КАРАНТИН ҚОИДАЛАРИГА РИОЯ ЭТИЛИШИНИ ТАЪМИНЛАШ БЎЙИЧА РЕЙДЛАР ЎТКАЗИЛМОҚДА

Бутун дунёни ташвишга солаётган коронавирус инфекцияси сўнгги пайтларда турли штаммлар, кўринишларда намоён бўлиб, инсонлар ҳаётини хавф остида қолдиришда давом этмоқда. Ўтган ойлар давомида касаллик тарқалиши янада авж олиб, юқтираётганлар сони орта бошлади. Шу сабабдан юртимизда карантин чекловлари кучайтирилиб, умумий овқатланиш муассасалари, кафе ва ресторанлар, савдо шохобчаларида хизмат кўрсатиш вақтлари қисқартирилди. Шунингдек, концерт ва томошалар каби оммавий тадбирларни ўтказиш чекланди.

2 август куни туман ҳудудида карантин чекловларига амал қилиниши бўйича назоратни таъминлаш мақсадида рейд тадбирлари ўтказилди. Ушбу рейд тадбирларида туман Ички ишлар бўлими профилактика инспекторлари ва бошқа масъуллари иштирок этдилар. Тадбир давомида савдо мажмуалари, озиқ-овқат дўконлари кириш қисмида ниқобда бўлиш, тана ҳароратини ўлчаш, қўлларни антисептик билан зарарсизлантириш амалиётига риоя этилиши, кафе ва бошқа умумий овқатланиш объектларининг белгиланган вақтларда, умумий сиғимининг 50 фоиздан ортиқ бўлмаган ҳолатда фаолият юритилаётгани назорат қилинди.

Айтиш жоизки, шу йил 17 апрель куни бош вазир Абдулла Арипов Республика махсус комиссиясининг кенгайтирилган йиғилишида Ўзбекистонда 18 апрелдан коронавирус туфайли жорий этилган карантин чекловлари кучайтирилиши ҳақида маълум қилган эди. Унга кўра Ички ишлар, Миллий гвардия, Санитария эпидемиология хизмати, Маҳалла ва оилани қўллаб-қувватлаш бўлимлари масъуллари томонидан жамоат жойларида ниқоб тақиш, ижтимоий масофани сақлаш, шахсий гигиена қоидаларига риоя этиш, қўлларни антисептик билан зарарсизлантириш тадбирлари назоратини кучайтириши ва қоидабузарларга нисбатан қатъий жавобгарлик чоралари кўрилишини, жарималар солинишини таъминлаши белгилаб қўйилди.

Шунга кўра туман ҳудудида ўтказилган рейд тадбирлари давомида Манғит шаҳри марказидаги умумий овқатланиш жойлари, кафе ва озиқ-овқат дўконлари назоратдан ўтказилди.

Ўзбекистонда жамоат жойларида ниқобсиз юриш 2020 йилнинг март ойидан бошлаб таъқиқланган. Ниқобсиз юрганлар жаримага тортилади. Маъмурий жавобгарлик тўғрисидаги кодекснинг 54-моддасига асосан, ваколатли органнинг махсус талабларига зид равишда жамоат жойларида ниқобсиз бўлиш базавий ҳисоблаш миқдорининг беш бараваригача миқдорда жарима солишга сабаб бўлади.

Жорий йилнинг 7 ойи давоми туман ҳудудида 460 фуқаролар карантин қоидалари бузганлиги аниқланиб, уларнинг барчаси жаримага тортилдилар.

Ўзбекистон Республикасига коронавируснинг кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича республика махсус комиссиясининг шу йил 17 июль кунги йиғилиши баёнининг ижросини таъминлаш мақсадида ўтказилган мазкур рейд тадбирида тумандаги ошхона ва кафеларда соат 20:00дан кейин фаолият юритиб турганлик ҳолати текширилди. Текширишлар давомида баъзи кафелар карантин қоидаларига роия қилмасдан фаолият юритиб турганлиги аниқланиб, чора кўриш учун тегишли ҳужжатлар расмийлаштирилди. Шунингдек, тадбир давомида карантин чекловлари ва тартиб-қоидаларига риоя этиш, ўзаро мулоқотда оралиқ масофа сақлаш, тиббий ниқобда юриш тартибига амал қилмаслик ҳолатларининг жавобгарликка сабаб бўлиши ҳақида тушунчалар берилди.

Туманда коронавирус тарқалишининг олдини олиш мақсадида профилактика инспекторлари томонидан кенг турдаги тарғибот ва ташвиқот ишлари олиб борилмоқда. Карантин қоидаларига риоя қилмаган фуқароларга қаттиқ чоралар кўрилмоқда. 

Орифжон Қосимов, туман ИИБ Ҳуқуқбузарликлар профилактикаси бўлинмаси бошлиғи.