ҚЎРИҚЛАШ ХИЗМАТИ ХОДИМЛАРИ ЎРТАСИДА СПОРТ МУСОБАҚАЛАРИ ЎТКАЗИЛДИ

12 июль куни Амударё тумани Болалар ва ўсмирлар спорт мактабида туман Қўриқлаш бўлими шахсий таркиб ходимлари орасида спорт мусобақаси ташкил этилди.

Спорт – соғлом турмуш, соғлик гарови ҳисобланади. Қайси соҳада хизмат қилишдан қатъий назар спорт билан шуғулланиш инсон саломатлиги учун катта аҳамият касб этади. Шу сабабли Президентимизнинг бу борадаги “Соғлом турмуш тарзини кенг тадбиқ этиш ва оммавий спортни янада ривожлантириш чора-тадбирлари тўғрисида”ги Фармони ва Вазирлар Маҳкамасининг “Аҳолининг соғлом турмуш тарзини қўллаб-қувватлаш ва жисмоний фаоллигини оширишга доир қўшимча чора-тадбирлар тўғрисида”ги қарори асосида аҳолини спорт билан шуғулланишга кенг жалб этишга алоҳида эътибор қаратилмоқда.

12 июль куни туман Болалар ва ўсмирлар спорт мактабида Амударё туманидаги Қўриқлаш бўлими шахсий таркиб ходимлари орасида спорт турларини кенг тарғиб қилиш, ходимларнинг жисмоний тайёргарлигини ошириш, улар ўртасидаги дўстлик туйғуларини мустаҳкамлаш мақсадида спорт мусобақаси ташкил этилди. Ушбу мусобақада ходимлар спортнинг кўп кураш, яъни турникда тортиниш, ётган ҳолда таяниб қўлларни букиб-ёзиш, 100 ва 400 метр масофага югуриш турлари бўйича ўзаро куч синашдилар.

Мусобақа бошланишида мамлакатимизда спорт соҳасига нафақат мамлакатни дунёга танитиш балки халқимизнинг соғлиғини мустаҳкамлаш, соғлом авлодни тарбиялашнинг асосий мезони сифатида катта эътибор берилаётгани хусусида сўз юритилди. Шунингдек, спорт билан доимий шуғулланиш орқали инсонда шахс белгилари, ташаббускорлик, курашчанлик, чидамлилик сифатлари ривожланиб бориши, спорт ўйинларини томоша қилиш жараёнида эса жамият қадриятлари шахс қадриятларига айланиб бориши таъкидланди. Шундан сўнг, спортнинг ҳар бир турида муайян қоидалар мавжуд бўлиши, уларга мос равишда спортчилар ҳаракатланиши, спорт кураши олиб борилиши, ҳаракатга баҳо берилиши, натижа ва ғолиб аниқланиши яна бир бор батафсил тушунтирилди ва мазкур мусобақа иштирокчиларига омад тилаб, бошлашга старт берилди.

Иштирокчилар мусобақа бошланишида барча шартлар билан таништирилганидан сўнг, беллашувга киришдилар. Ўз маҳоратини, чаққонлигини, абжирлигини, тиришқоқлигини намойиш этиб, бири-биридан қолишмаган касбдошлар ғолибликка эга бўлишга астойдил ҳаракат қилдилар. Қизғин ўтган мусобақа жараёнлари ҳакамлар ҳайъати томонидан одилона баҳолаб борилди.

Мусобақанинг 100 метрга югуриш шарти бўйича чаққонлик қилиб, белгиланган муддатдан олдин маррага етиб келган Қўриқлаш хизмати қоровули Давронбек Эркабоев 1-ўрин ғолиби бўлди. Ушбу шарт бўйича сафдор Дилмурод Хўжаков 2-ўрин, сафдор Музаффар Яхшимуродов 3-ўрин ғолиблигини қўлга киритди. Шунингдек, 400 метрга югуриш шарти бўйича куч синашишлар давомида 1-ўринни хизмат ходими Исломбек Муродбоев, 2-ўринни Отабек Худойберганов, 3-ўринни Ойбек Раҳимов эгаллади.

Турникда тортиниш шарти бўйича Русланбек Жуманиёзов 1-ўрин, Аҳмад Исмоилов 2-ўрин, Отабек Султонов 3-ўрин ғолиби деб топилди. Энг сўнгги ётган ҳолда таяниб, қўлларни букиб-ёзиш шартини бажариш давомида 1-ўринга Дониёр Матёқубов, 2-ўринга Жамол Айбусинов, 3-ўринга Равшанбек Сапарбоев муносиб кўрилди. 

Қўриқлаш хизмати шахсий таркиб ходимларининг жисмоний тайёргарлигини ошириш, уларнинг кундалик турмушига жисмоний тарбия ва спортни кенг тадбиқ этиш мақсад қилинган ушбу мусобақа якунида ғолиблар совғалар ва фахрий ёрлиқлар билан тақдирланишди.  Соҳа ходимлари ўртасида ўтказилаётган бу каби спорт мусобақалари келгусида, албатта, ўзининг ижобий натижасини кўрсатади.

Элёр Юсупов, туман Қўриқлаш бўлими гуруҳ командири.