамда ўз вақтида тушишини, солиқ тўловчилар ва солиқ солиш обьектларининг ўз вақтида ҳамда ишончли ҳисобга олинишини таъминлаш каби қатор вазифаларни амалга ошириш борасида Амударё тумани Давлат солиқ инспекцияси самарали фаолият юритиб келмоқда.

Шунингдек, туман Давлат солиқ инспекцияси солиқ тўловчилар билан ишлашни такомиллаштириш, солиқ тўловчиларнинг ҳуқуқий маданиятини ошириш бўйича қатор чора-тадбирларни амалга ошириб, солиқ тўловчиларга солиқ мажбуриятларини бажаришда ҳар томонлама кўмаклашиб келмоқда.

Маълумот тариқасида айтиш керакки, жорий йилнинг 1-ярмида Амударё тумани Давлат солиқ инспекцияси томонидан давлат бюджети даромадларига 31 млрд. сўм маблағ ундирилиб, режа амалда 113,8 фоизга бажарилди. Яъни, режага нисбатан 3,8 млрд. сўм кўп маблағ ундирилди.

Шунингдек, жорий йилнинг июль ойи ҳолатига туманда жами 1352 та тадбиркорлик субъектлари рўйхатдан ўтган бўлиб, шундан кичик тадбиркорлик субъектлари сони 1 минг 22 тани ташкил қилади ҳамда ҳозирги кунда самарали фаолият кўрсатиб келмоқда. Шундан июнь ойида 23 таси янгидан рўйхатдан ўтиб, ўз фаолиятини бошлаган бўлса, 10 таси фаолиятини қайта тиклаган корхона-ташкилотлар ҳисобланади. Якка тартибда меҳнат фаолияти билан шуғулланиш мақсадида 1 июль ҳолатига жами 1 минг 431 нафар якка тартибдаги тадбиркорлар рўйхатдан ўтган.

Туман Давлат солиқ инспекцияси жисмоний шахслардан олинадиган мол-мулк солиғини ҳисоблаш ҳамда тўланишини таъминлаш борасида самарали ишларни ташкил қилиб, давлат бюджети даромадлари ошишига ҳисса қўшмоқда. Жорий йилнинг шу даврига қадар тумандаги жисмоний шахслардан олинган мол-мулк ва ер солиқлари бўйича жами 896,2 млн.сўм давлат бюджетига тушум ундирилган бўлиб, шундан ер солиғи 721.7 млн сўм, мол-мулк солиғи эса 174.5 млн сўмни ташкил қилади.

Айтиш керакки, мамлакатимизда тадбиркорлик ва ишбилармонликни янада ривожлантириш мақсадида кенг қамровли ислоҳотлар амалга оширилаётган бўлиб, тадбиркорлик субектларининг самарали фаолият юритишлари учун кўплаб имкониятлар ҳамда шарт-шароитлар яратилмоқда.

Туман Давлат солиқ инспекцияси бугунги кунда солиқ идораларининг “Солиқчи – тадбиркорга кўмакчи” тамойили асосида тизимли ишларни ташкил қилиб, туманимиздаги тадбиркорларни қўллаб-қувватлаб, уларга кўмакчи сифатида фаолият кўрсатиб келмоқда. Масалан, Амударё туманидаги “Озодбой Амирхон” масъулияти чекланган жамиятига ҳам ушбу тамойил асосида амалий ёрдамлар кўрсатилиб, солиқ имтиёзларини тушунтириш ишлари олиб борилмоқда.

Тумандаги Ўрта қалъа овулида жойлашган “Озодбой Амирхон” масъулияти чекланган жамияти бугунги кунда энг илғор тадбиркорлик субьектларидан бири ҳисобланади. Жамият жорий йилнинг февраль ойидан ўз фаолиятини бошлаган. Шу мақсадда тадбиркор 120 млн. Сўм имтиёзли кредит олиб, икки қаватли бинони бунёд қилди. “Озодбой Амирхон” масъулияти чекланган жамиятига қарашли мазкур замонавий ва кўркам бино ишга тушиши билан 5 нафар юртдошларимизнинг бандлиги таъминланди.

Бинода қатор хизмат кўрсатиш турлари ташкил қилинган. Хусусан, китобсевар ҳамюртларимиз учун китоб дўкони фаолият юритмоқда. Қолаверса, аҳолини тозаланган ичимлик суви билан таъминлаш шохобчаси, озиқ-овқат ва ноозиқ овқат дўкони ҳам самарали ишлаб турибди. Аҳолига банк хизматларини кўрсатиш учун шароит яратиш мақсадида “Агробанк” акциядорлик жамияти филиали ҳам мазкур бинода мини банкини очган ва айни кунларда самарали фаолият юритмоқда.

Туман Давлат солиқ инспекцияси масъуллари “Солиқчи – тадбиркорга кўмакчи” тамойили асосида тумандаги барча тадбиркорлик субъектларига солиққа тортиш, солиқларни ҳисоблаш ва тўлаш бўйича амалий ёрдамлар кўрсатиб келмоқда.

Бегзод Йўлдашев, туман ДСИ тадбиркорликни қўллаб-қувватлаш шўъбаси бош инспектори